Read new_tumbuka_bible Marango gha Chiŵiri 24 Bible Online

Marango gha Chiŵiri 24 - new_tumbuka_bible bible

Marango gha Chiŵiri 24

¹“Para mwanarume watora mwanakazi ndipo pamanyuma wakukhumba kumureka mwanakazi yura chifukwa wasangamo kanthu kaheni mwa iyo, wamulembere karata wa chipati na kumupa, ndipo wamufumye mu nyumba yakhe.

²Para mwanakazi uyu waruta kuya katengwaso ku mwanarume munyakhe,

³ndipo usange mwanarume munyakhe wa chiŵiri, nayo wakumupataso, wamulembere karata wa chipata na kumupa ndipo wamufumyemo mu nyumba yakhe. Usange mufumu wakhe wa chiŵiri wakufwa,

⁴penepapo mufumu wakhe uyo wakamutora pakudanga wareke kumutoraso kuŵa muwoli wakhe chifukwa ngwa kukazuzgika. Pakuti kumutoraso, ukuŵa ukazuzi panthazi pa FUMU. Mureke kwiza na uheni wa mtundu uwu mu charu icho FUMU, Chiuta winu wakumupani kuŵa chinu.”

⁵“Para munthu watora sonosono, wareke kuruta ku nkhondo panji nesi kupika mlimo unyakhe uliwose. Iyo wakwenera kukhara waka pa nyumba kwakuyana na chirimika chimoza kuti wafwasenge na muwoli wakhe.

⁶“Paŵavye munthu watore lwara panji mwanasko kuŵa chikhole cha phangano. Kuchita ntheura ndi kukoma chifukwa watora icho wakusangira chakurya kuti waŵe na umoyo.

⁷“Usange muIsraele wiba yumoza wa ŵabali ŵakhe, muIsraele, ndipo wamuzgora muzga panji wamuguliska, iyo wakwenera kukomeka. Ntheura ndimo muti muwuskirengemo uheni wa mtundu uwu mukati mwinu.

⁸“Para nthenda ya vyoni yakora munthu, muchite kwakuyana na vyose ivyo ŵasofi ŵa fuko la Levi ŵati ŵamuphaliraninge kuchita. Nga ndi umo nkhaŵalangulira iwo, ntheura ndimo mukwenera kuchitira.

⁹Mukumbuke icho FUMU, Chiuta winu wakachita kwa Miriyamu pa nthowa para mukizanga kufuma mu Eguputo.

¹⁰“Para wamubwereka munyako kanthu kalikose ureke kuruta ku nyumba yakhe kuya katora chikhole.

¹¹Para waruta, ukimilire kuwaro ndipo munthu uyo wamubwereka wati wize nacho pawaro chinthu icho wati wakupe kuŵa chikhole.

¹²Usange munthu uyu ndi mukavu, ureke kuchisunga kuti chigone na iwe usiku wose.

¹³Para dazi likunjira, umuwezgere chikhole kuti chigone na iyo ndipo iyo wati wakuwonge. Pakuchita ntheura uti upimikenge kuŵa ŵarunji panthazi pa FUMU, Chiuta winu.

¹⁴“Para walemba nchito muteŵeti uyo ndi mukavu na musokwano, ureke kumusunjizga, manyi wangaŵa yumoza wa ŵabali ŵako panji yumoza wa ŵalendo ŵeneawo ŵakukhara mu mizi ya charu chako.

¹⁵Zuŵa na zuŵa para wamara mlimo wakhe umupe njombe yakhe pambere dazi lindanjire, pakuti ndi mukavu ndipo mtima wakhe uli penepapo mzire wakulirire kwa FUMU, Chiuta wako ndipo kwa iwe chizgoke kuŵa kwananga.

¹⁶“Ŵapapi ŵareke kukomeka chifukwa cha kwananga kwa ŵana ŵawo, nanga ndi ŵana ŵareke kukomeka chifukwa cha kwananga kwa ŵapapi ŵawo. Munthu waliyose wakomekenge chifukwa cha kwananga kwakhe na kwakhe.

¹⁷“Ureke kubendezga weruzgi wakunyoroka pa mrandu wa mulendo panji wa mulanda. Ureke kutora chakuvwara cha chokoro kuŵa chikhole.

¹⁸Mukumbuke kuti imwe namwe mukaŵa ŵazga mu Eguputo ndipo FUMU, Chiuta winu wakamuwombolani kufuma kwenekura. Ichi ndicho chifukwa nkhumulangulani kuti muchitirenge ntheura.

¹⁹“Para mukuvuna vyakurya vya mu minda yinu ndipo mwaruwamo mphundwe mu munda, mureke kuwereramo kuya kayitora. Iyi yiŵenge ya ŵalendo, ŵalanda na vyokoro. Muchite ntheura mwakuti FUMU, Chiuta winu wamutumbikani mu mlimo wose uwo mukuchita.

²⁰Para mukuponthora maolive mu makuni ghinu, mureke kuwereramo kuya kaponthora mu minthavi, mwakuti ivyo vyakharamo viŵe vya ŵalendo, ŵalanda ndiposo na vyokoro.

²¹Para mukuvuna mpheska mu minda yinu, mureke kuwereramo mwakuti ivyo vyakharamo viŵe vya ŵalendo, ŵalanda na vyokoro.

²²Imwe mukwenera kukumbuka kuti namwe mukaŵa ŵazga mu charu cha Eguputo. Ichi ndicho chifukwa nkhumulangulani kuti muchitirenge ntheura.