Read new_tumbuka_bible Yohane 10 Bible Online

Yohane 10 - new_tumbuka_bible bible

Yohane 10

¹Yesu wakati, “Inya, inya nadi, nkhumunenerani, kuti yose uyo wakureka kunjira pa muryango wa chitupa cha mberere, kweni wakukwerera pa waka, ndi munkhungu, na wakukwapura.

²Kweni munthu uyo wakunjira pa muryango, ndiyo muliska wa mberere.

³Mulinda wa pa muryango nayo wakumujulira. Mberere zikupulika mazgu ghakhe ndipo wakuzichema mberere zakhe na mazina ndipo zikupulika mazgu ghakhe ndipo wakuzirongozgera kuwaro.

⁴Para wakuzifumya zose, iyo wakudangira panthazi, ndipo mberere zikumurondezga, chifukwa zikumanya mazgu ghakhe.

⁵Kweni mulendo kuti zikumurondezgapo chara, ndipo zikumuchimbira chifukwa zikumanya chara mazgu gha ŵalendo.”

⁶Yesu wakaŵatayira ntharika iyi, kweni kuti ŵakapulikiska chara icho wakayowoyanga kwa iwo.

⁷Ntheura Yesu wakatiso kwa iwo, Inya, inya nadi, nkhumunenerani kuti ine ndine muryango wa mberere.

⁸Wose awo ŵakiza pambere ine ndindize, mbankhungu na ŵakukwapura, kweni mberere kuti zikaŵapulika chara.

⁹Ine ndine muryango. Uyo wakunjira pa ine, wati waponoskeke. Wati wanjirenge na kufuma, na kusanga uryero.

¹⁰Munkhungu wakwiza waka chara, kweni kuti wibe, wakome na kusakaza. Ine nkhiza kuti ziŵenge na umoyo, ndipo ziŵenge nawo wakuzara.

¹¹“Ine ndine Muliska muweme. Muliska muweme mweneuyo wakuŵikira pasi umoyo wakhe chifukwa cha mberere.

¹²Kweni uyo ngwaganyu ndipo ndi muliska chara, uyo mberere nzakhe chara, para wakuwona mphumphi yikwiza, wakuzireka mberere na kuchimbira. Ntheura mphumphi yikuzikora mberere na kuziparanya.

¹³Wakuchimbira chifukwa ngwaganyu, ndipo kuti wakupwererako na mberere chara.

¹⁴Ine ndine Muliska muweme. Mberere zane nkhuzimanya ndipo zane nazo zikundimanya,

¹⁵nga ndi umo Ŵadada ŵakundimanyira ine, ndipo naneso nkhumanyira Ŵadada. Ndipo nkhuŵika umoyo wane pasi chifukwa cha mberere.

¹⁶Ndili nazo mberere zinyakhe izo kuti za chitupa ichi chara. Nazo nkhwenera kuya kazitora. Zamkupulika mazgu ghane, ndipo zamkuŵa mskambo umoza, na muliska yumoza.

¹⁷“Pa chifukwa ichi, Ŵadada ŵakunditemwa chifukwa nkhuwuŵika pasi umoyo wane mwakuti ndiwutoreso.

¹⁸Palije na yumoza uyo wamkuwutora kwa ine, kweni nkhuwuŵika pasi umoyo wane kwakuyana na khumbo lane na lane. Ndili nagho mazaza gha kuwuŵika pasi umoyo wane ndiposo ndili nagho mazaza ghakuwutoreraso. Mazaza agha nkhapokera kufuma ku Ŵadada.”

¹⁹Ntheura ŵaYuda ŵakagaŵikana pakati chifukwa cha mazgu agha.

²⁰Ŵanandi mwa iwo ŵakatenge, “Munthu uyu wali na chiŵanda, ndipo ngwa kufuntha. Chifukwa uli mukumupulikizga?”

