Read new_tumbuka_bible Marango gha Chiŵiri 32 Bible Online

Marango gha Chiŵiri 32 - new_tumbuka_bible bible

Marango gha Chiŵiri 32

¹Tegherezgani, imwe ŵa kuchanya uko, ine nditi ndiyowoye, pulikani, imwe ŵa mu charu cha pasi, mazgu agho ghakufuma mu mlomo wane.

²Chisambizgo chane chinthonyenge pasi nga ndi vura, ndipo mazgu ghane ghakhirenge nga ndi jumi, nga ndi vura ya muswera pa utheka uŵisi, nga ndi vura ya muswera pa vivwati.

³Ine nditi ndirumbe zina la FUMU, ŵanthu ŵakhe ŵati ŵathuwuske ukuru wa Chiuta withu.

⁴FUMU ndi Jarawe, mlimo wakhe ngwa kufikapo, ndipo nthowa zakhe zose ndi zirunji. Chiuta wakugomezgeka wambula ubendezi, iyo ndi murunji na wakunyoroka.

⁵Kweni imwe ndimwe ŵambula kugomezgeka, ŵambula kwenerera kuŵa ŵanthu ŵakhe, fuko lakubendera na lakupusika.

⁶Imwe ŵanthu ŵakupusa na ŵambula vinjeru, kasi ivi ndivyo mungawezgera FUMU? Asi Chiuta ndiyo Wiskemwe, Mlengi winu, ndiyo wakamuwumbani na kumuzgorani kuŵa fuko.

⁷Kumbukani mazuŵa gha kale, ghanaghanani virimika vya miwiro iyo yili kujumpha. Fumbani ŵawiskemwe, ndipo ŵati ŵamuphalirani. Fumbani ŵararaŵarara ŵinu ndipo ŵati ŵamurongosoreraninge.

⁸Para Chikurukuru wakagaŵiranga mafuko viharo vyawo, para wakapatulanga ŵanthu, wakimika zimphaka zawo, kwakuyana na unandi wa ŵanthu ŵa Chiuta.

⁹Pakuti phande la FUMU ndi ŵanthu ŵakhe, Yakhobe ndiyo chigaŵa cha chiharo chakhe.

¹⁰Wakamusanga mu chiparamba, ku mapopa uko kuli mphomo ya mphepo pera. Wakamuvikirira na kumupwererera, wakamusungilira nga ndi umo wangasungilira mboni ya jiso lakhe.

¹¹Yikachita nga ndi nombo, iyo yikuvikirira chivimbo chakhe, na kukuŵatira pa ŵana ŵakhe. Iyo yikutandaula mapapindo ghakhe, kuti yiŵapokerere ŵana ŵakhe, ndipo yikuŵayegha kuti ŵareke kuwa.

¹²FUMU yekha ndiyo yikamurongozganga, pakaŵavye chiuta munyakhe uyo wakaŵa nayo.

¹³Yikamukwezga kuti wawuse malo gha pachanya gha charu, ndipo wakarya vuna ya mu minda. Wakamulera na uchi wakufuma mu jarawe, na mafuta ghakufuma mu sangalawe.

¹⁴Yikamumweska chambiko kufuma ku ng'ombe na mkaka kufuma ku mberere. Yikamuryeska nyama za ŵana-mberere na za mbuzi zakututuŵa, ndiposo na za mberere zanarume ziweme za ku Bashani. Yikamuryeska tirigu muweme, ndiposo wakamwa vinyo muchesamu kufuma mu mpheska.

¹⁵“Kweni Yeshuruni wakatutuŵa, wakakana na kurongozgeka, wakatutuŵa, na kuŵa mukomi na wa thupi lakunyiririka. Ndipo wakamusida Chiuta Mlengi wakhe, ŵakayuyura Jarawe, Chiponosko chakhe.”

¹⁶FUMU yikaŵa na sanje chifukwa cha ŵachiuta ŵawo ŵachilendo, ŵakayikwiyiska chifukwa cha ŵangoza ŵawo ŵa ukazuzi.

