Read new_tumbuka_bible Marango gha Chiŵiri 30 Bible Online

Marango gha Chiŵiri 30 - new_tumbuka_bible bible

Marango gha Chiŵiri 30

¹“Sono ndamupani vinthu viŵiri, vitumbiko na nthembo kuti musankhepo. Para vyose ivi vyamwizirani, ndipo muli mu vyaru vya mafuko ghanyakhe uko FUMU Chiuta winu wamumbininiskirani, mwamkukumbuka kuti musankhepo chimoza.

²Para imwe na ŵana ŵinu mwawerera kwa FUMU, Chiuta winu na kumupulikira iyo na mtima winu wose na umoyo winu wose pa vyose ivyo ndamulangulani kuchita muhanya uno,

³penepapo FUMU, Chiuta winu wamkuŵa na chiwuravi na imwe. Wamkuwezgera mauweme kufuma ku vyaru vya ŵa ŵamitundu uko wali kumumbininiskirani, ndipo wizamkumuzgorani kuti muŵe na vinandi.

⁴Nangauli mungambininiskikira ku vyaru vya kutali chomene, kwenekura FUMU, Chiuta winu wamkumusokolorerani pamoza na kwiza namwe kuno.

⁵FUMU yamkwiza namwe mu charu icho chikaŵa mu mawoko gha ŵasekuru ŵinu kuti chiŵenge chinu. FUMU yizamkumuzgorani kuti muŵe na vinandi, na kumwandaniskani kuruska ŵasekuru ŵinu.

⁶FUMU, Chiuta winu wizamkumupani imwe na ŵana ŵinu mitima wa kupulikira mwakuti mumutemwenge iyo na mtima winu wose na mzimu winu wose ndipo muŵe ŵamoyo mu charu.

⁷FUMU, Chiuta winu wamkuŵika nthembo zose izi pa ŵarwani ŵinu awo ŵamkumutinkhani na kumusuzgani.

⁸Imwe mwamkwamba kupulikiraso FUMU, Chiuta winu na kuchita vyose ivyo nkhumulangulani muhanya uno.

⁹FUMU Chiuta winu wamkuchita kuti muŵe ŵasambazi chomene mu milimo yinu yose ya mawoko ghinu, mu ŵana ŵinu, mu ŵana ŵa viŵeto vyinu na mu vipambi vya mu minda yinu. Pakuti FUMU yamkukondweraso namwe na kumutumbikani kuti muŵe na vinandi nga ndi umo yikakondwera nawo ŵasekuru ŵinu.

¹⁰FUMU Chiuta winu wamkuchita ivi usange mwamkumupulikira ivyo wakuyowoya pakurondezga marango na vilayizgo vyakhe ivyo yili kulembeka mu buku ili la marango, ndiposo usange mukuwerera kwa FUMU, Chiuta winu na mtima winu wose na mzimu winu wose.

¹¹“Dango ilo nkhumupani muhanya uno kuti ndinonono kulipulikiska nesi kuŵa la patali na imwe chara.

¹²Kuti liri kuchanya chara mwakuti muyowoye kuti, ‘Kasi ndi njani uyo watikwererenge kuchanya kuya katitorera dango kuti tilipulike na kulichita?’

¹³Kuti liri ku sirya la nyanja chara mwakuti muyowoye kuti, ‘Kasi ndi njani uyo wati watiyambukire nyanja kuti warute kuya katitorera dango kuti tilipulike na kulichita.’

¹⁴Dango ili liri pafupi na imwe. Liri mu mlomo mwinu na mu mtima winu, mwakuti mumanye kulifiska.

¹⁵“Muhanya uno nkhumupani mwaŵi kuti musankhe pakati pa uweme na uheni ndiposo pakati pa umoyo na nyifwa.

¹⁶Usange mwamkupulikira marango gha FUMU, Chiuta winu agho nkhumuphalirani muhanya uno pakuyitemwa FUMU, Chiuta winu na kwenda mu nthowa zakhe ndiposo na kusunga vilayizgo na malangulo ghakhe, apo ndipo mwamkuŵa na umoyo na kwandana. Ndipo FUMU yamkumutumbikani mu charu icho mukunjiramo kuya kachipoka.

¹⁷Kweni usange mtima winu wamkuzgoka na kureka kupulikira FUMU pakuguzikira ku ŵachiuta ŵanyakhe kuŵateŵetera na kuŵasopa,

¹⁸nkhumuphalirani muhanya uno kuti mwamkumara petu. Kuti mwamkukharamo nyengo yitali chara mu charu icho mukuyako kuya kachipoka sirya la mronga wa Yorodani.

¹⁹Ntheura nkhumupani mwaŵi kuti musankhepo pakati pa umoyo na nyifwa ndiposo pakati pa vitumbiko na nthembo. Kuchanya na charu cha pasi viŵe kaboni kuti ndamuphalirani vyeneivi muhanya uno. Ntheura sankhani umoyo mwakuti imwe na ŵa mphapu yinu muŵe ŵamoyo.

²⁰Ndipo mutemwenge FUMU, Chiuta winu, kumupulikira iyo na kugomezgeka kwa iyo. Pakuti kuchita ntheura ndiwo umoyo winu kuti mukhare mazuŵa ghanandi mu charu icho FUMU yikarapa kupereka ku ŵasekuru ŵinu, Abrahamu, Yisake, na Yakhobe.”