Read new_tumbuka_bible Marango gha Chiŵiri 2 Bible Online

Marango gha Chiŵiri 2 - new_tumbuka_bible bible

Marango gha Chiŵiri 2

¹Ntheura tikawerera na kurazga ku mapopa ku nthowa ya ku Nyanja ya Matete nga ndi umo FUMU yikatilangulira. Ndipo kwa mazuŵa ghanandi, tikazingiliranga Phiri la Edomu.

²Ntheura FUMU yikati kwa ine,

³“Mwazingirira Phiri la Edomu nyengo yitali, ntheura sono zgokani murute ku dera la ku mpoto.

⁴Uŵaphalire ŵanthu malangulo agha, ‘Muli pafupi kuporota mu charu cha mapiri cha Edomu cheneicho ncha ŵabali ŵinu, ŵeneawo ndi mphapu ya Esau. Iwo ŵati ŵamopaninge, kweni muchenjere.

⁵Mureke kwamba nkhondo na iwo chifukwa nditi ndimupaninge charu chawo chara nanga nkhachoko apo pakandenge lundi linu, pakuti charu cha mapiri cha Edomu ndamupa Esau kuti chiŵe chakhe.

⁶Chakurya na maji ghakumwa mukagulenge kufuma kwa iwo.’

⁷“Manyani ichi kuti FUMU, Chiuta winu wamutumbikani pa chilichose icho mwachita. Ndiyo wanguŵa mulinda winu mu mapopa agha ghakuru. Ndipo mu virimika 40, FUMU, Chiuta winu wanguŵa namwe, mulije kusoŵerwa kanthu.

⁸“Ntheura tikaporota mu charu cha mapiri gha Edomu cheneicho ncha ŵabali ŵithu ŵeneawo ndi mphapu ya Esau. Tikareka nthowa ya Araba iyo yikufuma ku misumba ya Elati na Eziyoni Gebere, na kutora nthowa ya mapopa gha Mowabu.

⁹Penepapo FUMU yikati kwa ine, ‘Mureke kuŵasuzga ŵaMowabu ŵeneawo ndi mphapu ya Loti, nanga nkhwamba nkhondo na iwo pakuti nditi ndimupaniko charu chawo chara kuŵa chiharo chinu. Ndapereka msumba wa Ari kwa ŵaMowabu kuŵa chiharo chawo.’ ”

¹⁰(Kale ŵaEmimu ŵakakharanga mu msumba wa Ari. Ŵanthu aŵa ŵakaŵa ŵakuruŵakuru ndiposo ŵanandi. Ŵakaŵa ŵataliŵatali nga ndi ŵaAnaki.

¹¹Kwakuyana waka nga ndi ŵaAnaki, ŵanthu ŵa ŵakachemekanga kuti ŵaRefayimu. Kweni ŵaMowabu ŵakaŵachemanga kuti, ŵaEmimu.

¹²Kale chomene mu charu cha mapiri cha Edomu mukakharanga ŵanthu ŵanji wakuchemeka ŵaHoro. Kweni ŵa mphapu ya Esau ndiwo ŵakaŵafumyamo kuŵamara petu ndipo ŵakamba kukhara mu malo ghawo nga ndi umo ŵaIsraele ŵakachitira na charu icho FUMU yikaŵapa.)

¹³FUMU yikati, “Wukani sono, ndipo yambukani mronga wa Zeredi. Ntheura tikambuka mronga ura wa Zeredi.

¹⁴Ndipo nyengo yose iyo tikenda kufuma mu Kadeshi Baraneya kuya kafika pa nyengo iyo tikambukiranga mronga wa Zeredi yikakwana virimika 38 ivi vikachitika mpaka miwiro yose iyo yikarwanga nkhondo nga ndi umo FUMU yikaŵarapizgira yikamara petu.

¹⁵Pakuti ndi woko la FUMU likimikana nawo, kuŵakomera mu misasa ŵakasuka ŵakamara tetete.

¹⁶“Sono ŵakati ŵamara kufwa ŵanthu ŵasilikari ŵara,

¹⁷FUMU yikati kwa ine,

¹⁸‘Muhanya uno muporote mu charu cha Mowabu pakwendera nthowa ya msumba wa Ari.

¹⁹Para mwafika pafupi na charu cha ŵaAmoni awo ndi mphapu ya Loti, mureke kuŵasuzga nanga nkhwamba nkhondo na iwo, pakuti nditi ndimupaningiko nanga nchigaŵa cha charu chawo chara chiharo chinu chifukwa ichi ndapereka kwa ŵaAmoni, kuŵa chiharo chawo.’ ”

²⁰(Kale chomene, charu ichi nacho chikaŵa cha ŵaRefayimu ŵeneawo ŵakakharanga mwenemumo, kweni ŵaAmoni ŵakaŵachemanga kuti ŵaZamumimu.

