Read new_tumbuka_bible Marango gha Chiŵiri 19 Bible Online

Marango gha Chiŵiri 19 - new_tumbuka_bible bible

Marango gha Chiŵiri 19

¹“Para FUMU Chiuta winu waŵamara mafuko agho charu chawo wakumupani ndipo imwe mwati mwaŵachimbizgamo na kukhara mu misumba yawo na mu zinyumba zawo,

²mukajipatulire misumba yitatu mukati mu charu icho FUMU, Chiuta winu wakumupani kuŵa chinu.

³Mukalimenge misewu ndipo charu icho FUMU, Chiuta winu wakumupani mukachigaŵe patatu, mwakuti munthu waliyose uyo wakukoma munyakhe mwangozi wachimbilirenge mwenemumo.

⁴Ili ndi dango la uyo wakoma munthu kwambula kumanya na kwambula kuti pali chimphindikwa ndipo wakukhumba kuponoska umoyo wakhe pakuchimbilira ku msumba wakuphokweramo.

⁵Mwa chiyerezgero, munthu wangaruta ku thondo pamoza na munyakhe kuti wakateme makuni. Ntheura apo wakudumula khuni ndipo mbavi yakhulika na kuwira pa munyakhe yura ndipo yamutema na kufwa. Munthu uyo wanguŵa na mbavi wangachimbilira ku umoza wa misumba yakuphokweramo iyi na kuponoska umoyo wakhe.

⁶Usange pangaŵa msumba umoza wakuphokweramo mtunda utiŵenge utali ndipo munthu uyo wakukhumba kuwezgera nduzga chifukwa mubali wakhe pa uyo wamukoma wangasanga chipusu kumulonda na mtima wakutukutwa na kumusanga wakuchimbira yura na kumukoma nanga kuti wakwenera kukomeka chara pakuti mbembe chara.

⁷Ichi ndicho chifukwa nkhumulangulani kuti mujipatulire misumba yitatu.”

⁸“Usange FUMU, Chiuta winu wakuzgirako mpaka zinu nga ndi umo wakapanganirana na ŵasekuru ŵinu na kamupani charu chose icho wakapangana kuŵapa,

⁹mwizakajipatulireso misumba yinyakhe yitatu. Fumu yizamkukuzga mpaka zinu para mwamkuchita vyose ivyo nkhumulangulirani uko, nkhutemwa FUMU, Chiuta winu na kwenda mu nthowa zakhe nyengo zose.

¹⁰Mukachite cheneichi kuti ndopa zambula mrandu zireke kuthiskika mu charu icho FUMU, Chiuta winu wali kumupani kuŵa chinu. Mwa ntheura mrandu wa kuthiska ndopa wamkuŵa pa imwe chara.”

¹¹“Kweni usange munthu yunji wakutinkha munyakhe ndipo wamukhazga pa nthowa, wamuwukira na kumupweteka ndipo munthu yura wafwa, ndipo iyo wakuchimbilira ku umoza wa misumba yakuphokwerapo yeneiyi,

¹²mbwenu ŵararaŵarara ŵa ku msumba wakhe ŵati ŵarute kuya kamutora ku msumba wakuphokwerapo ura ndipo wati wamupereke kwa wakuwezgera nduzga kuti nayo wakomeke,

¹³kumufwira chitima kweni muwuskeko muIsraele yose uyo wakukoma munthu munyakhe kwambula mrandu. Mwa ntheura kuti kumuŵiraninge makora.”

¹⁴“Mureke kusezga chimanyikwiro cha mphaka za ŵazengezgani ŵinu izo ŵasekuru ŵinu ŵakagaŵa kale mu charu icho FUMU, Chiuta winu wakumupani.”

¹⁵“Kaboni yumoza kuti ngwa kukwanira kuŵa wakupanikizgira munthu pa mrandu pa uheni uwo wachita chara, kweni mrandu uliwose ukwenera kupanizgika na ŵakaboni ŵaŵiri panji ŵatatu.

¹⁶Usange kaboni wa utesi wakumupacha munthu pa uheni uwo wachita,

¹⁷wose ŵaŵiri wuwo panthazi pa FUMU, ŵasofi na pa weruzgi awo ŵali na mazaza pa nyengo iyo.

¹⁸Ŵeruzgi wafumbisiske za mrandu wakhe ndipo usange kaboni ndi mutesi, watundura waka munyakhe.

¹⁹Mukwenera kumuchitira icho iyo watenge wamuchitire munyakhe. Mwa ntheura muti muwuskemo uheni mukati mwinu.

²⁰Para ŵanthu ŵanyakhe ŵapulika ŵati wopenge ndipo uheni wa ntheura kuti wachitengeso chara mukati mwinu.

²¹Mureke kuŵa na chitima na munthu wa ntheura. Umoyo ulifyane na umoyo, jiso na jiso, jino na jino, woko na woko, ndipo lundi na lundi.”