Read new_tumbuka_bible Yohane 11 Bible Online

Yohane 11 - new_tumbuka_bible bible

Yohane 11

¹Ndipo pakaŵa munthu yunji zina lakhe Lazaro uyo wakarwaranga. Iyo wakaŵa wa mu chikaya cha Betaniya kwawo kwa Mariya na mukuru wakhe Marita.

²Mariya uyu ndi mweneuyo wakaphakazga Fumu Yesu na mafuta ghakununkhira ndiposo na kufyura malundi ghakhe na sisi lakhe. Mudumbu wakhe Lazaro ndiyo wakaŵa murwari.

³Ntheura ŵadumbu ŵakhe ŵakamutumira uthenga Yesu ŵakati, “Fumu, mubwezi winu uyo mukumutemwa ndi murwari.”

⁴Para Yesu wakapulika wakati, “Urwari uwu kuti wati wafwenge nawo chara, kweni vyachitika ntheura chifukwa cha uchindami wa Chiuta mwakuti Mwana wa Chiuta wachindikikiremo.”

⁵Yesu wakatemwa Marita, na munung'una wakhe Mariya, ndiposo na Lazaro.

⁶Ntheura wakati wapulika kuti Lazaro ndi murwari, wakatandarapo pa malo gheneghara mazuŵa ghaŵiri.

⁷Pamanyuma wakaphalira ŵasambiri ŵakhe wakati, “Tiyeni tiwerereso ku Yudeya.”

⁸Ŵasambiri ŵakhe ŵakati, “Musambizgi, mazuŵa ghachoko waka ghajumphapo apo ŵaYuda ŵakakhumbanga kumudinani na mawe, kasi sono mukukhumba kuwererakoso?”

⁹Yesu wakaŵazgora wakati, “Kasi ghalimo maora 12 mu zuŵa limoza chara? Usange munthu wakwenda na muhanya kuti wakukhuŵara chara, chifukwa wakuwona ungweru wa charu.

¹⁰Kweni para munthu wakwenda na usiku wakukhuŵara chifukwa ungweru mulije mwa iyo.”

¹¹Yesu wakayowoya ntheura ndipo wakati kwa iwo, “Mubwezi withu Lazaro wagona tulo, kweni nkhuruta kuya kamuwuska.”

¹²Ŵasambiri ŵakati kwa iyo, “Fumu, usange wali mu tulo ipo wati wachirenge.”

¹³Sono Yesu wakayowoyanga na nyifwa yakhe. Kweni iwo ŵakaghanaghananga kuti wakuyowoya na kupumula mu tulo.

¹⁴Ntheura Yesu wakaŵaphalira pakweru wakati, “Lazaro wafwa.

¹⁵Kweni chifukwa cha imwe, ndakondwa pakuti nkhaŵako kura chara mwakuti mupulikane. Tiyeni tirutenge kwa iyo.”

¹⁶Tomasi, uyo wakuchemeka Wamaphaska,[6] wakaŵaphalira ŵasambiri ŵanyakhe wakati, “Tiyeni nase tirute kuti tikafwe nayo pamoza.”

¹⁷Ntheura para Yesu wakati wafika wakasanga kuti Lazaro wagonamo mu dindi mazuŵa ghanayi.

¹⁸Ndipo Betaniya wakaŵa pafupi na Yerusalemu, pakunji mtunda wa makilomita ghatatu.

¹⁹Ntheura ŵaYuda ŵanandi ŵakiza kwiza kakhuza Mariya na Marita pa nyifwa ya mudumbu wawo.

²⁰Para Marita wakapulika kuti Yesu wakwiza, wakaruta kuya kamutemerera, kweni Mariya wakakhara pa nyumba.

²¹Marita wakati kwa Yesu, “Fumu, muŵenge pano mphanyi mudumbu wane wandafwe!

²²Na sono wuwo nkhumanya kuti, chose icho muti murombe kwa Chiuta, wati wamupaninge.”

²³Yesu wakati kwa iyo, “Mudumbu wako wati wawukengeso.”

²⁴Marita wakazgora wakati, “Nkhumanya kuti wamkuwukaso pa chiwuka pa zuŵa la umaliro.”

²⁵Yesu wakati kwa iyo, “Ine ndine chiwuka na umoyo. Yose uyo wakupulikana na ine, nanga wafwe, ndipouli waŵenge wamoyo.

²⁶Ndipo yose uyo ngwamoyo ndipo wakupulikana na ine, kuti wati wafwenge chara. Kasi ukupulikana na ichi?”

²⁷Marita wakati kwa iyo, “Inya Fumu. Nkhupulikana kuti ndimwe Mesiya, Mwana wa Chiuta, mweneuyo wakatenge wakwiza muno mu charu.”

²⁸Marita wakati wayowoya mazgu agha, wakawerera ku nyumba, ndipo wakamuchemera ku udesi munung'una wakhe Mariya wakati, “Musambizgi wiza, ndipo wakukuchema.”

²⁹Mariya wakati wapulika ichi, wakawuka luŵiroluŵiro kuya kakumana na Yesu.

³⁰Sono Yesu wakaŵa wandafike mu chikaya, wakaŵa wachali mu malo agho Marita wakakumana nayo.

³¹ŴaYuda awo ŵakaŵa mu nyumba kusanguruska Mariya, pakuwona Mariya wakufuma mu nyumba luŵiroluŵiro, nawo ŵakawuka na kumurondezga. ŴaYuda ŵakatenge wakuruta ku dindi kuya kalira kwenekura.

