Read new_tumbuka_bible Marango gha Chiŵiri 28 Bible Online

Marango gha Chiŵiri 28 - new_tumbuka_bible bible

Marango gha Chiŵiri 28

¹“Usange mukupulikira mazgu gha FUMU, Chiuta winu na kuŵikapo mtima pakusunga marango ghakhe ghose agho nkhumulangulani muhanya uno, FUMU, Chiuta winu wamuŵikani kuŵa pachanya pa mafuko ghose gha mu charu cha pasi.

²Vitumbiko vyose ivi viti vimwizirani na kumusangani usange mukupulikira FUMU, Chiuta winu.

³“Muti mutumbikikenge mu misumba yinu ndiposo mu minda yinu.

⁴“Muti mutumbikikenge pakuŵa na ŵana ŵanandi, ndiposo na vuna yinandi kufuma mu minda yinu. Viŵeto vyinu vyamkwandana, ng'ombe na mberere na mbuzi zinu.

⁵“Vitundu vya vyakurya na mbale zinu zakunozgeramo vingwa vyamkutumbikika.

⁶“Muti mutumbikikenge pa vyose ivyo muti muchitenge para mukunjira na para mukufuma.

⁷“FUMU yamkumuthereskerani ŵarwani ŵinu awo ŵakwimikana namwe. Ŵamkwiza mu nthowa zimoza, kweni ŵamkumuchimbirani, pakubaralikira mu nthowa zinkhonde na ziŵiri.

⁸“FUMU yiti yitumbike nthamba zinu na vyakurya vinandi ndiposo na milimo yinu yose. FUMU Chiuta winu wamkumutumbikani imwe mu charu cheneicho wakumupani.

⁹“FUMU yiti yimuzgorani imwe kuŵa ŵanthu ŵakhe ŵakupatulika kwa iyo nga ndi umo yili kurapira usange mukupulikira marango gha FUMU, Chiuta winu na kwenda mu nthowa zakhe.

¹⁰Ndipo ŵanthu wose ŵa mu charu cha pasi ŵati ŵawone kuti FUMU, Chiuta winu wamuzgorani imwe kuŵa ŵanthu ŵakhe na ŵakhe, ndipo ŵati ŵamuwopani.

¹¹FUMU yamkwandaniska vyose ivyo muli navyo, ŵana ŵinu, viŵeto vyinu ndiposo na vipambi kufuma mu minda yinu mu charu icho yikarapa ku ŵasekuru ŵinu kuti yimupaninge imwe.

¹²FUMU yamkumujulirani nthamba ya usambazi wakhe uweme wa kuchanya pakumupani vura pa charu mu nyengo yakwenerera na kutumbika vyose ivyo mukuchita. Imwe mwamkubwerekeska usambazi winu ku mafuko ghanandi, kweni kuti mwamkubwereka ku fuko lirilose chara.

¹³FUMU yamkumuzgorani imwe kuŵa mutu, muchira chara. Mwamkuŵa ŵa pachanya pera, ŵa pasi chara, usange muti mupulikire marango gha FUMU, Chiuta winu agho nkhumupani muhanya uno na kuŵikapo mtima pakughachita.

¹⁴Ntheura mureke kuzgokera uku na uku kufumamo mu marango agho nkhumupani muhanya uno pakujikamira ŵachiuta ŵanyakhe na kuŵateŵetera iwo.

¹⁵“Usange mwamkureka kupulikira mazgu gha FUMU, Chiuta winu na kureka kuŵikapo mtima pakusunga marango ghakhe ghose agha na vilayizgo vyakhe ivyo nkhumupani muhanya uno, nthembo izi zamkwiza pa imwe na kumuwirani.

¹⁶“Muti mutembekenge mu misumba yinu ndiposo na mu minda yinu.

¹⁷“Vitundu vya vyakurya na mbale zakunozgeramo vingwa vyamkutembeka.

¹⁸“Muti mutembekenge pakuŵa na ŵana ŵachoko waka ndiposo na vuna yichoko waka kufuma mu minda yinu. Ng'ombe zinu na mberere na mbuzi zinu zamkwandana chara.

¹⁹“Mwamkuŵa ŵakutembeka pa vyose ivyo mukuchita para mukunjira na para mukufuma.

