Read new_tumbuka_bible Marango gha Chiŵiri 9 Bible Online

Marango gha Chiŵiri 9 - new_tumbuka_bible bible

Marango gha Chiŵiri 9

¹“Tegherezgani imwe ŵaIsraele. Muhanya uno muti mwambukenge mronga wa Yorodani kuya kanjira na kuchimbizga mafuko ghakuru na gha nkhongono kuruska imwe gheneagho ghali na misumba yikuru na malinga ghatali mpaka kuchanya.

²Ŵanthu ŵakhe mbankhongono na ŵatali, ŵeneawo mbazukuru ŵaAnaki awo mukuŵamanya ndipo muli kupulikapo lumbiri lwawo kuti, ‘Kasi ndi njani uyo wangima na ŵaAnaki?’

³Kweni mumanyiskike muhanya uno kuti FUMU, Chiuta winu ndiyo wakumudangirirani panthazi nga ndi moto wakumyangura. Wati waŵamare petu na kuŵathereska panthazi pinu. Ntheura imwe mwamkuŵachimbizga na kuŵaparanya mwaluŵiro nga ndi umo FUMU yikapanganirana kumuchitirani.

⁴“Para FUMU, Chiuta winu waŵachimbizga panthazi pinu, mungayowoyanga mu mtima winu kuti, ‘FUMU yatitorera kuno kuti tipoke charu icho chifukwa cha urunji withu’. Mureke kuyowoya ichi, pakuti FUMU yachimbizga mafuko agha chifukwa cha kwananga.

⁵Kuti mukuya kanjira na kupoka charu chira pa chifukwa cha urunji winu chara panji chifukwa cha kunyoroka kwa mitima yinu chara. Kweni mwamkunjira chifukwa cha kwananga kwa mafuko agha gheneagho FUMU, Chiuta winu wakughachimbizga na kughafumyamo panthazi pinu, mwakuti ŵafiske mazgu agho ŵakarapa ku ŵasekuru ŵinu Abrahamu, Yisake na Yakhobe.

⁶Ntheura manyiskani ichi kuti FUMU, Chiuta winu kuti wakumupani charu ichi chiweme kuŵa chinu chifukwa cha urunji winu chara pakuti imwe ndimwe ŵanthu ŵa mitima yinonono.

⁷“Kumbukani ichi ndipo mureke kuruwa umo mukayavyira FUMU Chiuta winu ku ukari mu mapopa, kwamba pa zuŵa lira mukafumira mu charu cha Eguputo mpaka apo mukafikira kuno, mwanguŵa ŵakuwukira FUMU.

⁸Pa Phiri la Sinayi, mukayavya FUMU ku ukari. Ntheura yikakaripa chomene mwakuti yikatenge yimumarani petu.

⁹Para ine nkhakwera phiri kukapokera mawe ghaŵiri agho pakalembekapo phangano ilo FUMU yikachita na imwe, nkhakharako kwenekura mazuŵa 40, muhanya na usiku, kwambula kurya chakurya chilichose nesi kumwa maji.

¹⁰Ntheura FUMU yikandipa mawe ghapapati ghaŵiri ghara gheneagho iyo yekha yikalemba na woko lakhe vyose ivyo yikayowoya kwa imwe kufuma mu moto pa zuŵa ilo imwe mukawungana pamoza pa phiri.

¹¹Ndipo pa umaliro wa mazuŵa 40 muhanya na usiku, FUMU yikandipa mawe ghapapati ghara agho yikalembapo phangano.

¹²“Penepapo FUMU yikati kwa ine, ‘Wukapo pano, ukhire luŵiro chifukwa ŵanthu ŵako awo ukaŵafumya mu Eguputo ŵajinangiska. Ŵafumamo luŵiro mu nthowa iyo nkhaŵalangula kuti ŵendengemo pakujipangira chikozgo chakusongonora.’ ”

¹³FUMU yikatiso kwa ine, “Ndaŵawona ŵanthu kuti nadi mbanthu ŵa mitima yinonono.

