Read new_tumbuka_bible Marango gha Chiŵiri 8 Bible Online

Marango gha Chiŵiri 8 - new_tumbuka_bible bible

Marango gha Chiŵiri 8

¹“Marango ghose agho nkhumupani muhanya uno mukaŵikengepo mtima pakughachita mwakuti mukhare ŵamoyo, na kwandana ndipo munjire na kuya kapoka charu cheneicho FUMU yikarapa kupereka ku ŵasekuru ŵinu kuti chiŵe chinu.

²Mukumbukenge umo FUMU, Chiuta winu wakamurongozgerani mu nthowa yose ya mu mapopa pa virimika ivi 40 mwakuti mumanye kujiyuyura ndipo ŵakamuyezgani kuti ŵamanye ivyo vikaŵa mu mitima yinu usange mungapulikira marango ghakhe panji chara.

³Wakamukhizgani na kumukharikani na njara, ndipo ŵakamupani mana kuti murye, cheneicho imwe nanga mbasekuru ŵinu kuti ŵakachimanya na kale chara. FUMU yikachita vyose ivi kuti yimusambizgani kuti munthu wakukhara wamoyo chifukwa cha chingwa pera chara kweni na mazgu ghose agho FUMU yikuyowoya.

⁴Mu virimika ivi 40, vyakuvwara vyinu kuti vikamara chara nanga ndi malundi ghinu kuti ghakatupa chara.

⁵Ntheura manyani ichi kuti nga ndi umo munthu wakulangira mwana ŵakhe ndimo FUMU, Chiuta winu wakupereka chisambizgo cha nkharo kwa imwe.

⁶Ntheura imwe muchitenge nga ndi umo FUMU yikumulangulirani. Mwendenge mu nthowa zakhe ndipo muyiwopenge.

⁷Pakuti FUMU, Chiuta winu wakumutorerani mu charu chiweme, cha mironga ya maji, cha visimi, cha zimbwiwi vyeneivyo vili mu madambo na mu mapiri.

⁸Charu cha vyakurya nga ndi tirigu, nyauti, mpheska, vikuyu, magalagadeya, makuni gha olive na uchi.

⁹Cheneichi ndi charu icho kuti mwamkuŵa njara chara nesi kusoŵerwa kalikose. Charu ichi ncha mawe gha visulo ndipo mwamkujimanga mkuŵa kufuma mu mapiri ghakhe.

¹⁰Para mwakurya na kukhuta, mukarumbenge FUMU, Chiuta winu chifukwa cha charu chiweme icho wamupani.

¹¹“Chenjerani kuti mureke kuruwa FUMU, Chiuta winu pakureka kupulikira marango ghakhe ghose agho nkhumupani muhanya uno.

¹²Para mwakarya na kukhuta ndipo mwazenga zinyumba ziweme na kukharamo,

¹³ng'ombe, mberere na mbuzi zinu nazo zandana, ndarama zinu za siliva na za golide nzinandi, ndipo vyose ivyo muli navyo nvinandi,

¹⁴penepapo mukareke kujikuzga mu mitima yinu na kuruwa FUMU, Chiuta winu mweneuyo wakamufumyani mu Eguputo mu charu cha uzga.

¹⁵Iyo ndiyo yikamurongozgani mu mapopa ghara ghakuru na ghakofya, mwenemumo mukaŵa njoka za urwirwi, na ŵakalizga, charu cha chinkhamwa na chambula maji. Ndipo iyo wakamupani maji kufuma mu jarawe la sangalawe.

¹⁶Ndiyo wakamupani mana kuti murye mu mapopa gheneagho ŵasekuru ŵinu kuti ŵakaghamanya chara kuti wamukhizgani na kumuyezgani mwakuti pa umaliro vimwenderani makora.

¹⁷Ntheura muchenjere kuti mureke kuyowoya mu mitima yinu kuti, ‘Ndasanga usambazi wose uwu kufumira mu mazaza na nkhongono zane.’

¹⁸Kweni mukumbukenge FUMU, Chiuta winu, pakuti ndiyo wakumupani nkhongono zakusangira usambazi, mwakuti wakhozge phangano lakhe ilo wakarapira ŵasekuru ŵinu nga ndi umo kuliri muhanya uno.

¹⁹Usange mwaruwa FUMU, Chiuta winu na kurondezga ŵachiuta ŵanyakhe pakuŵateŵetera na kuŵasopa, muhanya uno nkhumuchenjezgani chomene kuti nadi muti mumarenge petu.

²⁰Usange muti mupulikirenge FUMU, Chiuta winu chara muti mumarenge petu nga ndi umo FUMU yikamalira mafuko panthazi pinu.