Read new_tumbuka_bible Marango gha Chiŵiri 5 Bible Online

Marango gha Chiŵiri 5 - new_tumbuka_bible bible

Marango gha Chiŵiri 5

¹Mozesi wakachema ŵaIsraele wose pamoza na kuti kwa iwo, Imwe ŵaIsraele pulikani marango na vilayizgo ivyo nkhumupani muhanya uno mwakuti mughasambire mughasunge na kughachita.

²FUMU, Chiuta withu wakachita phangano na ise mu Phiri la Sinayi.

³FUMU yikachita phangano ili na ŵasekuru ŵithu chara, kweni na ise tose, taŵeneise tili ŵamoyo muhanya uno.

⁴FUMU yikayowoya kwa imwe maso na maso kufuma mu moto para pa phiri.

⁵Pa nyengo yira, ine nkhimilira pakati pa FUMU na imwe kumuphalirani imwe mazgu gha FUMU, pakuti imwe mukopanga moto ndipo kuti mukakwera phiri chara. FUMU yikati,

⁶“ ‘Ine ndine FUMU, Chiuta wako, uyo wakakufumya mu Eguputo, charu cha uzga.’ ”

⁷“ ‘Ungaŵanga na ŵachiuta ŵanyakhe pa dera pa ine.’ ”

⁸“ ‘Ungajipangiranga chikozgo chakuŵaja, panji chikozgo cha kanthu kalikose ako kali kuchanya, panji ako kali pasi pa charu, panji ako kali mu maji pasi pa charu.

⁹Ungajikamiranga chikozgo chilichose panji nesi kuchilambira. Pakuti ine FUMU, Chiuta wako ndine Chiuta wa sanje wakulanga ŵana chifukwa cha maubendezi gha ŵawiskewo kuya kafika ku muwiro wa chitatu na wa chinayi wa awo ŵakunditinkha.

¹⁰Kweni nkhuŵachitira chisungusungu ŵanthu vikwivikwi awo ŵakunditemwa na kusunga marango ghane.’ ”

¹¹“ ‘Ungazunuranga zina la FUMU, Chiuta wako pa waka. Pakuti FUMU kuti yiti yirekenge kumupa mrandu chara, yose uyo wakuzunura zina lakhe pa waka.’ ”

¹²“ ‘Sunga zuŵa la Sabata na kulipatula, nga ndi umo FUMU, Chiuta winu wakamulangulirani.

¹³Mu mazuŵa ghankhonde na limoza uchitenge mlimo wako na kuwumarizga wose.

¹⁴Kweni zuŵa la chinkhonde na chiŵiri ndi Sabata kwa FUMU, Chiuta wako. Pa zuŵa ili ungachitanga mlimo uliwose, manyi ndiwe, panji mwana wako mwanarume panji mwanakazi, panji muteŵeti wako mwanarume panji mwanakazi, panji nkhaŵi yako, panji mbunda yako, panji chakuŵeta chako chilichose, panji mulendo wako uyo wakukhara nawe mu chikaya, mwakuti muteŵeti wako mwanarume panji mwanakazi ŵapumule nga ndiwe.

¹⁵Mukumbukenge kuti imwe namwe mukaŵa ŵazga mu charu cha Eguputo ndipo FUMU, Chiuta winu wakamufumyani mu charu chira na nkhongono na woko lakhe lakutambazuka. Ntheura FUMU, Chiuta wako wakalangula kuti ukumbukenge kusunga zuŵa la Sabata.’ ”

¹⁶“ ‘Chindika ŵawuso na ŵanyoko nga ndi umo FUMU, Chiuta wako wakakulangulira mwakuti mazuŵa ghako ghaŵe ghanandi na kuti kukuŵirenge makora mu charu icho FUMU, Chiuta wako wakukupa iwe.

¹⁷“ ‘Ungakomanga.

¹⁸“ ‘Ungaleŵanga.

¹⁹“ ‘Ungibanga.

²⁰“ ‘Ungaŵanga kaboni wa utesi pa muzengezgani wako.

²¹“ ‘Ungadokeranga muwoli wa munyako nanga ndi nyumba yakhe, munda wakhe, panji muteŵeti wakhe mwanarume panji mwanakazi, nkhaŵi yakhe panji mbunda yakhe, nanga ndi kanthu kalikose ako nkha muzengezgani wako.’

²²“Agha ndi marango agho FUMU yikayowoya kwa imwe para mukawungana mose pamoza pa phiri. Fumu yikayowoyanga mazgu agha kufumira mu moto, mu bingu, na mu mdima wakuti waka bii kwambula kusazgirako kanthu kanyakhe chara. Pa umaliro yikaghalemba marango agha pa mawe ghapapati ghaŵiri na kughapereka kwa ine.”

²³“Para mukapulika mazgu gha FUMU kufumira mukati mu mdima wakuti bii apo phiri likagoleranga moto, ŵarongozgi ŵa mafuko ghinu na ŵararaŵarara ŵinu ŵakiza kwa ine.

²⁴Iwo ŵakati, ‘FUMU, Chiuta withu watirongora uchindami wakhe na ukuru wakhe, ndipo tapulika mazgu ghakhe wakuyowoya kufumira mu moto. Muhanya uno tawona kuti munthu wangaŵa wamoyo nangauli Chiuta wangayowoyanayo.

²⁵Kasi sono titifwirengechi? Moto wakofya uwu utimyangurenge ndipo titifwenge usange tikurutilira kupulika mazgu gha FUMU, Chiuta withu.

²⁶Pakuti ndi munthu wa moyo nju uyo wali kupulikapo mazgu gha Chiuta wamoyo kufumira mukati mu moto nga ndise na kukhara wamoyo?

²⁷Iwe, Mozesi ndiwe usenderere kufupi na kupulika vyose ivyo FUMU, Chiuta withu wati wayowoye. Pamanyuma uzakatiphalire waka vyose ivyo FUMU, Chiuta withu wati wayowoye nawe. Ise titi tipulike na kuvichita.’ ”

²⁸“FUMU yikapulika mazgu ghinu para mukayowoya kwa ine, ndipo yikati kwa ine, ‘Ndapulika mazgu gha ŵanthu aŵa, gheneagho wayowoya kwa iwe. Vyose ivyo ŵayowoya ndi viweme.

²⁹Mphanyi ŵaŵa na mtima wa ntheura mazuŵa ghose kundichindika na kusunga marango ghane ghose mwakuti kuŵaŵire makora iwo na ŵana ŵawo kwa muyirayira.

³⁰Werera, ndipo ukaŵaphalire kuti, “Ŵawerere ku mahema ghawo.”

³¹Kweni iwe, ukhare danga na ine kuno mwakuti ndikupe marango ghane ghose na vilayizgo vyose vyeneivyo ukwenera kuŵasambizga iwo kuti ŵaghasunge mu charu icho nkhumupani kuti chiŵe chinu.’ ”

³²“Ntheura muŵe maso kuti muchitenge vyose ivyo FUMU, Chiuta winu wakamulangulani. Mureke kuzgokera uku na uku.

³³Mwendenge mu nthowa zose izo FUMU, Chiuta winu wali kumulangulani mwakuti muŵe ŵamoyo ndipo kumuŵirani makora na kuti mazuŵa gha umoyo winu ghaŵenge ghanandi mu charu icho muti mupokerere kuŵa chinu.”