Read new_tumbuka_bible Marango gha Chiŵiri 17 Bible Online

Marango gha Chiŵiri 17 - new_tumbuka_bible bible

Marango gha Chiŵiri 17

¹“Muti mupereke ng'ombe panji mberere iyo yili na kalema panji kaheni kanyakhe kalikose kuŵa sembe kwa FUMU, Chiuta winu chara pakuti cha ntheura mbukazuzi kwa FUMU.”

²“Usange kukusangika mwanarume panji mwanakazi mukati mwinu mu mizi yinu iyo FUMU, Chiuta winu wali kamupani kuti wakuchita icho nchiheni pakuswa phangano lakhe,

³ndipo wakuruta kuya kateŵetera ŵachiuta ŵanyakhe na kuŵasopa manyi ndi chiuta wa dazi, panji wa mwezi, panji wa nyenyezi za mlengalenga ŵeneawo ndili kumukanizgani,

⁴ndipo chamanyikwa ichi, mufumbiske na phamphu. Usange ndi unenesko nadi kuti ukazuzi wa ntheura wachitika mu ŵaIsraele,

⁵mumutore mwanarume panji mwanakazi uyo wachita chinthu cha ukazuzi ichi mu msumba winu na kwiza nayo kuwaro kwa chipata ndipo mumudinye na mawe mpaka wafwe.

⁶Ndipouli wakomeke usange pali ŵakaboni ŵaŵiri panji ŵatatu, wareke kukomeka usange pali ukaboni yumoza pera.

⁷Ŵakaboni ndiwo ŵadange kumudina na mawe pakumukoma, pamanyuma ndipo munthu waliyose wamudinyenge. Mwa ntheura muti muwuskengemo uheni uliwose mukati mwinu.”

⁸“Usange pali mrandu mu mizi yinu uwo ngunonono pakweruzga manyi ngwa kukoma, panji wakulimbanalimbana pa katundu, pa mphango panji wakupwetekana mukizenge nawo ku malo gha kupempherapo agho FUMU, Chiuta winu wati wasankhe,

⁹para mwiza nayo, mukayipereke ku ŵasofi awo mbaLevi na kwa mweruzgi uyo wali na mazaza pa mazuŵa agho mwamkufumbako ndipo ŵamkupereka weruzgi wa mrandu uwo.

¹⁰Usange ŵeruzga, imwe muchite nga ndi umo ŵadumulira ku malo agho FUMU yiti wasankhe. Mukachitenge vyose ivyo wamuphalirani kuti muchitenge.

¹¹Mungachitenge kwakuyana na udumuliro wawo na urongozgi wawo. Mureke kupatukako ku udumuliro wawo uwo ŵamupani pakuzgokera uku na uku.

¹²Munthu waliyose uyo wati wareke kupulikira udumuliro wa musofi uyo wakuteŵetera panthazi pa FUMU, Chiuta winu mweruzgi, munthu uyo wakomeke. Ntheura ndimo muti muwuskirengemo uheni mukati mwinu.

¹³Ntheura ŵanthu ŵanandi ŵati ŵapulike ndipo wopenge ndipo paŵavyenge na yumoza uyo wati wachite chinthu cha ntheura.”

¹⁴“Para mwakafika ku charu icho FUMU, Chiuta winu wati wamupani ndipo mwachipoka kuŵa chinu na kukhara mwenemumo, usange mwamkukhumba kuti muŵe na karonga nga ndi umo ghaliri mafuko agho ghazingirizga imwe.

¹⁵Mukawoneseske kuti karonga uyo mwamkumwimika kuwusa imwe wakaŵe mweneuyo FUMU, Chiuta winu wamusankha, wakafumire mu fuko linu. Mureke kwimika uyo ndi mulendo mweneuyo kuti ngwa fuko la ine chara.

¹⁶Karonga uyo wareke kwiza kaŵa na mahachi ghanandi chara panji kutuma ŵanthu ku Eguputo kuya kagula mahachi ghanandi, pakuti FUMU yayowoya kwa imwe kuti, ‘Mureke kuwereraso kwenekura.’

¹⁷Wizakareke kutora ŵanakazi ŵanandi mzire mtima wakhe upuruskike nesi kuŵa na chuma chinandi cha siliva na cha golide.”

¹⁸“Para karonga wakhara pa chizumbe chakhe cha ufumu, wizakalembe mu buku lakhe na lakhe marango gha Chiuta kufuma mu Buku la Marango ilo likusungika na ŵasofi ŵa mbumba ya Levi.

¹⁹Buku ili liŵenge na iyo kuti wasambirengemo mazuŵa ghose gha umoyo wakhe mwakuti wamanye kopa FUMU, Chiuta wakhe na kupulikira vyose ivyo wali kulangula mu marango ghakhe.

²⁰Para wachitenge ntheura, wati wamanyenge kuti iyo ndi muweme kuruska ŵaIsraele ŵanyakhe chara ndipo wati wapatulikeko ku dango la FUMU pakuzgokera uku na uku. Ntheura iyo pamoza na ŵa mphapu yakhe ŵati wawuskenge charu cha Israele virimika vinandi.”