¹⁷Ŵakapereka sembe ku viŵanda, ivyo vikaŵa ŵachiuta chara, ŵachiuta awo ŵakaŵamanyapo na kale chara, ŵachiuta ŵaphya awo ŵakiza pamanyuma, awo ŵasekuru ŵawo kuti ŵakaŵa chindikanga chara.

¹⁸Mukareka Jarawe ilo likamulengani, mukaruwa Chiuta winu uyo wakumubabani.

¹⁹FUMU yikachiwona ichi ndipo yikaŵajowola, chifukwa ŵana ŵakhe ŵakayikwiyiska.

²⁰FUMU yikati, “Nditi ndiŵarazgire nkhonyoro, kuti ndiwone umo umaliro wawo uti uŵirenge. Pakuti ndi muwiro wakubendera, ŵana ŵeneawo ŵalije chigomezgo.

²¹Ŵakandichitiska kuti ndiŵe na sanje na icho kuti chiuta chara, ŵakandikwiyiska chifukwa cha ŵangoza wawo. Ntheura nditi ndavye mitima yawo ku sanje pa awo kuti ndi fuko chara. Ine nditi ndiŵayavye na fuko lakupusa.

²²Pakuti ukari wane wagolera nga ndi moto, ukulilima mpaka kusi ku malo gha ŵanthu ŵakufwa, ukumyangura charu na vuna yakhe, na kocha malufura gha mapiri.

²³“Nditi ndiwunjike viheni pa iwo, ndipo nditi ndimalire mivwi yane pa iwo.

²⁴Nditi ndiŵasuzge na njara yakofya, nditi ndiŵamyangure na nthenda na vilengo vyakukoma. Nditi ndiŵatumire vikoko kuti viŵatwazure, na zinjoka za vipiri izo zikupereka urwirwi kuti ziŵarume.

²⁵Mu misewu, ŵati ŵamkufwa na nkhondo, ndipo mu zinyumba zawo ŵamkufwanga na chitenthe. Ŵanyamata na ŵasungwana, ŵati ŵafwenge, ŵabonda na ŵasekuru ŵati ŵamarenge wose.

²⁶“Ine nkhati, nditi ndiŵambininiskire kutali, ndipo ndimarizgenge chakuŵakumbukirapo pa charu cha pasi.

²⁷Kweni nkhopa kusekeka na ŵarwani ŵawo, mzire ŵajikuzge pakuyowoya kuti, ‘Nkhongono zithu ndizo zaŵatonda, kuti ndi FUMU chara iyo yachita ivi.’

²⁸“Pakuti ndi fuko lambula urongozgi, mwa iwo mulije kumanyiska vinthu.

²⁹Ŵaŵenge ŵavinjeru, mphanyi ŵachimanyiska ichi, mphanyi ŵakuchiwona icho chamkuŵawira pa umaliro.

³⁰Kasi yumoza wangachimbizga uli ŵanthu 1,000, ndipo ŵanthu ŵaŵiri wangachimbizga uli ŵanthu 10,000? Pekhapekha para Jarawe lawo laŵaguliska, pekhapekha para FUMU yaŵapereka.

³¹Ŵarwani ŵakumanya kuti ŵangoza ŵawo ŵalije nkhongono, kuti ŵakuyana na Chiuta wa ŵaIsraele chara.

³²Ŵarwani aŵa mbakwanangika, nga mba ku Sodomu na Gomora. Ŵali nga ndi khuni la mpheska, ilo likupambika vipambi vyakuŵaŵa ndipo makunje ghakhe ghakukoma.

³³Ŵali nga ndi vinyo wakusazgako mata gha njoka, urwirwi wakukoma wa njoka ya chipiri.

³⁴“Asi ichi ndachisungilira mwa ine ndipo asi ndachimatira mu nthamba zane?

³⁵Kuwezgera nduzga nkhwane, ndipo ine ndine nditi ndipereke njombe, pa nyengo iyo ŵati ŵateremukire pasi. Zuŵa la soka lawo laneng'enera, zuŵa la kumara kwa awo likwiza maluŵiro.

