Read new_tumbuka_bible Marango gha Chiŵiri 25 Bible Online

Marango gha Chiŵiri 25 - new_tumbuka_bible bible

Marango gha Chiŵiri 25

¹“Usange pali mphindano pakati pa ŵanthu ŵaŵiri, ŵarute ku mphara ya ŵeruzgi. Ŵeruzgi ndiwo ŵati ŵapumule mphindano yawo pakurongora uyo ngwambula kafukwa na kususka uyo mrandu wamukora.

²Usange uyo wasuskika kuti ngwakwananga wakwenera kuthyapulika, mweruzgi wamuphalire kuti wagone pasi ndipo wathyapulike kwakuyana na mrandu wakhe apo mweruzgi wakuwona.

³Wangathyapulika na maluswazu ghakukwana 40, kweni kujumpha apa chara, mzire mubali winu wayuyurike usange mwarutizga kumuthyapula kujumpha apa.

⁴“Mureke kukaka mlomo wa nkhaŵi para yikubula tirigu.

⁵“Usange ŵana ŵa nyumba yimoza ŵakukhara pamoza ndipo yumoza wafwa kwambula kurekapo mwana, chokoro chira chireke kutengwa ku munyakhe wakuwaro kwa mbumba yira chara. Mubali wakhe ndiyo wahare chokoro chira kuti warutizge mlimo wa mubali wakhe mwa chokoro chira.

⁶Ndipo mwana mwanarume uyo wati wadange kubabika mu chokoro chira, wati wathyike zina la wakufwa yura uyo wakatora ŵanyina pakudanga mwakuti zina lakhe lireke kusisitika mukati mu ŵaIsraele.

⁷Usange mubali wa uyo wali kufwa wakukana kuhara chokoro chira, chokoro chirute ku mphara ya ŵararaŵarara ŵa msumba ura na kuti kwa iwo, ‘Mubali wa mufumu wane uyo wali kufwa wakukana kundihara kuti wawuske mphapu ya mubali wakhe mwa ine mwakuti zina la mubali wakhe lirutilire mu ŵaIsraele.’

⁸Ntheura ŵararaŵarara ŵa msumba ŵati ŵamucheme mwanarume yura uyo wakukana kuhara chokoro cha mubali wakhe na kuyowoya nayo. Usange wakurutizga kukana kuti wakukhumba chara kuhara chokoro cha mubali wakhe,

⁹penepapo chokoro chira, chikwenera kwiza kwa iyo uku ŵararaŵarara ŵa msumba ŵakuwona na kuvura skapato yimoza ku malundi mwanarume yura ndipo chimufunyire mata ku maso na kumuyowoyera kuti, ‘Ntheura ndimo kuti kumuchitikirenge mwanarume uyo wakukana kuwuska mphapu ya mubali wakhe.’

¹⁰Ndipo zina la nyumba yakhe liti lichemeke mu Israele kuti, ‘Nyumba ya uyo ŵakamuvura skapato.’

¹¹“Para ŵanarume ŵaŵiri ŵakutimbana, ndipo muwoli wa yumoza wakwiza kufupi kuti wathaske mufumu wakhe pakumukora mavwaro mwanarume uyo wakutimbana na mufumu wakhe,

¹²penepapo mwanakazi yura mumudumure woko kwambula kuŵa nayo na chitima.

¹³“Mureke kuŵa na miyeso yakupambanapambana yiŵiri yakupimira uzitu mu thumba linu, unyakhe uzitu ndipo unyakhe upepu.

¹⁴Mureke kuŵa na miyeso yiŵiri yakupambana mu zinyumba zinu, unyakhe ukuru, unyakhe uchoko.

¹⁵Kweni muŵenge na vyakupimira viweme na vyakuneneska, miyeso yiweme na yakuneneska, mwakuti muŵenge na umoyo utali mu charu icho FUMU, Chiuta winu wali kumupani.

¹⁶Pakuti wose awo ŵakuchita vinthu vya ntheura na awo ŵakuchita vyambula kugomezgeka mbukazuzi kwa FUMU, Chiuta winu.

¹⁷“Kumbukani icho ŵaAmaleki ŵakamuchitirani pa nthowa para mukizanga kufuma mu Eguputo.

¹⁸Iwo ŵakamuzingirizgani pa nthowa para imwe mukati mwazotopa na vyakulema ndipo ŵakakoma awo ŵakakhalira kumanyuma chifukwa cha vyakulema. Iwo ŵakaŵavye na wofi na Chiuta.

¹⁹Para FUMU, Chiuta winu wamupumuzgani mu charu icho wakumupani kuti muchihare kuŵa chinu, kufuma ku ŵarwani wose awo ŵakamuzingirizgani mukakomerethu ŵaAmaleki kuti ŵareke kukumbukika pa charu. Ichi mungachiruwanga chara.