Read new_tumbuka_bible Marango gha Chiŵiri 20 Bible Online

Marango gha Chiŵiri 20 - new_tumbuka_bible bible

Marango gha Chiŵiri 20

¹“Para mukuruta kuya karwa nkhondo na ŵarwani ŵinu, ndipo para mwawona mahachi, magareta na ŵasilikari ŵanandi kuruska imwe mwaŵene, mukareke kopa chifukwa FUMU, Chiuta winu mweneuyo wakamufumyani mu charu cha Eguputo wali namwe.

²Para mundayambe kurwa nkhondo, musofi wize panthazi na kuyowoya na ŵasilikari kuti,

³‘Pulikani, imwe ŵaIsraele: Muhanya uno muti mwambe kurwa nkhondo na ŵarwani ŵinu. Ntheura mureke kuropwa mu mitima yinu, nanga nkhuŵa na wofi nesi kutenthema chifukwa cha iwo.

⁴Pakuti FUMU, Chiuta winu ndiyo wakwenda namwe kumurwerani pakulimbana na ŵarwani ŵinu kuti imwe muruske.’ ”

⁵Penepapo ŵarara ŵa ŵasilikari ŵati ŵayowoye kuti, “Kasi walipo pano uyo wazenga waka nyumba yakhe kweni wandayipatule? Usange walipo, wawerere ku nyumba, mzire wakafwe ku thondo ndipo munthu munyakhe ndiyo wamupatulire nyumba yakhe.

⁶Kasi walipo pano uyo wali kupanda mpheska mu munda wakhe ndipo wandaryepo vipambi vyakhe? Usange walipo, wawerere ku nyumba mzire wakafwe waka ku nkhondo na kurekera munthu munyakhe kuti watore munda wakhe na kuryamo vipambi vyakhe.

⁷Kasi walipo pano uyo wali kujalira mwanakazi kweni wandamutore? Usange walipo, wawerere ku nyumba mzire wakafwe ku nkhondo na kupereka mwaŵi ku munthu munyakhe kuti ndiyo wamutolere mwanakazi uyo.”

⁸“Penepapo ŵarara ŵasilikari ŵara ŵati ŵayowoyeso ku ŵasilikari kuti, ‘Kasi walipo pano uyo wali na wofi na mtima wakuropwa? Usange walipo wawerere ku nyumba mzire wagongoweske ŵanyakhe.’

⁹Para ŵarara ŵasilikari ŵamara kuyowoya ku ŵa nkhondo, ŵimike ŵarongozgi ŵakurongozga ŵasilikari.”

¹⁰“Para mwafika na msumba weneuwo mwamkurwa nawo mudange kutumako nthumi na kufumba usange ŵakukhumba nkhondo panji mutende.

¹¹Ntheura usange ŵakukhumba mutende na kumujulirani vipata vyawo, ŵanthu wose ŵa msumba uwo ŵati ŵaŵenge ŵazga ŵinu ŵakumuteŵeterani.

¹²Usange ŵanthu ŵa msumba ura ŵakukhumba mutende chara, kweni nkhondo, muwuzingirizge msumba ura na ŵasilikari ŵinu.

¹³Para FUMU, Chiuta winu wakuŵapereka ŵanthu ŵa msumba ura mu mawoko ghinu, mukome ŵanarume wose.

¹⁴Kweni ŵanakazi, ŵana, ng'ombe na vyose vya mu msumba, mukwenera kuvitora nga vinthu vya kuphanga ku nkhondo kuŵa vyinu. Ndipo mungavigwiriska nchito vinthu ivyo mwapoka ku ŵarwani pakuti FUMU, Chiuta winu wamupani.

¹⁵Ntheura umo ndimo mukachitirenge na misumba yose iyo yili kutali namwe yeneiyo kuti ndi misumba ya mafuko agho ghali pafupi namwe chara.”

¹⁶“Kweni para mwakapoka misumba iyo yili mu charu icho FUMU Chiuta wakumupani kuŵa chinu, mukareke kusidamo chilichose chamoyo.

¹⁷Mukaŵamare petu wose ŵaHiti, ŵaAmori, ŵaKanani, ŵaPerezi, ŵaHivi na ŵaYebusi nga ndi umo FUMU, Chiuta winu wamulangulirani.

¹⁸Muŵamare wose aŵa mwakuti ŵareke kumusambizgani kuti murondezge maukazuzi ghawo agho ŵakuchita para ŵakusopa ŵachiuta ŵawo ndipo imwe munangire FUMU, Chiuta winu.”

¹⁹“Para ŵawuzinga msumba ura kwa nyengo yitali, pakurwa nkhondo na ŵanthu ŵa msumba, kuti muwutore, mureke kuya kananga makuni ghakhe, pakughatemera pasi na mbavi, pakuti ndigho mwamkurya vipambi vyakhe. Mungaghatemeranga pasi chara. Kasi makuni agho ghali mu thondo nagho mbanthu kuti mughawukire?

²⁰Makuni agho pera gheneagho mukughamanya kuti ngambula kuryako vipambi vyakhe ndigho mughatemenge mwakuti muzengerenge makwerero pa malinga gha msumba uwo mukurwa nawo nkhondo musuke muwutonde.”