³⁶FUMU yizamkweruzgira makora ŵanthu ŵakhe, yizamkuŵa na chiwuravi na ŵateŵeti ŵakhe, para yikuwona kuti nkhongono zawo zamara, ndipo palije na yumoza wakukharako muzga panji mwanangwa.

³⁷FUMU yamkufumba kuti, ‘Kasi ŵachiuta ŵawo ŵali nkhu, jarawe leneilo ŵakaphokwerangamo?

³⁸Ŵachiuta awo wakaryanga mafuta gha sembe zawo, na kumwanga vinyo la sembe zawo za vyakumwa? Rekani ŵawuke kuti ŵamovwirani, ŵawuke kuti ŵamuvikirirani.

³⁹“ ‘Wonani sono kuti ine, ine pera, ndine Chiuta, palije Chiuta munyakhe pa dera pa ine. Ine nkhukoma, ndipo nkhuperekaso umoyo, nkhupweteka, ndipo nkhupozgaso, kulije na yumoza uyo wangapokeska kufuma mu mawoko ghane.

⁴⁰Nkhukwezgera woko lane kuchanya, na kurapa kuti, nkhurapa nadi kwa muyirayira.

⁴¹Para ndanora lupanga lwane lakung'azima, ndipo ine ndalukora kupereka weruzgi wakunyoroka, nkhuwezgera nduzga pa ŵarwani ŵane, ndipo nditi ndiŵalange awo ŵakunditinkha.

⁴²Mivwi yane yamkuchesama na ndopa zawo, lupanga lwane lwamkurya nyama zawo. Lwamkuŵa na ndopa za ŵakukomeka na za ŵazga, lwakudumula mitu ya masisi ghatalighatali ya ŵarwani.’

⁴³“Imwe ŵamitundu, rumbani ŵanthu ŵakhe. Pakuti wakuwezgera nduzga pa ndopa za ŵateŵeti ŵakhe, ndipo wakuwezgera nduzga pa ŵavimphindikwa ŵakhe, na kuwuskamo kwananga mu charu cha ŵanthu ŵakhe.”

⁴⁴Mozesi wakiza pamoza na Yoshuwa mwana wa Nuni ndipo wakayowoya mazgu ghose gha sumu iyi apo ŵanthu wose ŵakupulika.

⁴⁵Para Mozesi wakamara kuyowoya mazgu ghose agha ku ŵaIsraele wose,

⁴⁶wakatiso kwa iwo, Sungilirani mu mitima yinu mazgu ghose agha agho nkhumuchenjezgani muhanya uno mwakuti imwe namwe mughasambizge ku ŵana ŵinu kuti ŵapulikire mazgu ghose gha marango agha.

⁴⁷Mazgu agha kuti ngawaka chara. Gheneagha ndiwo umoyo winu. Mughapulikenge kuti muŵe na umoyo utali mu charu icho mukuratako kuya kachipoka kuŵa chinu ku sirya la mronga wa Yorodani.

⁴⁸Mu zuŵa leneilo pera FUMU yikamuphalira Mozesi yikati,

⁴⁹“Kwerera ku phiri ili la Abarimu, leneilo nchigaŵa cha Phiri la Nebo ilo liri mu charu cha Mowabu, kuthyana na msumba wa Yeriko. Ndiko ukachiwonere charu cha Kanani icho nkhuchipereka ku ŵaIsraele kuŵa chiharo chawo.

⁵⁰Iwe wamkufwira mu phiri leneilo wakwera na kuŵa pamoza na ŵabali ŵako nga ndi umo mukuru wako Aroni wakafwira pachanya pa Phiri la Horo ndipo wakalonda ŵasekuru ŵakhe.

⁵¹Muti mufwirenge pa phiri chifukwa mose mwa ŵaŵiri mukaŵa ŵambula kugomezgeka kwa ine panthazi pa ŵaIsraele, para mukaŵa pa maji gha pa Meriba Kadeshi mu mapopa gha Zini ndiposo mukareka kundichindika nga wakupatulika mukati mu ŵaIsraele.

⁵²Ntheura uti uchiwonerenge patali charu icho nkhupereka ku ŵaIsraele kuŵa chawo. Kweni iwe kuti uti unjirengemo chara.”