Read new_tumbuka_bible Yohane 12 Bible Online

Yohane 12 - new_tumbuka_bible bible

Yohane 12

¹Kukati kwakhara mazuŵa ghankhonde na limoza pambere chiphikiro cha Paska chindafike, Yesu wakiza ku Betaniya, uko kukaŵa Lazaro uyo Yesu wakamuwuska ku ŵakufwa.

²Kwenekura ŵakamunozgera chakurya cha mise, ndipo Marita ndiyo wakaperekeranga chakurya ndipo Lazaro wakaŵa yumoza wa awo ŵakaryanga pamoza nayo.

³Mariya wakatora supa ya mafuta ghakununkhira, ghakuzirwa na gha mtengo wapatali, gha narido mwenecho, ghakukwana hafu lita. Wakapungulira mafuta ghara pa malundi gha Yesu na kughapuputa na sisi lakhe, mpaka nyumba yose yikazura na sungu liweme.

⁴Kweni Yudasi Isikariyoti, yumoza wa ŵasambiri ŵakhe, uyo wakiza kamwendera mphiska, wakati,

⁵“Kasi mafuta agha ghangurekerachi kuguliskika pa ndarama za siliva 30 na kupereka ku ŵakavu?”

⁶Kweni wakayowoya ichi, kuti nchifukwa wakapwererangako ŵakavu chara, kweni nchifukwa chakuti wakaŵa munkhungu. Iyo wakasunganga thumba la ndarama ndipo wakibangamo.

⁷Yesu wakazgora wakati, “Murekani mwanakazi uyu. Rekani waghasungire zuŵa lakusungika kwane mu dindi.

⁸Ŵakavu muli nawo nyengo zose, kweni muti muŵenge nane nyengo zose chara.”

⁹Para mzinda ukuru wa ŵaYuda ukamanya kuti wali ku Betaniya, ukizira kuwona Yesu pera chara, kweniso na Lazaro, mweneuyo Yesu wakamuwuska ku ŵakufwa.

¹⁰Ntheura ŵasofi ŵarara ŵakadumula kuti ŵakwenera kukoma na Lazaro wuwo,

¹¹pakuti chifukwa cha iyo ŵaYuda ŵanandi ŵakaŵajowola na kupulikana mwa Yesu.

¹²Na machero ghakhe, mzinda ukuru wa ŵanthu awo ŵakiza ku chiphikiro cha Paska ukapulika kuti Yesu wakwiza ku Yerusalemu.

¹³Ntheura ŵakatora minthavi ya vivwati vya mikambarara ŵakaruta kuya kamutemerera uko ŵakuchemerezga ŵakuti, “Hosana! Ngwakutumbikika uyo wakwiza mu zina la Fumu! Ngwakutumbikika nanga ndi Karonga wa ŵaIsraele!”

¹⁴Yesu wakasanga mwana wa mbunda ndipo wakakwerapo nga ndi umo kuli kulembekera kuti,

¹⁵“Mungopanga, imwe ŵanthu ŵa mu Ziyoni. Wonani, karonga winu wakwiza, wakwera pa kamwana ka mbunda.”

¹⁶Pakwamba ŵasambiri ŵakhe kuti ŵakapulikiska ichi chara. Kweni apo Yesu wakati wawuskikira ku uchindami wakhe, ŵakakumbuka kuti vyose ivi vikamulembekera iyo, ndipo ndicho chifukwa ŵakamuchitira nadi vyeneivi.

¹⁷Ŵanthu awo ŵakaŵa na Yesu ŵakaŵa ŵakaboni apo wakachema Lazaro kufuma mu dindi na kumuwuska ku ŵakufwa.

¹⁸Ndicho chifukwa mzinda wa ŵanthu ŵanandi ukamutemerera, chifukwa ŵakapulika kuti wakachita chimanyikwiro cha minthondwe ichi.

¹⁹Ntheura ŵaFarisi ŵakayowoyeskana ŵakati, “Mukuwona kuti mukutondeka kuchitapo chilichose! Wonani charu chamurondezga iyo!”

²⁰Kweni mwa awo ŵakaruta kuya kasopa pa chiphikiro pakaŵa ŵaGriki ŵanji.

²¹Iwo ŵakiza kwa Filipu, (uyo wakafumanga ku Betesaida mu Galileya), ŵakamufumba ŵakati, “Ŵadada, tikukhumba kuwona Yesu.”

²²Filipu wakaruta kuya kamuphalira Andreya. Andreya wakaruta na Filipu kuya kamuphalira Yesu.

²³Yesu wakaŵazgora wakati, Ora lafika kuti Mwana wa Munthu wachindikike.

²⁴Inya, inya nadi nkhumunenerani kuti, kwambula kuti lumphuzi lwa tirigu luwe mu dongo na kufwa, lumphuzi lura lukukhara lwekha, kweni para lwafwa, ndipo lukupambika vipambi vinandi.

²⁵Munthu uyo wakutemwa umoyo wakhe wakuwutaya, uyo wakutinkha umoyo wakhe mu charu chino, wati wawusungilire ku umoyo wa muyirayira.

