Read new_tumbuka_bible Marango gha Chiŵiri 29 Bible Online

Marango gha Chiŵiri 29 - new_tumbuka_bible bible

Marango gha Chiŵiri 29

¹Agha ndi mazgu gha phangano ilo FUMU yikalangula Mozesi kuti wachite na ŵanthu ŵaIsraele mu charu cha Mowabu, pa dera pa ilo ŵakachita kwa iwo pa Phiri la Sinayi.

²Mozesi wakachema ŵaIsraele wose ndipo wakati kwa iwo: “Imwe mukawona vyose ivyo FUMU yikachita ku charu cha Eguputo, kwa Faro, ku ŵateŵeti ŵakhe wose na ku charu chakhe chose.

³Mukawona vilengo vyakofya, vimanyikwiro na vyakuzizwiska vikuru ivyo FUMU yikachita.

⁴Kweni mpaka kufika muhanya uno FUMU kuti yili kumupani vinjeru chara kuti muvimanye vinthu ivi, nesi maso kuti muviwoneske nanga ndi makutu kuti muvipulikiske.

⁵Pa virimika 40 ivyo nkhamurongozgani mu mapopa, vyakuvwara vyinu vikamara chara nanga ndi skapato zinu nazo kuti zikamara chara.

⁶Mukaŵavye chakurya panji vinyo nanga ndi moŵa, kweni FUMU yikamupaninge ivyo mukasoŵerwanga mwakuti mumanye kuti ine ndine Chiuta winu.

⁷Ndipo tikati tafika pa malo ghano, Sihoni karonga wa msumba wa Heshiboni na Ogi karonga wa Bashani ŵakiza kuti ŵarwe nase nkhondo, kweni tikaŵathereska.

⁸Tikapoka charu chawo na kugaŵira ŵa fuko la Rubeni, la Gadi na la Manase kuŵa chiharo chawo.

⁹Ntheura muŵikepo mtima pakupulikira mazgu gha phangano ili mwakuti vinthu vimwenderaninge makora mu vyose ivyo mukuchita.

¹⁰“Muhanya uno, mukwimilira panthazi pa FUMU, Chiuta winu, imwe ŵarongozgi ŵa mafuko ghinu, ŵararaŵarara ŵinu, nduna zinu na ŵanthu wose ŵa charu cha Israele,

¹¹pamoza na ŵawoli na ŵana, ŵalendo awo ŵakukhara mu vikaya vyinu kumuthenyerani nkhuni panji kumunegherani maji.

¹²Imwe muli pano kuti munjire mu phangano la FUMU, Chiuta winu ilo wakuchita muhanya uno na imwe na kulikhozga na chirapo.

¹³Muchite phangano ili mwakuti FUMU yikhozgere kuti imwe ndimwe ŵanthu ŵakhe ndipo iyo ndi Chiuta winu nga ndi umo yikapanganirana kwa imwe na kurapa ku ŵasekuru ŵinu, Abrahamu, Yisake na Yakhobe.

¹⁴Kuti ndimwe pera chara, mwaŵeneimwe FUMU yikuchita phangano ili mwa kurapa.

¹⁵FUMU yikuchita phangano ili na ise tose taŵeneise tikwimilira pano panthazi pa iyo ndiposo yikuchitaso na ŵana ŵithu awo ŵachali ŵandababike.

¹⁶“Mukumanya umo tikakhalira mu charu cha Eguputo na umo tikaporotera mukati mu mafuko agho tikajumphangamo apo tikizanga kuno.

¹⁷Mukawona maukazuzi ghawo, ŵachiuta ngoza ŵawo ŵakuŵaja kufuma ku makuni na mawe, ŵa siliva na ŵa golide awo ŵakaŵa mukati mwawo.

¹⁸Muchenjere kuti kuŵavye mwanarume, mwanakazi, mbumba, panji fuko ilo liti ligarukire FUMU, Chiuta withu muhanya uno kuya kateŵetera ŵachiuta wa mafuko ghara. Kuchita ntheura kuli nga ndi munthu uyo ndi musisi mukati mwinu uwo ukupambika vipambi vyakuŵaŵa na vyakukoma.

¹⁹Para munthu wa ntheura wakupulika mazgu gha chirapo gha phangano ili, ŵati ŵajirumbe yekha pakughanaghana kuti, ‘Nditi ndiŵenge mu mutende nangauli ndingenda mu unonono wa mtima wane.’ Kuchita ntheura chiti chimutorerani mose pharaniko imwe mwa ŵaweme pamoza na ŵaheni.

²⁰FUMU kuti yamkukhumba kumugowokera munthu wa ntheura chara. FUMU yamkumukwiyira na sanje yakugolera nga ndi moto ndipo nthembo zose izo zalembeka mu buku ili la marango zamkuŵa pa iyo, ndipo FUMU yamkuwuskamo zina lakhe mu charu.

²¹FUMU yamkumupatula ku fuko lose la Israele kuti walangike kwakuyana na nthembo zose za phangano izo zili kulembeka mu buku ili la marango.

²²“Ŵazukuru ŵinu awo ŵamkuŵapo pamanyuma pinu na ŵalendo awo ŵamkufuma ku vyaru vya kutali, ŵamkuwona visuzgo vya charu icho na nthenda izo FUMU yaŵikamo.

²³Charu chose chamkuŵa chiparamba, chakuŵa na sulufure na muchere chambula kupandamo kalikose nanga nkhupambikamo vipambi nesi kumeramo kalikose nanga ndi utheka. Chamkuŵa charu chakunangika nga ndi misumba ya Sodomu na Gomora ya Adima na Zeboyimu, iyo FUMU yikaya kapankhura apo yikakwiya mu ukari ukuru.

²⁴Nadi mafuko yose ghamkufumba kuti, ‘Nchifukwa uli FUMU yachita ichi ku charu ichi? Nchifukwa uli ukari wakhe wagolera ntheura?’

²⁵Ŵanthu ŵamkuzgora kuti, ‘Chifukwa chakhe nchakuti ŵanthu ŵali kuswa phangano ilo ŵakachita na FUMU, Chiuta wa ŵasekuru ŵawo pa nyengo iyo wakaŵafumiskira mu charu cha Eguputo.

²⁶Iwo ŵakaruta kuya kateŵetera ŵachiuta ŵanyakhe na kuŵasopa ŵeneawo ŵakaŵa ŵambula kumanyikwa ndipo FUMU yikaŵakanira kuŵasopa.

²⁷Ntheura FUMU yikaŵakwiyira ŵanthu ŵakhe, na kuŵatorera nthembo zose izo zili kulembeka mu buku ili.

²⁸FUMU yikakwiya chomene ndipo yili mu ukari wakhe ntheura, yikaŵawuskamo mu charu chawo na kuŵataya mu charu chinyakhe uko ŵachali muhanya uno.’

²⁹“Pali vinthu vinyakhe vya muchindindi ivyo nvya FUMU, Chiuta withu, kweni ise wali kutivumbulira marango ghakhe, ndipo ise na ŵazukuru ŵithu tikwenera kughapulikira marango agha kwa muyirayira.