Read new_tumbuka_bible Marango gha Chiŵiri 21 Bible Online

Marango gha Chiŵiri 21 - new_tumbuka_bible bible

Marango gha Chiŵiri 21

¹“Usange munthu wasangika kuti wakomeka mu munda mu charu icho FUMU, Chiuta winu wakumupani kuŵa chinu ndipo uyo wamukoma wakumanyikwa chara.

²Ŵarara ŵinu na ŵeruzgi ŵinu ŵarute kuti ŵakapime utali wa mtunda kufuma pa chitanda chira na misumba iyo yili pafupi chomene.

³Ndipo ŵarara ŵa msumba uwo uli pafupi chomene na chitanda chira ŵati ŵatore ng'ombe yanakazi yambula kubabapo yeneiyo yindachitepo nchito nanga nkhuyikakapo pa goliwoli.

⁴Ndipo ŵarara ŵa msumba ŵize na ng'ombe yira ku dambo uko maji ghakwenda, kwenekuko kulije kulimikako nesi kupandikako kalikose. Ntheura kwenekura ku dambo wayikome pakuyiphyora singo.

⁵Ŵasofi ŵeneawo mbaLevi ŵati ŵize panthazi pakuti FUMU, Chiuta winu wali kusankha iwo kuti ŵamuteŵerenge na kupereka vitumbiko mu zina la FUMU ndiposo ŵeruzgenge mirandu ya mbembe na ya kukoma.

⁶Penepapo ŵarara ŵa msumba uwo uli pafupi na chitanda chira ŵati ŵagezere mawoko ghawo pachanya pa ng'ombe iyo ŵakoma pakuyiphyora singo kura ku dambo.

⁷Iwo ŵati ŵayowoye kuti, ‘Ise kuti ndise tikakoma munthu uyu chara nesi kuwona munthu uyo wakamukoma.

⁸Mwe FUMU, gowokerani ŵanthu ŵinu ŵaIsraele ŵeneawo muli kuŵawombola, ndipo mrandu wakukoma munthu wambula kwananga ureke kuŵa pa ŵanthu ŵinu. Penepapo ŵati ŵagowokereke.’

⁹Mwa ntheura ndimo muti muwuskirengemo mrandu wakukoma mu munthu wambula kwananga mukati mwinu para mukuchita icho ncha kunyoroka panthazi pa FUMU.”

¹⁰“Para mwaruta kuya karwa nkhondo na ŵarwani ŵinu ndipo FUMU, Chiuta winu muŵapereke mu mawoko ghinu na kuŵakora ŵamikori ŵinu.

¹¹Usange yumoza wawonamo mwanakazi wakutowa mukati mu ŵazga ŵara wangamutora kuŵa muwoli ŵikhe.

¹²Ipo wize nayo ku nyumba yakhe wamete sisi lakhe na kucheketa njoŵe zakhe.

¹³Wavure vyakuvwara vyakhe vya umikori na kuvwara vinyakhe, ndipo wakhare mu nyumba kuti walire ŵawiske na ŵanyina mwezi wose. Pamanyuma ndipo unjirengemo mwa iyo na kuŵa mufumu wakhe ndipo iyo wati waŵenge muwoli wako.

¹⁴Usange undakondwe nayo, umuzomerezge kuti warute kulikose uko wangakhumba, kweni ureke kumuguliska nesi kumuzgoraso kuŵa muzga pakuti wagonana nayo kale.”

¹⁵“Usange munthu wali na ŵawoli ŵaŵiri, munyakhe wakumutemwa ndipo munyakhe wakumutinkha, kweni wose ŵaŵiri ŵamubabire ŵana ŵanarume, ndipo usange mwana wa uŵere waŵa wa mwanakazi uyo wakumutinkha,

¹⁶sono pa zuŵa la wakugaŵira ŵana ŵakhe chuma chakhe kuŵa chiharo chawo wareke kuzgora mwana wa muwoli wakhe wakutemweka kuti ndiyo waŵe wa uŵere chara kureka wa muwoli wakhe uyo wakumutinkha uyo nadi ndi mwana wakhe wa uŵere kwa iyo.

¹⁷Kweni wazomere kuti ndi mwana wakhe wa uŵere, mwana wa muwoli wakhe wakutinkhika yura, pakumupa kaŵiri pa vyose ivyo wali navyo kuŵa chiharo chakhe. Pakuti uyu ndiyo mwana wakudanga wa nkhongono zakhe, wali na mazaza pa chiharo cha wa uŵere.”

¹⁸“Usange munthu yunji wali na mwana mwanarume uyo ngwa mutafu na wambula kupulikira ŵawiske panji ŵanyina kuti wakuŵapulika chara para ŵakumuchenya.

¹⁹Ŵawiske na ŵanyina wamutore na kuruta nayo ku ŵarara ku chipata cha msumba kuti ŵeruzgike.

²⁰Ŵapapi ŵara ŵati ŵayowoye ku ŵarara ŵa mu msumba kuti, ‘Mwana withu uyu ngwa mutafu na wambula kupulikira pakureka kutipulika para tikumuchenya, ndiposo ndi muryezi na mloŵevu.’

²¹Penepapo ŵanthu wose ŵa msumba ura ŵati ŵamukome pakumudinya na mawe. Ntheura ndimo muti muwuskirengemo uheni mukati mwinu. Ndipo Israele wapulike na kopa.”

²²“Usange munthu yunji wachita uheni ndipo wakwenera kulangika pakumukoma na kupayika thupi lakhe pa khuni.

²³Thupi lakhe lireke kuŵa pa khuni na usiku wose. Mukwenera kumuŵika mu dindi zuŵa leneilo chifukwa munthu yose uyo wapayikika pa khuni ngwa kutembeka kwa Chiuta. Mureke kukazuzga charu chinu icho FUMU, Chiuta winu wakamupani kuŵa chinu.”