Read new_tumbuka_bible Marango gha Chiŵiri 18 Bible Online

Marango gha Chiŵiri 18 - new_tumbuka_bible bible

Marango gha Chiŵiri 18

¹“Fuko lose la usofi la ŵaLevi lingapokangako chiharo cha charu pamoza na ŵaIsraele wose. Iwo ŵati ŵaryenge sembe yakocha kwa FUMU na ivyo ŵanthu ŵakupereka kwa iwo.

²Fuko ili kuti liŵenge na chiharo cha charu nga ndi umo ghati ghaŵirenge mafuko gha ŵabali wawo ndi FUMU iyomwene nga ndi umo yili kupanganira kwa iwo.”

³“Phande la ŵasofi kufuma ku ŵanthu awo ŵakupereka ng'ombe, panji mberere kuŵa sembe ndi iyi, mukhono nyama ya njegheyeghe ziŵiri na chifu.

⁴Muŵapengeso vuna yakudanga kucha ya tirigu, ya vinyo, ya mafuta na ya weya wakudanga kusengeka wa mberere na mbuzi zinu.

⁵Pakuti FUMU, Chiuta winu wali kuŵasankha ŵaLevi mukati mu mafuko ghinu ghose kuti iwo ndiwo ŵamuteŵeterenge pa mlimo wa usofi nyengo zose.”

⁶“Usange muLevi wakufumamo mu muzi winu uliwose uwo wakharangamo mu Israele uko wakharanga, ndipo wiza uko wakukhumba, ku malo agho FUMU yasankha,

⁷kwenekura wateŵetere FUMU, Chiuta wakhe nga ndi musofi ŵanyakhe ŵa kwenekura.

⁸Wati waŵenge na phande la chakurya chakuyana waka na cha ŵanyakhe, nangauli wali na ndarama chifukwa cha kuguliska katundu wa ŵawiske.”

⁹“Para mwaya kanjira mu charu icho FUMU, Chiuta winu wakumupani, mureke kuya katora maluso gha ukazuzi gha ŵamitundu ŵa kwenekura.

¹⁰Pareke kuya kasangika munthu mukati mwinu uyo wakupereka mwana wakhe mwanarume panji mwanakazi kuŵa sembe yakocha pa moto kwa FUMU panji wakuroska, wamaula, fwiti,

¹¹wa vinthumwa, muwukwi, wamayere ndiposo na uyo wakufumbilira ku mizimu ya ŵakufwa.

¹²Yose uyo wakuchita vinthu ivi ndi mukazuzi panthazi pa FUMU. Ndipo chifukwa cha ukazuzi ntheura FUMU, Chiuta winu wakuchimbizga ŵamitundu panthazi pinu.

¹³Imwe muŵenge ŵambula kafukwa panthazi pa FUMU, Chiuta winu.”

¹⁴“Mafuko agha gheneagho muti muharenge charu chawo ghakupulikira ŵamaula na ŵaroski. Kweni imwe, FUMU Chiuta winu wandamuzomerezgani kuti muchitenge vinthu vya ntheura.

¹⁵FUMU, Chiuta winu wati wamwimikirani nchimi yakuŵa nga ndine kufumira mu ŵabali ŵinu ndipo mukwenera kwiza kayipulikira.

¹⁶Pakuti ichi ndicho mukaromba FUMU, Chiuta winu para mukawungana pa Phiri la Sinayi kuti, ‘Tireke kupulikaso FUMU, Chiuta withu wakuyowoya kwa ise nanga nkhuwonaso moto ukuru uwu, mzire tifwe.’ ”

¹⁷Ndipo FUMU yikuti kwa ine, “Vyose ivyo ŵayowoya ŵanthu aŵa ndi viweme.

¹⁸Nditi ndiŵimikire nchimi yakuŵa nga ndi iwe kufumira mwa iwo, ndipo nditi ndimuphalire uyo wakwenera kuyowoya ndipo wati waŵaphalire vyose ivyo nkhumulangula.

¹⁹Usange munthu yose uyo wati warekenge kupulikira mazgu agho nchimi iyo yiti yiyowoyenge mu zina lane, ine ndekha nditi ndimweruzge.

²⁰Kweni nchimi yose iyo yikuyowoya mazgu mu zina lane ghene agho ndindayiphalire kuti yiyowoye, yikwenera kukomeka, ntheura pera nchimi iyo yikuyowoya mazgu ghane mu zina la ŵachiuta ŵanyakhe.”

²¹Ndipo nyengo zinyakhe mungafumba kuti, Kasi munthu wangamanya uli kuti mazgu agha kuti ndi FUMU iyo yili kuyowoya chara.

²²Muti mumanyenge ntheura, usange icho nchimi yayowoya mu zina la FUMU kuti chikuchitika chara, mazgu gha ntheura kuti ndi agho FUMU yili kuyowoya chara. Nchimi yikayowoya mazgu agho mwa iyo yekha. Nchimi ya ntheura mureke kuyiwopa.