²⁰“Usange mukuchita uheni na kuyireka FUMU, iyo yamkumutumirani nthembo, vitimbaheti na visuzgo mu vyose ivyo mwamkuchita, musuke muparanyike luŵiro na kumara petu chifukwa cha uheni uwo mukachita ndiposo chifukwa mwandireka ine.

²¹FUMU yamkumubatikani na matenda ghakofya musuke mumare petu mu charu icho mwamkunjiramo kuya kachipoka.

²²FUMU yiti yimulangani na nthenda ya kughandiska, ya kuthukira kwa mu thupi na ya vitufya. Yiti yimulangani na chithukivu chakofya, chilangalanga na chinoni, na kapuchi kuti vinange mbuto zinu za ku munda musuke mumare petu.

²³Mtambo pachanya pinu wakuŵa nga ndi mkuŵa ndipo charu cha pasi nacho chamkuŵa nga ndi chisulo.

²⁴Mu malo mwakuti vura yirokwe mu charu chinu, FUMU yamkumutumirani fuvu na muchenga musuke mumare petu.

²⁵“FUMU yamkuchita kuti muthereskeke panthazi pa ŵarwani ŵinu. Pakwimikana nawo, mwamkuruta mu nthowa yimoza kweni pakuŵachimbira, mwamkubalarikira mu nthowa zinkhonde na ziŵiri. Maufumu ghanandi mu charu cha pasi ghamkumuwonani nga ndi chinthu chakuseruska pa ivyo vikumuchitikirani.

²⁶Para mwafwa, viyuni vya mudera na vinyama vya mu thengere vyamkurya vitanda vya mathupi ghinu ndipo pamkuŵavye na yumoza uyo wamkuvichimbizgira kutali.

²⁷FUMU yamkumulangani na mapumba nga ndi agho ghakakora ŵaEguputo. Mwamkuŵa na vilonda mu thupi mose, mphere na kunyenyera kwa mu thupi kwenekuko kuti mwamkuchira nako chara.

²⁸FUMU yamkumulangani na matenda gha kufuntha, uchiburumutira na kuzerezeka kwa maghanoghano ghinu.

²⁹Mwamkuwurawuranga waka nanga ndi na muhanya pakati nga ndi umo wakuchitira wachiburumutira ku mdima. Pa vyose ivyo mwamkuchita, vinthu kuti vyamkumwenderaninge makora chara. Ŵanthu ŵamkumutindiŵizgirani pasi na kumwibirani zuŵa lirilose ndipo kwamkuŵavye na yumoza wakumovwirani.

³⁰“Mwamkujalira mwanakazi kuti mumutore, kweni munthu munyakhe ndiyo wamkumutora. Mwamkuzenga nyumba, kweni kuti imwe mwakugonamo chara. Mwamkulima munda wa mpheska, kweni kuti mwakuryamo vipambi vyakhe chara.

³¹Ng'ombe yinu yamkukomeka apo imwe mukuwona, kweni kuti mwamkuryako nyama yakhe chara. Ŵamkumupokani mbunda kweni kuti ŵamkuyiwezgera kwa imwe chara. Mberere na mbuzi zinu zamkupika ku ŵarwani ŵinu kweni kwamkuŵavye wakumovwirani.

³²Ŵana ŵinu ŵati ŵatorekerenge ku uzga na ŵanthu ŵanyakhe apo imwe mukuwona. Zuŵa na zuŵa maso ghinu ghati ghachesamenge chifukwa cha kulaŵiska kuti panji ŵana ŵizenge, kweni mwamkuŵavye nkhongono kuŵavikirira.

³³Fuko leneilo mundalimanye, ndilo lamkurya vuna kufuma mu minda yinu yeneiyo imwe mukasuzgika pakulima ndipo imwe muti munyekezgekenge na kutindiŵizgika mazuŵa ghose.

³⁴Ndipo mwamkufuntha chifukwa cha ivyo maso ghinu ghamkuwona.

³⁵FUMU yamkumulangani na mapumba ghakuŵaŵa mu makongono na mu malundi ghinu, gheneagho kuti mwamkuchira nagho chara ndipo vilonda vyamkuphumuka kufuma ku lundi mpaka ku mutu winu.

