Read new_tumbuka_bible Marango gha Chiŵiri 3 Bible Online

Marango gha Chiŵiri 3 - new_tumbuka_bible bible

Marango gha Chiŵiri 3

¹“Pamanyuma tikawerako ndipo tikatora nthowa yakuya ku chigaŵa cha Bashani. Ndipo Ogi, karonga wa ku Bashani wakiza na ŵasilikari ŵakhe wose kuti ŵarwe nase nkhondo ku msumba wa Edireyi.

²Kweni FUMU yikati kwa ine, ‘Ungamopanga, pakuti ndamupereka iyo mu mawoko ghako pamoza na ŵanthu ŵakhe wose ndiposo charu chakhe. Uchite nayo nga ndi umo ukachitira na Sihoni, karonga wa ŵaAmori mweneuyo wakakharanga ku Heshiboni.’

³“Ntheura FUMU, Chiuta withu wakamuperekaso mu mawoko ghithu Ogi, karonga wa Bashani na ŵasilikari ŵakhe wose. Ndipo tikaŵakoma wose mpaka kukaŵavye na yumoza uyo wakakharako wamoyo.

⁴Ndipo tikatora misumba yakhe yose pa nyengo yeneyira. Pakaŵavye msumba wawo umoza uwo tikareka kuwutora. Misumba yose iyo tikatora yikaŵa 60 kufumira mu chigaŵa chose cha Arigobu uko Ogi karonga wa ku Bashani wakawusanga.

⁵Misumba yose iyi yikazingirizgika na malinga ghatali, vipata, na mphingirizgo zakujalira pa vipata. Pakaŵaso vikaya yinandinandi iyo yikaŵavye malinga.

⁶Tikabwangandula mizi yose na misumba yawo yose yira ndipo tikakoma ŵanthu wose, ŵanarume, ŵanakazi na ŵana wuwo nga ndi umo tikachitira na misumba ya Sihoni, karonga wa Heshiboni na ŵanthu ŵakhe.

⁷Kweni viŵeto vyose na ivyo tikatora mu msumba tikayegha kuŵa vyithu.

⁸“Ntheura pa nyengo yira tikatora charu kufuma mu mawoko gha ŵakaronga ŵaŵiri ŵaAmori icho chikaŵa ku sirya linyakhe la mronga wa Yorodani kwamba ku dambo la Arinoni mpaka ku Phiri la Heremoni,

⁹(ŵaSidoni ŵakachemanga Phiri la Heremoni kuti, ‘Siriyoni’ ndipo ŵaAmori ŵakalichemanga kuti ‘Seniri’).

¹⁰Tikatoraso misumba yose ya mu mapiri, charu chose cha Gileyadi na Bashani mpaka ku Saleka na Edireyi misumba ya ufumu wa Karonga Ogi uyo wakawusanga Bashani.”

¹¹(Mu ŵanthu wose ŵaRefayimu, Karonga Ogi wa charu cha Bashani pera ndiyo wakakharako wa moyo. Ndipo chitara chakhe chikaŵa cha chisulo la mamita 9 mu utali ndipo mamita ufupi mamita ghanayi pakuliyaniska na umo tikupimira mazuŵa ghano. Chitara ichi chichalipo ku Raba, msumba wa ŵaAmoni.)

¹²“Ndipo pa nyengo yira tikati tapoka charu ichi, nkhachipereka ku fuko la Rubeni na ku fuko la Gadi, charu icho mpaka yakhe yikwamba ku msumba wa Aroyere pafupi na mronga wa ŵaArinoni, ndiposo hafu wa charu cha mapiri cha Gileyadi pamoza na misumba yakhe.

¹³Chigaŵa icho chikakharako cha Gileyadi na cha Bashani chose icho ncha ufumu wa Karonga Ogi, nkhachipereka ku hafu wa fuko la Manase.” (Chigaŵa chose cha Arigobu mu Bashani chikamanyikwanga kuti charu cha ŵaRefayimu.

¹⁴Yayiri wa fuko la Manase wakatora charu chose cha Arigobu cheneicho ndi Bashani kuya kafika ku mphaka za ŵaGeshuru na ŵaMaaka ndipo vikaya ivi vikuchemeka na zina lakhe leneili lakuti, “Havoti Yayiri” mpaka sono.)

