Read new_tumbuka_bible Marango gha Chiŵiri 31 Bible Online

Marango gha Chiŵiri 31 - new_tumbuka_bible bible

Marango gha Chiŵiri 31

¹Mozesi wakarutilira kuyowoya mazgu agha ku ŵaIsraele wose kuti,

²“Sono ndili na virimika 120 ndipo ndingamanya kumurongozganiso chara. Pa dera pa ichi, FUMU yandiphalira kuti ine nditi ndambukenge mronga wa Yorodani chara.

³FUMU, Chiuta winu yekha ndiyo wamkwambuka namwe na kumudangirirani, ndipo wamkumara ŵamitundu awo ŵali panthazi pinu, mwakuti imwe mutore charu chawo kuŵa chinu. Ndipo Yoshuwa ndiyo wati waŵenge murongozgi winu nga ndi umo FUMU yayowoyera.

⁴FUMU yamkuŵamara ŵamitundu awo nga ndi umo yikachitira na Sihoni na Ogi, ŵakaronga ŵa ŵaAmori pamoza na charu chawo.

⁵FUMU yamkuŵapereka wose kwa imwe ndipo mukaŵa chitirenge vyose kwakuyana na ivyo nkhamulangulani.

⁶Ntheura muŵenge ŵankhongono na ŵakukhwima mtima. Mureke kopa nanga nkhuŵa na chitenthe na iwo, pakuti FUMU, Chiuta winu ndiyo wati wendenge namwe. Kuti wati wamurekani mwekha chara nanga nkhumusidani.”

⁷Penepapo Mozesi wakachema Yoshuwa ndipo wakati kwa iyo, “Uŵenge wankhongono panthazi pa ŵaIsraele wose na wakukhwima mtima pakuti wamkurongozga ŵanthu aŵa kunjira mu charu icho FUMU yikarapa ku ŵasekuru ŵawo kuŵapa kuŵa chiharo chawo. Iwe ndiwe wamkuŵagaŵira charu icho.

⁸FUMU yekha ndiyo yamkudangirira, yamkuŵa nawe ndipo kuti yamkukurekerera wekha chara nesi kukusida. Ureke kopa nesi kuŵa na chitenthe.”

⁹Ntheura Mozesi wakalemba marango gha Chiuta ndipo wakaghapereka kwa ŵasofi, ŵana ŵaLevi awo ŵakayeghanga Bokosi la Phangano la FUMU. Wakaghaperekaso ku ŵarara wose ŵa ŵaIsraele.

¹⁰Penepapo Mozesi wakaŵalangula wakati, “Nyengo zose para virimika vinkhonde na viŵiri vikumara, nyengo iyo yikuŵa ya chiphikiro cha misasa na ya kusisitira ngongole, muŵazgenge marango gha.

¹¹Muŵazgenge para ŵaIsraele wose ŵiza panthazi pa FUMU, Chiuta winu apo ŵati wasankhe kuti ŵamusope mwakuti ŵajipulikire iwo ŵekha.

¹²Mukawunganye ŵanthu wose, ŵanarume, ŵanakazi, ŵana, na ŵalendo awo mukukhara nawo mu mizi yinu mwakuti ŵapulike na kusambira kumopa FUMU, Chiuta winu na kuŵikapo mtima pakurondezga mazgu ghose gha marango agha.

¹³Mu nthowa iyi ŵazukuru ŵinu awo ŵandapulikepo na kale marango gha FUMU, ŵapulike na kusambira kopa FUMU, Chiuta winu nyengo yose iyo wamkukhalira mu charu icho mukuyako kuya kachipoka ku sirya la mronga wa Yorodani.”

¹⁴FUMU yikati kwa Mozesi, “Mazuŵa ghako agho ukhalirenge wa moyo ghaneng'enera. Ntheura umucheme Yoshuwa, mwize pamoza mu Chihema mwakuti ndimulayizge.” Ndipo Mozesi na Yoshuwa ŵakaruta mu Chihema Chakukumaniranamo.

¹⁵FUMU yikawoneka mu Chihema mu bingu lakuŵa nga ndi mzati ndipo likimilira pa muryango wa Chihema.

