Read new_tumbuka_bible Marango gha Chiŵiri 33 Bible Online

Marango gha Chiŵiri 33 - new_tumbuka_bible bible

Marango gha Chiŵiri 33

¹Mozesi, munthu wa Chiuta, apo wakaŵa wachali wandafwe, wakapereka vitumbiko ivi kwa ŵaIsraele.

²FUMU yikiza kufuma ku Phiri la Sinayi. Yikafuma nga ndi dazi kufumira ku Edomu ndipo yikatiwalira kufumira mu Phiri la Parani. Yikiza kufumira kuchanya pamoza naŵangelo vikwi khumi, na dimi la moto ku woko lakhe la maryero.

³Inya, imwe FUMU, ndimwe mukutemwa ŵanthu ŵinu, wose awo ŵali kupatulikira imwe, ŵali mu woko linu. Wose ŵakujikama mu malundi ghinu, ndipo kwa imwe ŵakupokera urongozgi,

⁴uwo ndi marango agho Mozesi wakatipa, gheneagha ndi usambazi wa fuko la Yakhobe

⁵Ntheura FUMU yikaŵa karonga ya Yeshuruni, para ŵararaŵarara ŵa ŵanthu ŵakawungana, pamoza na mafuko ghose gha Israele.

⁶Pakuyowoya za fuko la Rubeni, Mozesi wakati, “Rubeni wakhalirire wamoyo, wareke kufwa, kweni ŵanthu ŵakhe ŵachoko.”

⁷Pakuyowoya za fuko la Yuda, wakati, “Mwe FUMU, pulikani kulira kwa Yuda. Mumutorere ku ŵanthu ŵa fuko lakhe. Mumukhozge kuti wajivikirire yekha, ndipo mumovwire kuti warwe na ŵarwani ŵakhe.”

⁸Pakuyowoya za fuko la Levi, wakati: “Mupani Levi Tumimu winu, ndipo Urimu ku muteŵeti winu wakutemweka. Mukamuyezga pa Masa, mukalimbana nayo pa maji gha Meriba.

⁹Iyo wakayowoya vya ŵawiske na ŵanyina kuti, ‘Ine kuti nkhughanaghanako vya imwe chara’. Ŵabali ŵakhe wakaŵasunjizga, ŵana ŵakhe na ŵakhe wakaŵaruwa. Kweni wakapulikira mazgu ghinu, na kusunga phangano linu.

¹⁰Iyo wakusambizga Yakhobe maweruzgo ghinu, ndipo marango ghinu kwa Israele. Ndiyo wakocha vyakununkhira panthazi pinu, wakocha sembe za mburuma pa jochero linu.

¹¹Mwe FUMU, tumbikani mphango zakhe, ndipo mukondwe na milimo ya mawoko ghakhe. Phyorani miwongo ya ŵarwani ŵakhe, ya awo ŵakumutinkha kuti ŵareke kuŵakoso.”

¹²Pakuyowoya za fuko la Benjamini, wakati, “Fuko ili ndilo FUMU yikulitemwa na kulivikirira. Yikuŵasungilira zuŵa na zuŵa, ndipo ŵakukhara mu chimango mu chipakato chakhe.”

¹³Pakuyowoya za fuko la Yosefe, wakati, “FUMU yitumbike charu chakhe, na chawanangwa cha vura yinandi, na vyakufumira mu ndimba ya kusi ku charu.

¹⁴Charu chakhe chiŵe na vipambi viweme vyakucha na dazi, vipambi viweme vyakucha mwezi na mwezi,

¹⁵na vipambi viweme kufuma mu mapiri gha kale na kale, vipambi vyakuzara viweme vya mu tumapiri twa muyirayira,

¹⁶na vinthu vyakuzirwa vya mu charu, ndiposo na vyose ivyo vili mwenemumo, pamoza na kutemwa kwa uyo wakaŵa mu chivwati. Vyose ivi viŵe pa Yosefe, pa chisko chakhe uyo ngwa mazaza pa ŵana ŵanyakhe.

¹⁷Nkhambako yakhe yakwamba kubabika yili na ufumunkhuru. Masengwe ghakhe ghali nga ndi masengwe gha njati. Na gheneagha wati wapweteke ŵamitundu, inya ŵamitundu wose, na kuŵachimbizgira ku mphererekezgo za charu. Masengwe agha ndi ŵanthu 10,000 vya Efurayimu, na ŵanthu vikwi vya Manase.”

¹⁸Pakuyowoya za fuko la Zebuloni na Isakara, wakati, “Iwe Zebuloni, kondwera pa maulendo ghako, iwe Isakara, kondwera mu mahema ghako.

¹⁹Iwo ŵati ŵachemere ŵamitundu ku mapiri ghawo, uko ŵakupereka sembe zakunyoroka. Pakuti usambazi wawo ukufumira mu nyanja, chuma chakubisika kufumira mu muchenga.”

²⁰Pakuyowoya za fuko la Gadi, wakati, “Warumbike Chiuta uyo wakusanuzga mphaka za Gadi. Gadi wakuwanchama nga ndi umo yikuchitira nkharamu yanakazi kupweteka mawoko na maluwombo gha mitu ya ŵanthu.

²¹Iyo wakajisankhira charu chiweme kwa kuruska, pakuti wakaŵa na mazaza gha ufumu, para ŵarongozgi ŵa ŵaIsraele ŵakawungana pamoza, wakafiska marango gha FUMU, ndiposo na maweruzgo ghakhe.”

²²Pakuyowoya za fuko la Dani, wakati, “Dani ndi mwana wa nkharamu, mweneuyo wakurotoka kufuma ku Bashani.”

²³Pakuyowoya za fuko la Nafutali, wakati, “FUMU yili na uchizi chomene na Nafutali, ndipo yamutumbika chomene, wamkupoka charu cha nyanja na cha ku mwera.”

²⁴Pakuyowoya za fuko la Ashere, wakati, “Ashere ndiyo wakutumbikika kuruska ŵabali ŵakhe, waŵenge wakutemweka mukati mu ŵabali ŵakhe, ndipo malundi ghakhe ghakandenge mu mafuta.

²⁵Mphingirizgo zako zamkuŵa za visulo na vya mkuŵa, nkhongono zakhe zikhalirire nga ndi mazuŵa gha umoyo wako.”

²⁶“Palije chiuta munyakhe wakuyana na Chiuta wa Yeshuruni, mweneuyo wakwenda mu uchindami wa mlengalenga, na kugara pa maŵingu pakwiza kuti wakovwire.

²⁷Chiuta wa muyirayira ndiyo chiphokwero chako, ndipo pano pasi wakukusunga na nkhongono ghakhe. Ndiyo wakachimbizga ŵarwani ŵako wose panthazi zako, ndipo wakati, ‘Muŵamare petu.’

²⁸Ntheura ŵaIsraele ŵati ŵakharenge mu mutende, fuko la Yakhobe lamkuvikiririka, mu charu umo tirigu na vinyo kuti vikusoŵa chara, ndipo jumi likunthonya waka kufuma kuchanya.

²⁹Mwe ŵaIsraele, ndimwe wakutumbikika! Kasi ndi njani wakukozgana na imwe, imwe muli kuponoskeka na FUMU? FUMU yekha ndiyo nguru na wovwiri winu, na lupanga lwinu lwakutondera. Ŵarwani ŵinu ŵamkwiza na kumulambirani, ndipo imwe mwamkuŵakandira pasi.”