²¹Viŵanthu vya mtundu wa Amoni vikaŵa vya nkhongono, vinandi ndiposo vitali nga mba ŵaAnaki. FUMU yikaŵamara ŵaRefayimu kuti ŵaAmoni ŵapoke charu chawo na kukharamo.

²²FUMU yikachitira ntheura pera ŵa mphapu ya Esau ŵeneawo wakakharanga mu charu cha mapiri cha Edomu. FUMU yikaŵamara ŵaHoro petu ndipo charu chawo yikaŵapa ŵa mphapu ya Esau kuti ŵakhare mwenemumo ndipo ŵachali kukhara mwenemumu mpaka sono.

²³Kwakuyana na ŵaAvimu ŵeneawo ŵakakharanga mu vikaya ivyo vikatandazgika mu mphepete mwa nyanja ya Meditereniya na kuya kafika ku Gaza, ŵaKafitorimu ŵakiza kufuma ku Kafitoro ndipo ŵakakoma wose na kukhara mu malo gha ŵaAvimu.)

²⁴Tikati taporota charu cha Mowabu, FUMU yikati kwa ise, “Sono wukani, yambukani mronga wa Arinoni. Ndipo nkhupereka mu mawoko ghinu Sihoni muAmori, karonga wa msumba wa Heshiboni, pamoza na charu chakhe. Mwambeko kutora charu chakhe mu kurwa nayo nkhondo.

²⁵Kwamba pa zuŵa ili nditi ndipereke chitenthe na wofi mu mitundu iyo yili mu charu chose cha pasi kuti yimopani imwe pakupulika lumbiri lwinu. Ŵanthu wose ŵati ŵatentheme na kuŵa mu urwirwi chifukwa chakopa imwe.”

²⁶“Ntheura nkhatuma nthumi kufuma mu mapopa gha Kedemoti kuruta kwa Sihoni, karonga wa ku Heshiboni na mazgu gha mutende kuti,

²⁷‘Mundizomerezge kuti ndiporote mu charu chinu. Nditi ndendenge mu msewu pera ndipo kuti nditi ndipatukire uku na uku chara.

²⁸Mundiguliskeko na ndarama chakurya icho ndiryenge ndiposo na maji agho ndimwenge. Mundizomerezge kuti ndiporotemo waka pakwenda pasi.

²⁹Ŵa mphapu ya Esau awo ŵakukhara mu charu cha mapiri cha Edomu na ŵaMowabu awo ŵakakharanga mu Ari mukatizomerezga kuti tiporote mu vyaru vyawo tisuke timbuke mronga wa Yorodani na kuya kanjira mu charu icho FUMU, Chiuta withu wakutipa.’

³⁰“Kweni Sihoni, karonga wa msumba wa Heshiboni wakatizomerezga chara kuti tiporotemo, pakuti FUMU, Chiuta winu wakanonofya mtima wakhe ndipo ukati waka gwa, mwakuti wamupereke mu mawoko ghinu nga ndi umo wachitira muhanya uno.

³¹“FUMU yikati kwa ine, ‘Wona, ndambako kupereka kwa imwe Sihoni pamoza na charu chakhe. Ntheura sono yambaningiko kutora charu chakhe kuŵa charu chinu.’

³²Ntheura Sihoni pamoza na ŵasilikari ŵakhe ŵakiza kuti ŵarwe nase nkhondo mu msumba wa Yahazi,

³³ndipo FUMU, Chiuta withu wakamupereka mu mawoko ghithu. Tikamukoma iyo na ŵana ŵakhe pamoza na ŵasilikari ŵakhe.

³⁴Pa nyengo yeneyira tikapoka na kubwangandula msumba uliwose na kukoma mwanarume, mwanakazi na mwana waliyose kwambula kurekapo na yumoza wa moyo.

³⁵Kweni viŵeto pamoza na ivyo tikaskogha mu misumba tikayegha kuŵa vyithu.

³⁶FUMU, Chiuta withu wakapereka msumba uliwose kwa ise kufuma ku msumba wa Aroyere weneuwo uli mu mphepete mwa mronga wa Arinoni, na kuruta ku mizi iyo yili mu mphepete mwa mronga wenewura kuya kafika ku Gileyadi ndipo pakaŵavye msumba nanga ngumoza uwo ukatitonda.

³⁷Kweni mu charu cha ŵaAmoni kuti tikafikako chara, nanga ndi ku malo agho ghali mu mphepete mwa mronga wa Yaboko, nesi mu misumba ya mu mapiri uko FUMU, Chiuta withu wakatikanizga kuyako.