²¹Kweni ŵanyakhe ŵakati, “Mazgu agha kuti ghangayowoyeka na munthu wa kukoreka na chiŵanda chara. Kasi chiŵanda chingajula maso gha munthu wachiburumutira?”

²²Pa nyengo ya chiwuvi kukaŵa chiphikiro cha Kupatuliskira Nyumba ya Chiuta ku Yerusalemu.

²³Yesu wakaŵa mu Nyumba ya Chiuta wakendanga mu khonde ilo likuthyika khonde la Solomoni.

²⁴ŴaYuda ŵakamuzingirizga ndipo ŵakati kwa iyo, “Kasi uti urutilire kutitindika mpaka pauli? Usange ndiwe Mesiya utiphalire pakweru.”

²⁵Yesu wakaŵazgora ŵakati, “Ndangumuphalirani kale. Kweni kuti mukupulikana chara. Milimo iyo nkhuchita mu zina la Ŵadada ndiyo yikundipanikizgira ukaboni.

²⁶Kweni imwe kuti mukupulikana chara, chifukwa muli ŵamoza ŵa mberere zane chara.

²⁷Mberere zane zikupulika mazgu ghane, nkhuzimanya, ndipo zikundirondezga.

²⁸Nkhuzipa umoyo wa muyirayira, ndipo kuti zamkufwa chara. Palije na yumoza uyo wamkuziphanga mu woko lane.

²⁹Ŵadada awo ŵali kundipa ine mberere izi mbakuru kuruska wose, ndipo na yumoza wangamanya kuziphanga kufuma mu woko la Ŵadada.

³⁰Ine na Ŵadada tili yumoza.”

³¹Penepapo ŵaYuda ŵakatoraso mawe kuti ŵamudine.

³²Yesu wakaŵafumba kuti, “Ndamurongorani milimo yiweme yinandi ya kufuma ku Ŵadada. Kasi mpha mlimo uli mwa iyi apo mukukhumbira kundidinira na mawe?”

³³ŴaYuda ŵakamuzgora ŵakati, “Kuti tikukhumba kukudina na mawe chifukwa cha mlimo uweme chara, kweni chifukwa cha mayowoyero ghako gha kutuka Chiuta, na pa chifukwa chakuti iwe pakuŵa munthu ukujizgora Chiuta.”

³⁴Yesu wakaŵazgora kuti, “Kasi chili kulembeka chara mu malembo ghinu kuti, ‘Nkhati, muli ŵachiuta?’

³⁵Usange wakaŵachema ŵachiuta kwa awo mazgu gha Chiuta ghakiza ‘ndipo malembo ghangateta chara’,

³⁶kasi mukuyowoya za mweneuyo Ŵadada ŵali kumupatula na kumutuma mu charu, ‘Ukutuka Chiuta,’ chifukwa nkhayowoya kuti, ‘Ndine Mwana wa Chiuta.’

³⁷Usange nkhureka kuchita milimo ya Ŵadada, ipo mureke kupulikana nane.

³⁸Kweni usange nkhuyichita milimo iyi, nanga kuti mungareka kupulikana nane, pulikanani na milimo yane, mwakuti mumanye na kupulikana kuti Ŵadada ŵali mwa ine, ndipo ine ndili mwa Ŵadada.”

³⁹Sono ŵaYuda ŵakapenja kumukoraso, kweni wakafwanthamuka mu mawoko ghawo.

⁴⁰Yesu wakarutaso ku sirya linyakhe la mronga wa Yorodani pa malo agho Yohane wakabapatiziranga ŵanthu pakudanga, ndipo wakakhara kwenekura.

⁴¹Ŵanthu ŵanandi ŵakiza kwa iyo, ŵakayowoya ŵakati, “Yohane kuti wakachita chimanyikwiro cha munthondwe chara, kweni vyose ivyo wakayowoyanga na munthu uyu vikaŵa vyakuneneska.”

⁴²Ntheura kwenekura ŵanthu ŵanandi ŵakapulikana na Yesu.