Read new_tumbuka_bible Marango gha Chiŵiri 23 Bible Online

Marango gha Chiŵiri 23 - new_tumbuka_bible bible

Marango gha Chiŵiri 23

¹“Mwanarume waliyose uyo mavwaro ghakhe ghaphwanyika panji ghadumulika wanganjiranga chara mu ungano wa FUMU.”

²“Paŵavye mwana waliyose wakubabika mu uleŵe wanjire mu maungano gha ŵanthu ŵa FUMU. Paŵavye na yumoza wa mphapu yakhe wanjire mu ungano wa FUMU kufikira ku muwiro wa khuni wa mphapu yawo.”

³“Paŵavye muAmoni panji mu Mowabu wanjire mu maungano gha ŵanthu ŵa FUMU kwa muyirayira. Paŵavye na yumoza wa mphapu yakhe wanjire mu ungano wa FUMU kufikira ku muwiro wa khuni wa mphapu yawo.

⁴Iwo aŵa ŵakakana kumupani chakurya na maji para mukaŵa mu nthowa kufuma ku Eguputo, ndipo ŵakalemba ganyu Balaamu mwana wa Beyoro kufuma mu msumba wa Petoro mu Mesopotamiya kuti wamutembani.

⁵Kweni FUMU, Chiuta winu kuti wakakhumba kumupulikira Balaamu chara. Mu malo mwakhe FUMU yikazgora nthembo yira kuŵa thumbiko chifukwa FUMU, Chiuta winu wakumutemwani.

⁶Ŵanthu ŵa mafuko agha, mureke kuŵa nawo mu mutende nanga nkhuŵakhumbira uweme, mu mazuŵa ghinu ghose kwa muyirayira.”

⁷“Mureke kumutinkha wa fuko la Edomu pakuti ndi mubali winu. Mureke kuyuzga muEguputo, pakuti imwe mukaŵa ŵalendo mu charu cha kwakhe.

⁸Ŵana awo ŵababika na ŵeneaŵa ŵanganjira mu maungano gha ŵanthu ŵa FUMU kwamba pa muwiro wa chitatu.”

⁹“Para muli mu msasa wa nkhondo kuti mutimbane na ŵarwani ŵinu, mureke kuchita chilichose icho chingamukazuzgani.

¹⁰Usange mwanarume yunji wakazuzgika chifukwa chakuti wangulota na usiku ndipo wajinangira, wafumire kuwaro kwa msasa na kukhara kwenekura kwambula kuwereraso ku msasa.

¹¹Kweni para nyengo yikufika mise, wageze na maji, ndipo para dazi likunjira, wize mu msasa.”

¹²“Muŵenge na malo kuwaro kwa msasa kweneuko mungarutanga kuya kapatuka.

¹³Muyeghenge kakhuni nga nchirwero chakujimira mwakuti mujimirenge khururu para mwapatuka na kuwundira.

¹⁴Pakuti FUMU, Chiuta winu wakwendamo mukati mu msasa winu kuti wamuvikirirani na kuŵapereka ŵarwani ŵinu mu mawoko ghinu. Ntheura msasa winu ukwenera kuŵa wakupatulika mwakuti FUMU yinu yireke kuwona kanthu ka ukazuzi mukati mwinu, mzire wafumemo mwa imwe.”

¹⁵“Usange muzga wachimbira kwa sekuru wakhe ndipo wiza kwa iwe, ureke kumuwezga kuti waruteso kwa sekuru wakhe.

¹⁶Mumureke wakhare mukati mwinu kulikose uko wangakhumba ndipo mu muzi uliwose uwo wangasankha. Mureke kumunyoza.”

¹⁷“Paŵavye muIsraele waliyose manyi ndi mwanarume panji mwanakazi wakujizgora muleŵe mu Nyumba ya Chiuta panji nesi uleŵe wakuchitikika pakati pa ŵanarume pera panji ŵanakazi.

¹⁸Mureke kwiza na vya ŵanangwa vyinu ivyo mwapoka kufuma mu uleŵe wa mtundu uwu mu nyumba ya FUMU ya Chiuta winu kuti mufiske chirapo chinu. Pakuti uleŵe wose uwu mbukazuzi panthazi pa FUMU, Chiuta winu.”

¹⁹“Para wabwerekeska ndarama panji chakurya, panji chilichose ku muIsraele munyako, ureke kumubwereka kuti upokepo chandulo.

²⁰Mungapokapo chandulo pa vyeneivi para mukubwerekeska mulendo kweni muIsraele munyinu chara. Mupulikire dango uli ndipo FUMU, Chiuta winu wati wamutumbikani mu vyose ivyo muti muchitenge mu charu icho mwamkupoka kuŵa chinu.”

²¹“Para ukuchita chirapo kwa FUMU, Chiuta wako, ureke kutondeka kufiska chirapo chako, pakuti FUMU, Chiuta wako wati wakhumbenge nadi kuti upatawule vya chirapo chako ndipo ntheura wamkuchipima kwananga.

²²Kweni usange ukureka kuchita phangano kwa FUMU, Chiuta wako, kuti nkhwananga chara.

²³Icho wayowoya ukwenera kufiska, pakuti wapangana mu wanangwa kwa FUMU, Chiuta wako kuti ufiskenge icho wayowoya.”

²⁴“Para ukwenda mu munda wa mpheska wa munyako ungaryapo vipambi vya mpheska zakhe umo ungakhumbira na kukhuta kweni ureke kuyeghapo vinyakhe pa chisero.

²⁵Para ukwenda mu munda wa tirigu wa munyako ungakwenyurapo mphonje zakhe na kurya, kweni ureke kutora chigeru na kuvuna tirigu uyo wachali kwimilira mu munda wa munyako.”