³²Para Mariya wakafika apo Yesu wakaŵa na kumuwona, wakawa pasi pa malundi ghakhe, wakayowoya nayo wakati, “Fumu, muŵenge pano mphanyi mudumbu wane wandafwe.”

³³Sono apo Yesu wakawona kuti Mariya wakulira ndiposo ŵaYuda awo ŵakiza nayo nawo ŵakulira, wakaŵa na chitima chikuru ndipo wakasuzgika mu mtima.

³⁴Yesu wakaŵafumba wakati, “Mwamuŵika nkhu?” Ŵakati kwa iyo, “Fumu, zaninge muwone.”

³⁵Yesu wakalira.

³⁶Ntheura ŵaYuda ŵakati, “Wonani umo wakamutemwera!”

³⁷Kweni ŵanji ŵa iwo ŵakati, “Kasi wakatondeka uli munthu uyo wakajula maso gha wachiburumutira yura, kukanizga nyifwa ya munthu uyu?”

³⁸Yesu wakakweŵekaso mu mtima ndipo wakiza ku dindi leneilo likaŵa mphanji iyo ŵakabenekererapo libwe.

³⁹Yesu wakati, “Wuskanipo libwe.” Marita mudumbu wa uyo wakafwa wakati kwa iyo, “Fumu, pa nyengo iyi wakwenera kununkha chomene, chifukwa wagonamo mazuŵa ghanayi mu dindi.”

⁴⁰Yesu wakati kwa iyo, “Asi ndangukuphalira kuti, usange ukupulikana uti uwonenge uchindami wa Chiuta?”

⁴¹Ntheura ŵakawuskapo libwe. Yesu wakinuska maso ghakhe kuchanya ndipo wakati, “Ŵadada, nkhumuwongani pakuti mwandipulika.

⁴²Nkhumanya kuti nyengo yose mukundipulika, kweni sono nkhuyowoyera chifukwa cha ŵanthu aŵa ŵali pano, mwakuti ŵapulikane kuti ndimwe mukandituma.”

⁴³Wakati wayowoya mazgu agha wakachemerezga wakati, “Lazaro, fuma!”

⁴⁴Ndipo munthu wakufwa yura wakafuma wakukakika na sanda mu malundi na mu mawoko, ndipo chisko chakhe nacho chikavungirizgika na salu. Yesu wakati kwa iwo, “Musutulani mumureke warutenge.”

⁴⁵Ntheura ŵanandi ŵaYuda awo ŵakiza na Mariya ŵakati ŵawona icho Yesu wakachita, ŵakapulikana mwa iyo.

⁴⁶Kweni ŵanji ŵakaruta ku ŵaFarisi ŵakaya kaŵaphalira vyose ivyo Yesu wakachita.

⁴⁷Ntheura ŵasofi ŵarara pamoza na ŴaFarisi ŵakachema mphara na kufumbana kuti, “Kasi tichitechi? Pakuti munthu uyu wakuchita vimanyikwiro vinandi.

⁴⁸Usange tamureka kuti warutilirenge ntheura, ŵanthu wose ŵati ŵapulikanenge nayo, ndipo ŵaRoma ŵati ŵizenge ndipo ŵazamkupoka malo ghithu ghakupatulika na fuko lithu.”

⁴⁹Kweni yumoza wa iwo, Kayafa, mweneuyo wakaŵa Musofi Mukuru chirimika chenechira, wakati kwa iwo, “Imwe kuti mukumanya kanthu chara!

⁵⁰Mukumanya kuti nchakwenerera kuti munthu yumoza waŵafwire ŵanthu mu malo ghakuti fuko lose limare?”

⁵¹Kuti wakayowoya mazgu agha pa iyo yekha chara, kweni pakuŵa Musofi Mukuru chirimika chira, wakachima kuti Yesu wakwenera kufwira fuko.

⁵²Ndipo fuko pera chara, kweniso kuti wawunjike pamoza ŵana ŵa Chiuta awo ŵali kumbinikira kosekose.

⁵³Ntheura kufumira pa zuŵa lira ŵarara ŵa ŵaYuda ŵakapangana na umo ŵangakomera Yesu.

⁵⁴Ntheura Yesu kuti wakendangaso pakweru mu ŵaYuda chara. Kweni wakafumako na kuruta ku malo agho ghali pafupi na mapopa, wakiza ku muzi uwu ukuchemeka Efurayimu, ndipo kwenekura ndiko wakakharanga pamoza na ŵasambiri ŵakhe.

⁵⁵Sono chiphikiro cha Paska cha ŵaYuda chikaneng'enera. Ndipo ŵanthu ŵanandi ŵakakwerera ku Yerusalemu kufuma ku charu chose kuti ŵakafiske maluso ghawo ghakujitozga pambere chiphikiro chindayambe.

⁵⁶Ŵakapenjanga Yesu, ndipo apo ŵakimilira mu Nyumba ya Chiuta ŵakafumbananga kuti, “Kasi mukughanaghanachi? Kasi wati wize ku chiphikiro?”

⁵⁷Ŵasofi ŵarara na ŴaFarisi ŵakalangula ŵanthu kuti yose uyo wangamanya uko Yesu wali wakwenera kwiza kaŵamanyiska mwakuti ŵamukore.