Read new_tumbuka_bible Marango gha Chiŵiri 16 Bible Online

Marango gha Chiŵiri 16 - new_tumbuka_bible bible

Marango gha Chiŵiri 16

¹“Muchindikenge FUMU, Chiuta winu pakuŵa na chiphikiro cha Paska pa mwezi wa Abibu, chifukwa pa usiku unyakhe wa mwezi weneuwu ndipo FUMU yikamufumyani mu Eguputo.

²Muperekenge sembe ya chiphikiro cha Paska kwa FUMU, Chiuta winu pakukoma mberere na mbuzi panji ng'ombe pa malo apo yiti yisankhenge kuŵa chikhazi chakusoperako zina lakhe.

³Mureke kurya chiphikiro ichi pamoza na chingwa cha chirungo pakuti pa mazuŵa ghankhonde na ghaŵiri mukwenera kurya chiphikiro pamoza na chingwa chambula chirungo icho ncha visuzgo chifukwa mukafuma mu Eguputo mwa luŵiro. Ntheura mazuŵa ghose gha umoyo mukumbukenge zuŵa ilo mukafumiramo mu charu cha Eguputo.

⁴Pa mazuŵa ghankhonde na ghaŵiri, pareke kuwonekamo chirungo mu zinyumba zinu mu charu chinu chose, ndipo nyama ya sembe iyo mwakoma na mise pa zuŵa lakudanga yireke kukharako mpaka na machero na mulenje.

⁵“Mureke kukomera chiŵeto cha Paska mu muzi uliwose uwo FUMU, Chiuta winu wakumupani,

⁶kweni mukakomerenge, pa malo agho FUMU, Chiuta winu wamkusankha kuŵa chikhazi chakusoperako zina lakhe. Pa gheneagho ndipo mukakomerenge chiŵeto cha Paska pa nyengo yamise para dazi likunjira, pa nyengo iyo mukafumiranga mu Eguputo.

⁷Mukawoche nyama ya Paska iyo ndipo mukaryere pa malo agho FUMU Chiuta wasankha. Na mulenje machero ghakhe ndipo mukawerenge ku misasa yinu.

⁸Pa mazuŵa ghankhonde na limoza mukaryenge chingwa chambula chirungo, kweni pa zuŵa la chinkhonde na chiŵiri mukawunganenge pamoza kuti mupemphere kwa FUMU ndipo mureke kuya kachita mlimo pa zuŵa ili.”

⁹“Mukapendenge masabata ghankhonde na ghaŵiri kwamba pa nyengo iyo mukwambira kuvuna tirigu.

¹⁰Ntheura mukaŵe na chiphikiro cha maSabata kwa FUMU, Chiuta winu pakwiza na vyawanangwa vyinu ivyo FUMU, Chiuta winu wamutumbikani navyo.

¹¹Ndipo mukaŵe ŵakukondwa panthazi pa FUMU, Chiuta winu, iwe pamoza na ŵana ŵako ŵanarume na mwanakazi, ŵateŵeti ŵako ŵanarume na ŵanakazi, ŵaLevi awo ŵakukhara mu mizi yinu, ŵalendo, ŵana ŵalanda na vyokoro ivyo vikukhara mukati mwinu, ku malo uko FUMU, Chiuta winu wati wasankhe kuŵa chikhazi chakusoperako zina lakhe.

¹²Mukumbukenge kuti imwe namwe mukaŵa ŵazga ku Eguputo. Ntheura muchitenge marango agha.”

¹³“Para mwakorora vuna yinu na para mwakama mpheska zinu, mukaŵenge na chiphikiro cha misasa pa mazuŵa ghankhonde na ghaŵiri.

¹⁴Ndipo mukaŵe ŵakukondwa panthazi pa FUMU, Chiuta winu, iwe pamoza na ŵana ŵako ŵanarume na mwanakazi, ŵateŵeti ŵako ŵanarume na ŵanakazi, ŵaLevi awo ŵakukhara mu mizi yinu, ŵalendo, ŵana ŵalanda na vyokoro ivyo vikukhara mu mizi yinu.

¹⁵Pa mazuŵa ghankhonde na ghaŵiri mukaŵenge na chiphikiro icho kwa FUMU, Chiuta winu ku malo agho FUMU yiti yisankhe. Pakuti FUMU, Chiuta winu wati wamutumbikani mu vuna yinu yose na mu milimo yinu yose iyo mukuchita mwakuti mukondwerenge mose pamoza.”

¹⁶“Katatu mu chirimika chilichose, ŵanarume wose ŵakizenge panthazi pa FUMU, Chiuta winu ku malo agho iyo wati wasankhe. Ŵakizenge pa chiphikiro cha chingwa chambula chirungo, pa chiphikiro cha maSabata na pa chiphikiro cha misasa. Paŵavye munthu wize panthazi pa FUMU kwambula kanthu kakuyeghako.

¹⁷Waliyose wa imwe wakizenge na chawanangwa kwakuyana na umo FUMU, Chiuta winu wamutumbikira.”

¹⁸“Mwimike ŵeruzgi na ŵarongozgi mu mizi yinu yose FUMU, Chiuta winu wamupani kwakuyana na mafuko ghinu ghose ndipo ŵeruzgenge ŵanthu mu urunji.

¹⁹Mureke kubendezga mrandu pakweruzga nanga nkhuŵa wakutemwera. Mureke kupoka vimbundi chifukwa vimbundi vikuburumutizga maso gha ŵavinjeru na kwananga mrandu wa ŵarunji.

²⁰Urunji pera ndiwo murondezgenge mwakuti muŵe ŵamoyo na kupoka charu icho FUMU, Chiuta winu wakumupani.”

²¹“Mungapandanga khuni lirilose kurwande kwa jochero Ashera kuŵa na jochero la FUMU, Chiuta winu ilo muti muzengenge.

²²Ndipo mureke kwimika mizati ya mawe kuti musoperengemo ŵachiuta ngoza. Vyeneivi FUMU yikuvitinkha.”