Read new_tumbuka_bible Marango gha Chiŵiri 26 Bible Online

Marango gha Chiŵiri 26 - new_tumbuka_bible bible

Marango gha Chiŵiri 26

¹“Para mwafika mu charu icho FUMU, Chiuta winu wakumupani kuŵa chiharo chinu ndipo mwachipoka na kukhara mwenemumo,

²waliyose wa imwe wakatorengepo vuna yakudanga ya mu munda, ya ivyo mwamkukorora mu charu icho FUMU, Chiuta winu wakumupani kuŵa chiharo chinu. Mukaviŵikenge mu vidunga na kuruta navyo ku malo agho FUMU, Chiuta winu wamkusankha kuŵa chikhazi chakusoperako zina lakhe.

³Ndipo mukarutenge navyo kwa musofi uyo wali pa mlimo pa nyengo iyo na kuyowoya kuti, ‘Nkhuzomera muhanya uno kwa FUMU, Chiuta wane kuti ndiza mu charu icho FUMU yikarapa ku ŵasekuru ŵithu kuti yitipenge ise.’

⁴“Ntheura musofi wati watore chidunga mu mawoko ghako na kuchiŵika panthazi pa jochero la FUMU, Chiuta winu.

⁵Penepapo iwe ukazgore panthazi pa FUMU, Chiuta winu kuti, ‘Dada wakaŵa muAramu, munthu wakuyingayinga. Wakaruta ku Eguputo na kukhara kwenekura. Wakaŵa na ŵanthu ŵachoko waka ndipo kwenekura ŵakazgoka kuŵa fuko likuru, lankhongono na la ŵanthu ŵanandi.

⁶ŴaEguputo ŵakachitira msinjiro pakutisuzga chomene na kutigwiriska nchito mu uzga.

⁷Ntheura tikalirira kwa FUMU, Chiuta ŵa ŵasekuru ŵithu kuti watovwire. FUMU yikapulika kulira kwithu ndipo yikawona kusuzgika kwithu, kutokatoka kwithu na kunyekezgeka kwithu.

⁸FUMU yikatifumya mu Eguputo na woko lankhongono na lakutambazuka. Yikarongora vinthu vikuru vyakofya, vimanyikwiro na vyakuzizwiska.

⁹FUMU yikatitorera ku malo agha na kutipa charu ichi, icho ncha mkaka na uchi.

¹⁰Sono nkhwiza na vuna yakudanga ya mu munda yeneiyo imwe, Mwe FUMU, mwandipa.’ “Penepapo ukaŵike chidunga pasi, panthazi pa FUMU, Chiuta wako na kumusopa panthazi pakhe.

¹¹Ndipo uti ukondwere mu vinthu vyose viweme ivyo FUMU, Chiuta wako wakupa iwe na ŵa mu nyumba yako, ŵaLevi na ŵalendo awo ŵakukhara nawe.

¹²“Chirimika cha chitatu chilichose muperekenge chakhumi kufuma ku vuna yinu kwa Levi, ŵalendo, ŵalanda, vyokoro kuti mu mizi yose umo ŵakukhara ŵaŵe na chakurya chinandi. Para mwamara kuchita ivi,

¹³muyowoye kwa FUMU, Chiuta winu kuti, ‘Ndafumyamo mu nyumba yane chakhumi chakupatulika chilichose ndipo ndachipereka ku ŵaLevi, ŵalendo, ŵalanda na vyokoro kwakuyana na marango ghinu ghose agho mukandilangula mu charu icho FUMU, Chiuta winu wakumupani kuti muchihare kuwa chinu, Kuti ndili kuswapo limoza la marango ghinu chara nanga nkhugharuwapo.

¹⁴Ndilije kuryapo chakhumi apo nkhaŵa mu kutengera, nanga nkhufumyapo kanyakhe apo nkhaŵa wambula kuphotoka, panji kupereka kanyakhe ku ŵakufwa. Ndapulika mazgu gha imwe FUMU, Chiuta wane pakuchita vyose kwakuyana na umo mukandilangulira.

¹⁵Laŵiskani pasi kufuma kuchanya uko mukukhara ku malo ghinu ghakupatulika, na kuŵatumbika ŵanthu ŵinu ŵaIsraele pamoza na charu icho mwatipa nga ndi umo mukarapira ku ŵasekuru ŵithu kuti mutipenge charu cha mkaka na uchi.’

¹⁶“Muhanya uno FUMU, Chiuta winu wakumulangulani kuti mupulikire marango na vilayizgo vyakhe ivi. Ntheura mughasunge na mtima winu wose na maghanoghano ghinu ghose.

¹⁷Mwaphara mwekha, muhanya uno kuti FUMU ndiyo Chiuta winu, na kuti mwendenge mu nthowa zakhe pakumupulikira iyo, pakusunga marango ghakhe ghose na kuchita vyose ivyo wakumulangulani.

¹⁸Muhanya uno FUMU yayowoya pakweru kuti imwe ndimwe ŵanthu ŵakhe na ŵakhe nga ndi umo yili kupanganira kwa imwe ndipo mukwenera kusunga marango ghakhe ghose.

¹⁹FUMU yalangula kuti yimuzgorani kuŵa fuko likuru kuruska mafuko ghose agho yili kulenga, mu kurumbika mu lumbiri na mu nchindi ndipo muti muŵenge ŵanthu ŵakupatulika kwa FUMU, Chiuta winu nga ndi umo yili kuyowoyera.”