¹⁶FUMU yikati kwa Mozesi, “Sono uli pafupi kugona pamoza na ŵasekuru ŵako, ndipo para wagona, ŵanthu kuti ŵati ŵaŵenge ŵakugomezgeka kwa ine chara. Ŵati ŵaswenge phangano ilo nkhachita na iwo pakundireka na kusopa ŵachiuta ngoza ŵa charu icho ŵakuyako kuya kakharako.

¹⁷Ntheura pa zuŵa ilo ndamkuŵakwiyira ndipo ndamkuŵasida na kubisa chisko chane kwa iwo mwakuti ŵamare petu. Viheni na visuzgo vinandi vyamkuŵawira, ndipo pa zuŵa ilo ŵamkuyowoya kuti asi viheni ivi vyatizira chifukwa chakuti Chiuta wali pamoza na ise chara?

¹⁸Nadi ndamkubisa chisko chane muzuŵa ilo pa chifukwa cha mauheni ghose agho ŵachita, pakuti ŵazgokera ku ŵachiuta ŵanyakhe.

¹⁹“Ntheura lemba sumu iyi ndipo uŵasambizge ŵaIsraele wose. Uŵasambizge kwimba mwakuti yiŵe kaboni wane para nkhwimikana nawo.

²⁰Pakuti para ndaŵanjizga mu charu cha mkaka na uchi cheneicho nkharapa kupereka ku ŵasekuru ŵawo, ŵamkurya, ŵamkukhuta, na kututuŵa chomene ndipo ŵamkuzgokera ku ŵachiuta ŵanyakhe na kuŵateŵetera. Kweni pamanyuma ŵamkundiyuyura na kuswa phangano lane.

²¹Ndipo para viheni vinandi na visuzgo vyaŵawira, sumu iyi yamkuŵa kaboni wane pakuŵasuska, chifukwa yamkuruwika chara ku ŵa mphapu yawo. Pakuti nanga ndi sono nkhumanya maghanoghano agho ŵali nagho pambere ndindaŵanjizge mu charu icho nkharapa kuŵapa.”

²²Ndipo Mozesi wakalemba sumu iyi zuŵa lenelira na kuŵasambizga ŵaIsraele.

²³Penepapo FUMU yikamwimika Yoshuwa mwana wa Nuni pakumuphalira kuti, “Uŵenge wankhongono na wakukhwima mtima. Ndiwe uti urongozgenge ŵaIsraele aŵa kunjira mu charu icho nkharapa kuŵapa. Ine naneso nditi ndiŵenge namwe.”

²⁴Para Mozesi wakamara kulemba mazgu agha gha marango kwambula kurekapo kalikose,

²⁵wakati ku ŵaLevi awo ŵakayeghanga Bokosi la Phangano la FUMU,

²⁶“Torani Buku ili la marango ndipo muliŵike ku mphepete kwa Bokosi la Phangano la FUMU, Chiuta winu kuti liŵenge kaboni wakumususkani.

²⁷Pakuti nkhuŵamanya umo ŵaliri ŵanonono mu mtima na uchigaruka wawo. Iwo ŵanguŵa ŵakuyiwukira FUMU apo ndanguŵa nawo ndipo nkhumanya kuti ŵamkuwukira chomene kwakuruska para ine ndafwa.

²⁸Ntheura muwunganye pamoza ŵarara wose ŵa mafuko, na ŵarongozgi ŵinu mwakuti ndiŵayowoyere mazgu agha kuti ŵajipulikire. Kuchanya na charu cha pasi ndivyo viti viŵenge kaboni wakuŵasuska.

²⁹Pakuti para ndafwa, nadi mwamkunjira mu kwananga na kupatukako ku nthowa iyo ndamuphalirani. Ndipo mu mazuŵa gha umaliro, viheni vyamkumwizirani, pakuti mwamkuchita icho nchiheni panthazi pa FUMU pakuyikwiyiska na milimo yinu yiheni iyo yili kumukanizgani.”

³⁰Ntheura Mozesi wakayowoya mazgu gha sumu iyi kufuma pa kwamba mpaka ku umaliro uko ŵaIsraele wose ŵakupulika.