¹⁵“Charu cha Gileyadi, nkhachipereka kwa Makiri wa fuko la Manase.

¹⁶Ndipo wa fuko la Rubeni na la Gadi nkhaŵapa charu kufuma ku Gileyadi kuya kafika ku mronga wa Arinoni. Pakatikati pa mronga ndipo pakaŵa mphaka ku chigaŵa cha ku mwera ndipo ku chigaŵa cha ku mpoto mphaka yawo yikaŵa mronga wa Yaboko yeneiyo ndi mphaka ya ŵaAmoni.

¹⁷Ku chigaŵa cha ku mwera, charu chawo chikafikanga mpaka ku mronga wa Yorodani, kufumira ku Kinereti ku mpoto kuya kafika ku Nyanja ya Araba iyo ndi Nyanja ya Muchere ku mwera. Ku chigaŵa cha ku mafumiro gha dazi chikafikanga musi mwa Phiri la Pisiga.”

¹⁸“Ndipo pa nyengo yira nkhamulangulani kuti, ‘FUMU, Chiuta withu, wamupani charu ichi cha kumafumiro gha dazi kwa mronga wa Yorodani kuŵa chinu. Ŵanarume wose awo ŵangarwa nkhondo ŵatore mahomwa ghawo na kwambuka mronga pakudangirira ŵabali ŵawo ŵaIsraele na kuŵawovwira kuti ŵapoke charu chawo.

¹⁹Kweni ŵawoli ŵinu, ŵana ŵinu na viŵeto vyinu (nkhumanya kuti muli na viŵeto vinandi) vikhalire danga mu misumba iyo ndili kumupani,

²⁰kufikira nyengo iyo FUMU yamkuŵapira chikhazi ŵabali ŵinu nga ndi umo yamupirani imwe, na kupoka charu kuti chiŵe chawo icho FUMU, Chiuta winu wakuŵapa ku sirya linyakhe la mronga wa Yorodani. Pamanyuma pa ichi, waliyose wa imwe mukawerere ku chiharo chakhe icho ndamupani.’

²¹“Nyengo yeneyira, nkhamulangula Yoshuwa kuti, ‘Wawona na maso ghako vyose ivyo FUMU, Chiuta wako wachita ku ŵakaronga ŵaŵiri aŵa. FUMU yamkuchita ntheura pera ku ma ufumu ghose agho ukurutako.

²²Ureke kopa pakuti FUMU, Chiuta winu wati wamurwerani imwe.’

²³“Pa nyengo yeneyira nkhayiŵeyerera FUMU kuti,

²⁴‘Mwe FUMU Chiuta mwambako kurongora nda muteŵeti winu umo uliri ukuru winu na nkhongono zinu, kasi ndi chiuta njani uyo wali kuchanya panji mu charu cha pasi uyo wangamanya kuchita milimo yikuru na ya nkhongono nga ndi iyo mukuchita imwe?

²⁵Nkhumurombani, mundizomerezge kuti ndambuke kuya kawona charu chiweme icho chili ku sirya linyakhe la mronga wa Yorodani, charu chiweme chira cha mapiri na mapiri gha Lebanoni.’ ”

²⁶“Kweni chifukwa cha imwe, FUMU yikandikaripira ndipo yikandipulika chara. Ntheura FUMU yikati, ‘Ureke kuyowoyaso na ine pa makani agha.

²⁷Kwera Phiri la Pisiga ndipo ulaŵiske ku mpoto na ku mwera, ku mafumiro gha dazi na ku manjiliro gha dazi. Ulaŵiske makora ivyo ukuviwona chifukwa kuti wamkwambuka mronga wa Yorodani chara.

²⁸Kweni umulayizge Yoshuwa ndipo umukhwimiske na kumukhozga, pakuti ndiyo wati warongozgenge ŵanthu aŵa na kuŵambuska ndipo ndiyo wati waŵape charu icho uti uchiwonenge.’

²⁹“Ntheura tikakhara mu chidambo icho chikaŵa pafupi na msumba wa Beti Peyoro.”