Read new_tumbuka_bible Marango gha Chiŵiri 13 Bible Online

Marango gha Chiŵiri 13 - new_tumbuka_bible bible

Marango gha Chiŵiri 13

¹“Usange kwawoneka nchimi panji uyo wakulota maloto mukati mwinu wakwiza na kurongora chimanyikwiro panji chakuzizwiska,

²ndipo chimanyikwiro panji chakuzizwiska chira chikwizakachitika nadi na kumuphalirani kuti, tiyeni tirondezge ŵachiuta ŵanyakhe na kuŵateŵetera awo imwe mundaŵamanyepo na kale,

³mureke kuya kayipulikira nchimi iyo panji uyo wakulota maloto uyo. Pakuti FUMU, Chiuta winu wakumuyezgani kuti wamanye usange mukutemwa na mtima winu wose ndiposo na umoyo winu wose.

⁴Imwe mukwenera kurondezga na kopa FUMU, Chiuta winu. Musungenge marango ghakhe na kuteŵetera na kudemerera kwa iyo pera.

⁵Ndipo nchimi yira panji wakulota maloto yura wakwenera kukomeka chifukwa wakumusambizgani kugarukira FUMU, Chiuta winu mweneuyo wakamufumyani mu charu cha Eguputo na kumuwombolani mu uzga. Munthu wa ntheura ndi muheni pakuti wakukhumba kumupuruskani kuti mureke nthowa iyo FUMU, Chiuta winu wakamuphalirani kuti mwendemo. Wakwenera kukomeka mwakuti muwuskepo uheni mukati mwinu.”

⁶“Usange mukuru wako, mwana wa ŵanyoko ŵako, panji mwana wako mwanarume panji mwana wako mwanakazi panji muwoli wako wakutemweka, panji mubwezi wako, uyo ukumutemwa wakukupusika mwachibisibisi pakuyowoya kuti, ‘Tiyeni tirondezge na kusopa ŵachiuta ŵanyakhe’, ŵeneawo nanga mbasekuru ŵinu kuti ŵakaŵamanya chara,

⁷ŵachiuta ŵa ŵanthu awo ŵamuzingirizgani imwe, panji wa ŵanthu awo ŵali pafupi namwe panji awo ŵali kutali namwe.

⁸Ureke kukopeka na iyo panji kupulikira ivyo wakuyowoya. Ureke kuŵa na chitima na iyo panji kumureka kuŵa wamoyo nesi kumuvikirira.

⁹Munthu wa ntheura wakwenera kukomeka ndipo iwe ndiwe wambe, pamanyuma ŵanthu wose.

¹⁰Pakumukoma, mumudinye na mawe pakuti wakhumbanga kumupatuskani kwa FUMU, Chiuta winu uyo wakamufumyani mu charu cha Eguputo uko mukaŵa ŵazga.

¹¹Ndipo ŵaIsraele wose kuti ŵapulike ichi na kopa ndipo na yumoza mukati mwinu ŵati ŵachiteso uheni wa ntheura chara.”

¹²“Usange mwamkupulika kuti chikuyowoyeka mu misumba iyo FUMU, Chiuta winu wakamupani kuti mukharengemo,

¹³kuti ŵanthu ŵanji ŵawakawaka ŵa fuko linu ŵakupuruska ŵanthu ŵa mu misumba yawo pakuyowoya kuti, ‘Tiyeni tirondezge na kusopa ŵachiuta ŵanyakhe awo imwe mundaŵamanyepo na kale,

¹⁴ntheura mufumbisiske na kupenjiska mu msumba, ndipo usange mwasanga kuti ndi unenesko ndipo mwapanikizga kuti ndi chinthu cha ukazuzi icho chikuchitika mukati mwinu,

¹⁵muŵakome nadi ŵanthu ŵa msumba ura na nkhondo na kuŵamara petu. Mukome na nkhondo wose awo ŵali mu msumba ura ndiposo na viŵeto vyakhe.

¹⁶Vinthu vyose vya ŵanthu ivyo mwapoka vya mu msumba ura ivyo mwapoka, muviwunjike pakatikati pa baraza la msumba kuŵa nga ndi sembe yakocha pa moto kwa FUMU, Chiuta winu. Msumba ura ukwenera kukhara ntheura wakubwangandulika muyirayira kwambula kuwuzengaso.

¹⁷Mureke kusungilira chilichose icho chapimikira kuparanyika mwakuti FUMU yiwereko ku ukari wakhe wakofya na kuŵa na chiwuravi kwa imwe. Yiŵe na chiwuravi kwa imwe na kumwandaniskani nga ndi umo yikarapira ku ŵasekuru ŵinu,

¹⁸FUMU yamkuchita vyose ivi para mwamkupulikira FUMU, Chiuta winu pakusunga marango ghakhe ghose agho nkhumupani muhanya uno na kuchita icho nchiweme panthazi pa iyo.’ ”