¹⁴Ureke kundijandizga. Ine nkhukhumba kuŵamara ŵanthu na kusisita zina lawo pa charu cha pasi kweni iwe nditi ndikuzgore fuko lankhongono na kukwandaniska kuruska iwo.”

¹⁵Ntheura nkhafumako na kwikha kufuma mu phiri ilo likagoleranga moto. Mawe ghapapati ghaŵiri gha phangano ghara ghakaŵa mu mawoko ghane ghaŵiri.

¹⁶Para nkhati ndalaŵiska, nkhawona kuti mwayinangira nadi FUMU, Chiuta winu. Mukajipangira chikozgo chakusongonora chakuwoneka nga ndi mwana wa ng'ombe. Mukapuruka maluŵiro mu nthowa iyo FUMU yikamulangulani.

¹⁷Ntheura nkhatora mawe ghapapati ghaŵiri ghara na kughaponya pasi na mawoko ghane ghaŵiri ndipo nkhaghaswera pa maso pinu.

¹⁸Ntheura nkhajikamaso pasi panthazi pa FUMU pa mazuŵa 40 muhanya na usiku kwambula kurya chakurya chilichose nanga nkhumwa maji, chifukwa cha kwananga kwinu kose uko mukachita pakuchita uheni panthazi pa FUMU na kuyikwiyiska.

¹⁹Ine nkhopa ukari na kukwiyiskika kukuru kwa FUMU uko yikaŵa nako pa imwe pakuti yikaŵa pafupi kumumarani petu. Kweni kachiŵiriso FUMU yikandipulika kuŵeyerera kwane.

²⁰Ndipo FUMU yikakaripiraso Aroni chomene mwakuti yikaŵa pafupi kumumara tetete, ntheuraso nkhamuŵeyerera Aroni pa nyengo yeneyira.

²¹Penepapo nkhatora chinthu chiheni chira, mwana wa ng'ombe yura ŵakapanga na kocha pa moto. Nkhaswa tuchokotuchoko na kusira chomene tukasuka tukaŵa nga ndi fuvu ndipo nkhathira fuvu lakhe mu kamronga ako kakakhiranga kufumira mu phiri.

²²Mukayikaripiska FUMU para mukaŵa pa malo gha Tabera, Masa, na pa Kibiroti Hataava.

²³Para FUMU yikamutumani kufuma mu Kadeshi Baraneya kuti mukatore charu icho yikamupaninge, imwe mukakana kupulikira languro la FUMU, Chiuta winu. Kuti mukayigomezga nanga kuyipulikira FUMU chara.

²⁴Kufuma pa nyengo iyo nkhamumanyirani imwe, mwaŵa ŵakuyiwukira FUMU.

²⁵Ntheura nkhajikama panthazi pa FUMU na kumuŵeyererani mu mazuŵa ghara chifukwa yikatenge yimumarani petu.

²⁶Nkharomba FUMU kuti, “Mwe FUMU Chiuta mungaŵamaranga chara ŵanthu awo mbinu ŵeneawo mukaŵawombola na kuŵafumiska mu Eguputo na nkhongono zinu zikuru.

²⁷Kumbukani ŵateŵeti ŵinu Abrahamu, Yisake na Yakhobe ndipo mureke kulaŵiska pa unonono wa mitima ya ŵanthu aŵa, pa ubendezi wawo nanga mpha kwananga kwawo.

²⁸Usange mungaŵamara petu, ŵaEguputo ŵeneawo mutifumyemo ŵati ŵayowoye kuti, FUMU yikaŵavye nkhongono kuti yiŵanjizge mu charu icho yikapangana nawo, ndiposo yikaŵatinkha ndicho chifukwa yikaŵafumya na kuŵakomera mu mapopa.

²⁹Ndipouli ŵeneaŵa mbanthu ŵinu awo mukaŵasankha kuti ŵaŵe ŵinu na ŵinu na kuwafumya mu Eguputo na nkhongono zinu zikuru na woko linu lakutambazuka.”