Read new_tumbuka_bible Marango gha Chiŵiri 11 Bible Online

Marango gha Chiŵiri 11 - new_tumbuka_bible bible

Marango gha Chiŵiri 11

¹Mutemwenge FUMU, Chiuta winu na kusunga ivyo wakumuchenjezgani, marango ghakhe, vilayizgo ghakhe na malangulo ghakhe mazuŵa ghose.

²Kumbukani muhanya uno kuti ŵakaŵa ŵana ŵinu chara, kweni imwe ndimwe mukawona na kusambira, visambizgo vya FUMU, Chiuta winu. Ndimwe mukawona ukuru wakhe, woko lakhe lankhongono na lakutambazuka.

³Mukawona vimanyikwiro na milimo iyo wakachita mu charu chose cha Eguputo, kwa Faro, karonga wa charu cha Eguputo na ku ŵanthu ŵakhe wose.

⁴Ndimwe mukawona icho FUMU yikachita ku ŵasilikari ŵa ku Eguputo, ku mahachi ghawo na magareta ghawo, umo yikachitikira na maji gha Nyanja ya Matete kuŵabizga na kuŵamara petu ŵaEguputo apo ŵakamurondezgani.

⁵Imwe ndimwe mukawona ivyo FUMU yikamuchitirani mu mapopa muchali mundafike kuno.

⁶Ndipo mukawona icho yikachita kwa Datani na Abiramu ŵana ŵa Eliyabu ŵa fuko la Rubeni umo charu chikajurikira na kuŵamira wose pamoza na mbumba zawo, mahema ghawo, mphango zawo na viŵeto vyawo uku ŵaIsraele wose ŵakuwona.

⁷Nadi, imwe ndimwe mukawona vinthu vyose vikuru ivi ivyo FUMU yikachita.

⁸“Ntheura mupulikirenge marango ghose agho nkhumupani muhanya uno mwakuti muŵe ŵankhongono kuya kakhara mu charu icho mwamkutora kuŵa chinu.

⁹Para mazuŵa gha umoyo winu ghaŵenge ghanandi mu charu cha mkaka na uchi FUMU yikarapa kuŵapa ŵasekuru ŵinu na mphapu zawo.

¹⁰Charu icho mukuya kachipoka kuti chikuyana na charu cha Eguputo chara icho mwafumamo. Kwenekura mukapandanga mbuto zinu ndipo mukafwirirapo kuzithilira maji nga za mu madimba.

¹¹Kweni charu icho mukuruta kuya kachipoka ndi charu cha mapiri na madambo ndipo chikupokera vura kufuma ku mtambo.

¹²Ichi ndi charu icho FUMU, Chiuta winu wakupwererera ndipo wakuchilaŵiska mazuŵa ghose kufuma pa kwamba kwa chirimika mpaka ku umaliro.”

¹³“Ntheura usange muti mupulikirenge marango ghose agho nkhumupani muhanya uno, kuyitemwa FUMU, Chiuta winu na kumuteŵetera iyo na mitima yinu yose na umoyo winu wose,

¹⁴mbwenu FUMU yiti yitumenge vura mu charu chinu pa nyengo yakhe, vura yakwamba na vura ya umaliro, mwakuti muvunenge vyakurya na vinyo ndiposo na mafuta gha olive.

¹⁵FUMU yimezge utheka kuti viŵeto vyinu viryenge, ndipo imwe muti muryenge na kukhuta.

¹⁶Muchenjere kuti mureke kupusikika ndipo muzgoke na kuteŵetera ŵachiuta ŵanyakhe na kuŵasopa.

¹⁷Usange mupusikikenge FUMU yiti yimukaripirani. Yiti yijandenge mtambo mwakuti vura yireke kurokwa ndipo charu chiti chipambikenge chara. Ndipo mwaluŵiro mwamkumara petu mu charu chira nangauli ndi charu chiweme icho nkhumupani.”

¹⁸“Ntheura mughasunge mazgu ghane agha mu mitima yinu na mu maghanoghano ghinu ndipo mughakakilire pa mawoko ghinu na pa visko vyinu kuŵa chimanyikwiro.

¹⁹Musambizgenge marango agha ku ŵana ŵinu kuti waghayowoyenge mu zinyumba zakwawo, para wakwenda mu nthowa, para ŵakugona na para wakuwuka.

²⁰Mughalembenge pa mafuremu gha miryango ya zinyumba zinu na gha vipata vyinu,

²¹mwakuti mazuŵa gha umoyo winu na gha ŵana ŵinu ghaŵenge ghanandi mu charu icho FUMU yikarapa kupereka ku ŵasekuru ŵinu mazuŵa ghose nga ndi umo uliri mtambo pachanya pa charu.”

²²“Usange muti mupulikirenge marango ghose agha gheneagho nkhumupani muhanya uno agho ghakuti: Mutemwenge FUMU, Chiuta winu, mwendenge mu nthowa zakhe zose, na kuŵa wakugomezgeka kwa iyo,

²³Penepapo ndipo FUMU yiti yichimbizge na kuŵafumiska ŵamitundu wose aŵa panthazi pinu ndipo imwe mwamkupoka vyaru vya ŵanthu ŵakuruŵakuru na ŵankhongono kuruska imwe.

²⁴Malo ghose agho malundi ghamkukandapo, ndigho ghamkuŵa ghinu. Charu chinu chamkwamba ku mapopa gha Lebanoni mpaka ku mronga wa Yufurate na ku nyanja ya ku manjiliro gha dazi.

²⁵Kuti wamkuŵako munthu wakwimikana namwe chara pakuti FUMU, Chiuta winu wamkuŵika chofyo na chitenthe mu ŵanthu pa charu chose icho mwamkukandapo nga ndi umo wakapanganirana namwe.”

²⁶“Muhanya uno nkhumupani vitumbiko na nthembo kuti musankhepo.

²⁷Mwamkutumbikika usange mwamkupulikira marango gha FUMU, Chiuta winu agho nkhumupani muhanya uno.

²⁸Mwamkutembeka usange mwareka kupulikira marango agha gha FUMU, Chiuta winu na kufumamo mu nthowa iyo nkhumulangulani muhanya uno, pakusopa ŵachiuta ŵanyakhe awo kuti mukuŵamanya chara.

²⁹Para FUMU, Chiuta winu wamkumunjizgamo mu charu icho mwamkutora kuŵa chinu mwamkuŵika vitumbiko vyinu pa Phiri la Gerizimu ndipo na nthembo pa Phiri la Ebala.

³⁰(Kasi ŵali ku sirya linyakhe la mronga wa Yorodani chara? Ku manjiliro gha dazi kwa msewu, kuyira ku manjiliro gha dazi, mu charu cha ŵaKanani awo ŵakukhara mu Araba ku sirya lira la Giligala kulaŵiskana nayo, ku lwande lwa mtundu wa makuni ghakuru gha musoro gha charu cha More?)

³¹Muli pafupi kwambuka mronga wa Yorodani kuti munjire na kupoka charu icho FUMU Chiuta winu wakumupani. Para mwakachipoka na kukhara mwenemumo,

³²mukawoneseske kuti mukupulikira malangulo na marango ghose agho nkhumupani muhanya uno.”