³⁶“FUMU yamkumutorerani imwe na karonga uyo mwamkumwikika ku fuko la chilendo kweneuko imwe nanga mbasekuru ŵinu kuti ŵali kukharako chara. Kwenekura mwakuteŵetera ŵachiuta ŵanyakhe ŵakuŵaja kufuma ku makuni na ku mawe.

³⁷Muti muŵenge chinthu chakuseruska, chakuhoyeka na icho ŵanthu ŵati ŵayowoyerenge vidokoni pakumusekani ku vyaru vyose uko FUMU yamkumutorerani.

³⁸“Mwamkupanda mbuto zinandi mu minda yinu kweni mwamkuvuna vichoko waka chifukwa zombe wamkumara kurya.

³⁹Mwamkupanda mpheska na kuphatilira, kweni kuti mwakumwapo vinyo wakhe chara nanga kuponthoramo mpheska zakhe chifukwa vibungu vyamkumara kurya makuni ghakhe.

⁴⁰Mwamkuŵa na makuni gha maolive mu charu chinu chose, kweni kuti mwamkuŵa na mafuta ghakhe chara chifukwa vipambi vya maolive vyamkuyoyoka vyekha.

⁴¹Mwamkubaba ŵana ŵanarume na ŵanakazi, kweni kuti mwamkukhara nawo chara chifukwa ŵamkutorekera ku umikori.

⁴²Zombe wamkurya makuni ghose na vuna yose kufuma mu minda yinu.

⁴³“Ŵalendo awo ŵakukhara mu charu chinu ndiwo ŵamkuŵa na nkhongono zinandi kuruska imwe apo imwe nkhongono zinu zamkukhilirakhilira.

⁴⁴Ŵalendo ŵeneaŵa ndiwo ŵati ŵaŵe na vinandi vyakuti ŵamubwerekani, kweni imwe mwamkuŵavye kuti muŵabwereke. Ndiwo ŵamkuŵa mutu kwa imwe ndipo imwe mwamkuŵa muchira kwa iwo.

⁴⁵“Nthembo zose izi zamkwiza pa imwe ndipo ziti ziŵenge pa imwe, musuke mumare petu chifukwa mukareka kupulikira FUMU, Chiuta winu pakureka kurondezga marango na vilayizgo vyakhe ivyo wakamupani.

⁴⁶Nthembo izi ndi chimanyikwiro na chakuzizwiska cha weruzgi wa Chiuta pa imwe na mphapu yinu kwa muyirayira.

⁴⁷Chifukwa chakuti mukawura kuteŵetera FUMU, Chiuta winu na chimwemwe na mtima wakukondwa nyengo zose iyo mukaŵira na vyakuzara,

⁴⁸ntheura mu njara, mu nyota, mukwenda nkhule na mu ukavu mwamkuteŵetera ŵarwani ŵinu ŵeneawo FUMU yamkumutumirani kwimikana namwe. FUMU yamkumunyekezgani na visuzgo vyose ivi musuke mumare petu.

⁴⁹FUMU yamkumutorerani fuko la ŵanthu ŵa kutali kwimikana namwe kufuma ku mphererekezgo za charu cha pasi. Ŵamkwiza luŵiroluŵiro nga ndi nombo yakuwuruka ŵeneawo mazgu ghawo kuti mukughamanya chara.

⁵⁰Ŵanthu ŵeneaŵa, ŵamkuŵa ŵakari chomene ŵambula kulorako na murara nesi kuŵa na chitima na mwana.

⁵¹Ŵamkumuryerani ŵana ŵa viŵeto vyinu na vuna kufuma mu minda yinu musuke mufwe na njara. Kuti ŵamkumurekeraniko chakurya, vinyo, mafuta nanga ndi kana ka ng'ombe panji ka mberere na mbuzi chara musuke mumare petu.

⁵²Ŵamkumujarizgani mu mizi yose mu charu icho FUMU, Chiuta winu, wakumupani ghasuke malinga ghinu ghatali na ghakukhora agho mukughagomezga ghawiskikire pasi.

⁵³“Mu nyengo iyo ŵarwani ŵinu ŵamkumujarizgani mu misumba yinu, mwamkuŵa mu visuzgo vya njara mwakuti mwamkurya ŵana ŵinu, ŵanarume na ŵanakazi, awo FUMU Chiuta winu wamupani.