²⁶Yose uyo wati wanditeŵetera wakwenera kundirondezga mwakuti uko ndili ine, ndiko wakaŵenge na muteŵeti wane wuwo. Yose uyo wati wanditeŵetere ine, Ŵadada ŵamkumuchindika.

²⁷“Sono mzimu wane ukusuzgika, manyi ndiyowoyechi? Kwali ndiyowoye kuti, ‘Ŵadada, mundithaske ku ora ili?’ Kweni cheneicho ndicho chifukwa nafikira ku ora ili.

²⁸Ŵadada, chindikani zina linu.” Penepapo, mazgu ghakafuma kuchanya ghakati, “Ndalichindika kale, ndipo nditi ndilichindikengeso.”

²⁹Mzinda wa ŵanthu uwo ukimilira penepara, ukapulika mazgu ghara ndipo ukayowoya kuti, “Chinthu chadudumira!” Kweni ŵanji ŵakati, “Mungelo wayowoya nayo.”

³⁰Yesu wakaŵazgora wakati, “Mazgu agha kuti ghizira ine chara, kweni ghizira imwe.

³¹Sono ndiyo nyengo yakweruzgira charu ichi, ndipo sono uyo wakuwusa charu ichi wati watayikenge kuwaro.

³²Kweni ine para ndatumphuskika mu charu nditi ndiguzire ŵanthu wose kwa ndamwene.”

³³Yesu wakayowoya ichi kurongora nyifwa yeneiyo wamkufwa nayo.

³⁴Mzinda wa ŵanthu ukamuzgora kuti, “Ise tili kupulika mu Dango kuti Mesiya wakukhalirira muyirayira swii. Kasi ungayowoya uli kuti, ‘Mwana wa Munthu wakwenera kutumphuskika? Kasi Mwana wa Munthu uyu ndi njani?’ ”

³⁵Ntheura Yesu wakati kwa iwo, “Ndipouli pa kanyengo kachoko waka, ungweru uli namwe. Mwendenge apo muchali na ungweru, kuti mdima urekenge kumukorani. Uyo wakwenda mu mdima kuti wakumanya uko wakuya chara.

³⁶Apo muchali na ungweru, pulikanani mu ungweru, mwakuti muŵe ŵanthu ŵa mu ungweru.” Para Yesu wakati wayowoya ivi, wakafumako kwa iwo na kuya kabisama.

³⁷Nangauli Yesu wakachita vimanyikwiro vinandi pa maso ghawo, ŵaYuda kuti ŵakapulikana mwa iyo chara.

³⁸Ichi chikachitika kuti mazgu gha nchimi Yesaya ghafiskike ghakuti, “Fumu, ndi njani uyo wapulikana na ivyo taphara? Nkhwa njani uko nkhongono ya FUMU yawonekera?”

³⁹Ntheura ŵakawura kupulikana, pakuti Yesaya wakayowoyaso wakati,

⁴⁰“Chiuta wali kuburumutizga maso ghawo ndipo wali kunonofya mitima yawo, mzire ŵawone na maso ghawo ndipo ŵamanyiske na mitima yawo, na kung'anamukira kwa ine kuti ndiŵachizge.”

⁴¹Yesaya wakayowoya mazgu agha chifukwa wakawona uchindami wa Yesu, ndipo wakayowoya vya iyo.

⁴²Ndipouli ŵarongozgi ŵanandi mukati mu ŵaYuda ŵakapulikana mwa Yesu, kweni ŵakazomera pakweru chara, chifukwa ŵakopanga ŵaFarisi kuti ŵangaŵasezga mu nyumba ya kusoperamo.

⁴³Pakuti ŵakatemwa marumbo gha ŵanthu kuruska marumbo gha Chiuta.

⁴⁴Yesu wakachemerezga wakati, “Para munthu wakupulikana mwa ine, kuti wakupulikana mwa ine pera chara, kweniso na mwa uyo wakandituma.

⁴⁵Ndipo yose uyo wakundiwona ine, wakuwona uyo wakandituma.

⁴⁶Ine ndili kwiza nga mbungweru mu charu, mwakuti yose uyo wakupulikana mwa ine wareke kukhalirira mu mdima.

⁴⁷Usange munthu waliyose wakupulika mazgu ghane ndipo wakughagomezga chara, kuti nkhumweruzga chara. Pakuti nkhiza kweruzga charu chara, kweni kuchiponoska.

⁴⁸Munthu uyo wakundikana ine ndipo kuti wakughapokerera mazgu ghane chara, wali na mweruzgi. Mazgu agho ndayowoya ndigho ghaŵenge mweruzgi wakhe pa zuŵa la umaliro.

⁴⁹Chifukwa ine kuti ndayowoya mu mazaza ghane chara, kweni Ŵadada awo ŵakandituma ndiwo iwo ŵekha ŵakundilangula ine ivyo nkhwenera kuphara na kuyowoya.

⁵⁰Nkhumanya kuti ivyo ŵakundilangula vikupa umoyo wa muyirayira. Ntheura chose icho nkhuyowoya, nkhuyowoya nga ndi umo Ŵadada ŵali kundiphalirira.”