Read new_tumbuka_bible Marango gha Chiŵiri 27 Bible Online

Marango gha Chiŵiri 27 - new_tumbuka_bible bible

Marango gha Chiŵiri 27

¹Sono Mozesi na ŵarara ŵa ŵaIsraele ŵakaŵalangula ŵanthu kuti, “Sungani marango ghose agho nkhumulayizgani muhanya uno.

²Pa zuŵa ilo mwamkwambukira mronga wa Yorodani kuya ku charu icho FUMU, Chiuta winu wakumupani, mukimike mawe ghakurughakuru na kughaphaka utoto.

³Ndipo pa mawe agho mukalembepo marango ghose agha. Mukachite ichi para mwakambuka mronga wa Yorodani na kunjira mu charu icho FUMU, Chiuta winu wamupani, charu cha mkaka na uchi nga ndi umo FUMU, Chiuta wa ŵasekuru ŵinu ŵakapanganira kumupani.

⁴Para mwambuka mronga wa Yorodani, mukimike mawe agha pa Phiri la Ebala nga ndi umo nkhumulangulirani muhanya uno, na kughaphaka utoto.

⁵Kwenekura mukazengere FUMU, Chiuta winu jochero la mawe. Mureke kuya kazengera na mawe ghakuŵaja na chisulo,

⁶mukazenge jochero la FUMU, Chiuta winu na mawe ghambula kuŵaja. Penepara ndipo mukaperekerenge sembe yakocha kwa FUMU, Chiuta winu.

⁷Mukaperekenge sembe ya wenenawene na kuryera penepara, ndipo mukakondwenge panthazi pa FUMU, Chiuta winu.

⁸Pa mawe gheneagha, mukalembepo mazgu ghose gha marango agha kuti ghawonekenge pakweru nkhanira.”

⁹Mozesi na ŵasofi ŵa fuko la Levi ŵakati ku ŵaIsraele, “Nkharani chisisi ndipo mupulike, imwe ŵaIsraele. Muhanya uno mwazgoka kuŵa ŵanthu ŵa FUMU, Chiuta winu.

¹⁰Ntheura mukwenera kupulikira mazgu gha FUMU, Chiuta winu pakusunga marango na vilayizgo vyakhe ivyo nkhumulangulani muhanya uno.”

¹¹Pa zuŵa lenelira Mozesi wakaŵalangula ŵanthu ŵakati,

¹²“Para mwambuka mronga wa Yorodani awo ŵamkwimilira pa Phiri la Gerizimu kuti ŵatumbike ŵaIsraele ndi aŵa: Simiyoni, Levi, Yuda, Isakara, Yosefe, na Benjamini.

¹³Awo ŵamkwimilira pa Phiri la Ebala kuphara nthembo ndi aŵa: Rubeni, Gadi, Ashere, Zebuloni, Dani, na Nafutali.

¹⁴Ndipo ŵaLevi ndiwo ŵati wayowoye mwa kuchemerezga mazgu agha ku ŵaIsraele kuti:

¹⁵“Watembeke munthu uyo wakupanga chikozgo chakuŵaja panji chakuwumba na kuchijikamira mwakubisa. Nangauli vingapangika mwa unkhwantha, kweni mbukazuzi kwa FUMU.” Ndipo ŵanthu wose pamoza wakazgore pakuyowoya kuti, “Ameni!”

¹⁶“Watembeke munthu uyo wakuyuyura ŵawiske panji ŵanyina.” Ndipo ŵanthu wose pamoza wakazgore pakuyowoya kuti, “Ameni!”

¹⁷“Watembeke munthu uyo wakusezga mphaka za mubali wakhe.” Ndipo ŵanthu wose pamoza wakazgore pakuyowoya kuti, “Ameni!”

¹⁸“Watembeke munthu uyo wakupuruska wa chiburumutira mu nthowa.” Ndipo ŵanthu wose pamoza wakazgore pakuyowoya kuti, “Ameni!”

¹⁹“Watembeke munthu uyo wakubendezga pakweruzga mrandu wa mulendo, mulanda, na chokoro.” Ndipo ŵanthu wose pamoza wakazgore pakuyowoya kuti, “Ameni!”

²⁰“Watembeke munthu uyo wakugonana na muwoli wa ŵawiske, chifukwa wakazuzga chitara cha wiske.” Ndipo ŵanthu wose pamoza wakazgore pakuyowoya kuti, “Ameni!”

²¹“Watembeke munthu uyo wakugonana na chinyama cha mtundu uliwose.” Ndipo ŵanthu wose pamoza ŵakazgora pakuyowoya kuti, “Ameni!”

²²“Watembeke munthu uyo wakugonana na mudumbu wakhe, manyi ndi mwana msungwana wa ŵawiske, panji wa ŵanyina.” Ndipo ŵanthu wose pamoza ŵakazgora pakuyowoya kuti, “Ameni!”

²³“Watembeke munthu uyo wakugonana na ŵanyinavyara.” Ndipo ŵanthu wose pamoza wakazgore pakuyowoya kuti, “Ameni!”

²⁴“Watembeke munthu uyo wakukoma mubali wakhe mu ubende.” Ndipo ŵanthu wose pamoza wakazgore pakuyowoya kuti, “Ameni!”

²⁵“Watembeke munthu uyo wakupoka chimbundi kuti wakakome munthu wambula kafukwa.” Ndipo ŵanthu wose pamoza wakazgore pakuyowoya kuti, “Ameni!”

²⁶“Watembeke munthu uyo wakureka kukhozgera mazgu gha marango agha pakughachita.” Ndipo ŵanthu wose pamoza wakazgore pakuyowoya kuti, “Ameni!”