Read new_tumbuka_bible Marango gha Chiŵiri 34 Bible Online

Marango gha Chiŵiri 34 - new_tumbuka_bible bible

Marango gha Chiŵiri 34

¹Penepapo Mozesi wakakwera Phiri la Nebo kufuma mu madambo gha Mowabu mpaka wakaya kafika pachanya pa Phiri la Pisiga kuthyana na Yeriko. Kwenekura FUMU yikamurongora charu chose, kufuma ku Gileyadi mpaka kufika ku charu cha Dani,

²charu chose cha Nafutali, cha Efurayimu, cha Manase, charu chose cha Yuda, mpaka ku manjiliro gha dazi gha Nyanja ya Meditereniya.

³Wakamulongoraso chigaŵa cha ku mwera, chidika cha dambo la Yeriko, msumba wa mikama mpaka ku msumba wa Zowara.

⁴FUMU yikati kwa Mozesi, “Ichi ndicho charu icho nkharapa kwa Abrahamu, kwa Yisake, na kwa Yakhobe kuti ndamkuchipereka ku mphapu yawo. Ndakurongora kuti uchiwone na maso ghako, kweni iwe kuti wambukirengeko chara.”

⁵Ntheura Mozesi wakafwira kwenekura mu charu cha Mowabu kwakuyana na mazgu gha FUMU.

⁶FUMU yenecho ndiyo yikamusunga mu chidika cha Mowabu kuthyana na msumba wa Beti Peyoro, kweni palije munthu na yumoza uyo wakumanya apo pali dindi lakhe kufika mpaka sono.

⁷Pa nyengo iyo Mozesi wakafwiranga, wakaŵa na virimika 120, maso ghakhe ghakaŵa ghachali kulaŵiska makora ghene ndipo nkhongono zakhe nazo zikaŵa zichali waka.

⁸ŴaIsraele ŵakamulira Mozesi mu madambo gha Mowabu mazuŵa 30. Penepapo mazuŵa ghakumulira na kumutengerera Mozesi ghakamara.

⁹Ntheura Yoshuwa mwana wa Nuni, wakazura na mzimu wa vinjeru, pakuti Mozesi wakaŵikapo mawoko ghakhe pa iyo. Ntheura ŵaIsraele ŵakamupulikiranga Yoshuwa na kuchita nga ndi umo FUMU yikamuphalirira Mozesi.

¹⁰Kufuma nyengo yeneyira kuti kukaŵakoso nchimi yinyakhe chara mu Israele yakuyana na Mozesi yeneiyo yikawonananga na FUMU maso na maso.

¹¹Palije nchimi yinyakhe iyo yikachita vimanyikwiro na vyakuzizwiska nga ndi ivyo FUMU yikaphalira Mozesi kuti wachite panthazi pa Faro, pa ŵateŵeti ŵakhe ndipo na pa charu chakhe chose cha Eguputo.

¹²Pakuti palije nchimi yinyakhe iyo yikachitapo vinthu vikuru na vyakofya vyakuyana na ivyo wakachita Mozesi panthazi pa Israele wose.