⁵⁴Nanga ndi munthu wa mtima wa chiwuravi mukati mwinu, uyo wakutandara mu viweme, wamkumunora chakurya nanga ndi mubali wuwo. Wamkumunora nanga ndi muwoli wakhe wakutemweka na ŵana ŵakhe awo ŵakharako.

⁵⁵Iyo kuti wamkuŵapako nanga njumoza wa iwo chara nyama ya ŵana ŵakhe iyo wamkuryanga. Ichi ndicho chamkuŵa chakurya icho wamkuŵa nacho chifukwa cha visuzgo ivyo ŵarwani ŵati ŵamkumunyekezgani pa nyengo ya kujarizgika mu mizi yinu yose.

⁵⁶Mwanakazi wa mtima wa chiwuravi mukati mwinu uyo wakutandara mu viweme, mweneuyo kuti wakukanda na pasi wuwo chara, nayo wamkumunora mufumu wakhe wakutemweka panji mwana wakhe mwanarume panji mwanakazi.

⁵⁷Wamkuŵanora chibabiro chakhe nanga ndi bonda uyo wababika waka, pakuti vyeneivi ndivyo wamkurya ku ubende chifukwa cha kusoŵerwa chakurya mu kujarizgika na visuzgo, uko ŵarwani ŵinu ŵamunyekezgani nako mu mizi yinu.

⁵⁸“Usange mwamkureka kupulikira mazgu ghose gha marango agha, gheneagho ghali kulembeka mu buku ili na kureka kuchindika zina la FUMU, Chiuta winu ilo nda uchindami na lakofya,

⁵⁹FUMU yamkutorera pa imwe na pa mphapu yinu vilengo vyeneivyo mundaviwonepo na kale, vikuru na vyakuŵinya ndiposo na matenda ghakuru na ghambula kuchizgika.

⁶⁰Matenda ghose agho mukopanga apo mukaŵa mu Eguputo, FUMU yamkumukhizgirani imwe ndipo mwamkuchira chara.

⁶¹FUMU yamkutoreraso pa imwe na mphapu yinu nthenda za mitundumitundu na vilengo vyeneivyo vindalembeke mu buku ili la marango musuke mumare petu.

⁶²Nangauli mukaŵa ŵanandi nga ndi nyenyezi za kuchanya, mwamkukhara ŵachoko waka chifukwa mukareka kupulikira mazgu gha FUMU, Chiuta winu.

⁶³Nga ndi umo FUMU yikakondwera namwe pakumuchitirani uweme na kumwandaniskani, ndimoso yamkukondwerera pakumukomani na kumumarani. Mwamkufumiskikamo mu charu icho mukunjira kuya kapoka kuŵa chinu.

⁶⁴“FUMU yamkumumbininiskirani ku vyaru vya ŵamitundu kufuma ku mphererekezgo yimoza ya charu kuya kafika ku mphererekezgo yinyakhe kweneuko mwamkuteŵetera ŵachiuta ŵanyakhe, ŵakuŵaja kufuma ku makuni na mawe, awo imwe panji ŵasekuru ŵinu ŵalije na kuŵamanya na kale.

⁶⁵Ku vyaru vya mafuko ivi kuti mwamkusanga mutende chara nesi kuŵa na charu chinu chakupumulamo. FUMU yamkumupani mtima wakwenjerwa, maso ghakuzotopa na ŵambula chigomezgo mu mtima.

⁶⁶Nyengo zose mwamkuŵa na umoyo wa nkhayiko, wakuzura na wofi muhanya na usiku wambula na kuŵa na chigomezgo kuti muŵenge ŵamoyo.

⁶⁷Na mulenje mwamkuyowoyanga kuti mphanyi kwanguŵa mise, ndipo na mise mwamkuyowoya kuti mphanyi kwanguŵa mulenje. Kwamkuŵa ntheura chifukwa cha wofi uwo wamkuŵa mu mtima winu na ivyo mwamkuviwona.

⁶⁸Ndipo FUMU yamkumukwezgani mu ngaraŵa, kumutumani ku charu cha Eguputo. Kwenekura mwamkujipereka mwekha ku ŵarwani ŵinu na kujiguliska kuti muŵe ŵazga, kweni kwamkuŵavye na yumoza wakumugulani.”