Read new_tumbuka_bible Yohane 13 Bible Online

Yohane 13 - new_tumbuka_bible bible

Yohane 13

¹Sono pambere chiphikiro cha Paska chindafike, apo Yesu wakamanya kuti ora lakhe la kufumiramo mu charu ichi kuya ku Ŵawiske lafika, ndipo pakuŵatemwa ŵakhe na ŵakhe awo ŵakaŵa mu charu, wakaŵatemwa kufikira na ku umaliro.

²Ndipo pa nyengo ya chakurya cha mise, Satana wakawa kuti waŵika kale maghanoghano mu mtima wa Yudasi Isikariyoti, mwana wa Simoni, kuti wamwendere mphiska Yesu.

³Yesu pakumanya kuti Ŵawiske ŵakaŵika vinthu vyose mu mawoko ghakhe, na kuti wakafumira kwa Chiuta, ndipo wakawereranga kwa Chiuta,

⁴wakawuka apo wakaryanga, wakavura laya lakhe la kuwaro, ndipo wakatora thaulo na kujiphinya nalo mu chiuno.

⁵Penepapo wakapungulira maji mu beseni ndipo wakamba kugeziska malundi gha ŵasambiri ŵakhe na kughapuputa na thaulo ilo wakajiphinya nalo mu chiuno.

⁶Wakiza kwa Simoni Petrosi ndipo Petrosi wakati kwa iyo, “Fumu, kasi ndimwe mugeziskenge malundi ghane?”

⁷Yesu wakamuzgora wakati, “Ichi nkhuchita kuti ukuchimanya sono chara, kweni uti umanyenge pamanyuma.”

⁸Petrosi wakati kwa iyo, “Kuti muti mugeziskengepo malundi ghane chara!” Yesu wakamuzgora wakati, “Usange ndareka kukugeziska kuti ungamanya kusanganaso na ine chara.”

⁹Simoni Petrosi wakati kwa iyo, “Fumu, kuti muti mugeziskenge malundi ghane pera chara, kweni na mawoko ghane na mutu wane wuwo.”

¹⁰Yesu wakati kwa iyo, “Uyo wageza kale thupi lose wakukhumbaso kugeza chara kweni malundi pera, ndipo thupi lakhe lose ndakuphotoka. Muli ŵakuphotoka, kweni mose chara.”

¹¹Chifukwa Yesu wakamumanya kale uyo wamwenderenge mphiska, ndicho chifukwa wakayowoya kuti, “Kuti mose muli ŵakuphotoka chara.”

¹²Yesu wakati wageziska malundi ghawo na kuvwaraso malaya ghakhe, wakaya kakhara pa malo ghakhe, ndipo wakati kwa iwo, Kasi mukumanya chifukwa icho ndamuchitirani ntheura?

¹³Ine mukundichema kuti Fumu na Musambizgi, ndipo nadi mukuneneska pakuti ndimo ndiliri.

¹⁴Sono usange ine nda Fumu yinu, na Musambizgi winu, ndamugeziskani malundi, namweso mukwenera kugeziskana malundi.

¹⁵Ndamupani chiyerezgero kuti namwe muchitenge ntheura nga ndi umo ine ndamuchitirani.

¹⁶Inya, inya nadi, nkhumunenerani kuti muteŵeti kuti ndi mukuru kuruska sekuru wakhe chara, nanga ndi nthumi kuti yikumuruska chara uyo wakuyituma.

¹⁷Usange mukuvimanya vyeneivi muŵenge ŵakutumbika usange mukuvichita!

¹⁸“Mazgu agha kuti nkhunenera mose chara, chifukwa nkhuŵamanya awo ndaŵasora. Kweni kuti ghafiskike Malembo agho ghakuti, ‘Uyo wakurya chingwa pamoza na ine ndiyo wandiwukira.’

¹⁹Nkhumuphalirani ichi sono pambere chindachitike, mwakuti para chachitika mupulikane kuti ndine mweneuyo.

²⁰Inya, inya nadi nkhumunenerani kuti, yose uyo wakupokerera uyo ndamutuma wakupokerera ine. Ndipo yose uyo wakupokerera ine wakupokerera mweneuyo wakandituma ine.”

²¹Yesu wakati wayowoya vyeneivi, wakakweŵeka chomene mu mzimu wakaphara pakweru wakati, “Inya, inya nadi nkhumunenerani kuti, yumoza wa imwe wati wandenderenge mphiska.”

²²Ŵasambiri ŵakhe ŵakamba kulaŵiskana ku maso, ŵakazizikika chomene na munthu uyo wakanenanga.

²³Yumoza wa iwo, musambiri mweneuyo Yesu wakamutemwa wakeghamira pafupi na chifuŵa cha Yesu.

²⁴Simoni Petrosi wakamuchewuzga wakati, “Tiphalira kasi wakunena njani?”

²⁵Musambiri yura wakasenderera pa chifuŵa cha Yesu, wakati, “Fumu, kasi ndi njani?”

²⁶Yesu wakazgora wakati, “Ndi mweneuyo nditi ndimupenge mphiri para ndakovya.” Penepapo Yesu wakati wakovya phiri, wakamupa Yudasi mwana wa Simoni Isikariyoti.

²⁷Penepapo Yudasi wakati wapokera phiri, Satana wakanjira mwa iyo. Yesu wakati kwa iyo, “Icho ukukhumba kuchita, chita luŵiro.”

²⁸Sono pakaŵavye mwa awo ŵakakhara pa kurya, uyo wakamanya chifukwa icho Yesu wakayowoyera ntheura kwa iyo.

²⁹Pakuti Yudasi wakaŵa msungiliri wa thumba la ndarama, ŵanji ŵakaghanaghananga kuti Yesu wakamuphaliranga kuti, “Kagule ivyo vikukhumbikwa pa chiphikiro,” panji kuti wakapereke vyawanangwa ku ŵakavu.

³⁰Sono wakati wapokera phiri, penepapo wakafumira kuwaro, ndipo panyengo iyi kukaŵa usiku.

³¹Yudasi wakati wafuma, Yesu wakayowoya wakati, “Sono ndipo Mwana wa Munthu wachindikika, ndipo Chiuta wachindikikira mwa iyo.

³²Usange Chiuta wakachindikikira mu Mwana, Chiuta nayo wati wachindikenge Mwana mwa iyomwene ndipo wati wamuchindike penepapo.

³³Mwa twana, kwakharako kanyengo kachoko waka apo ndichali namwe. Mwamkundipenja, kweni nkhumuphalirani sono mazgu agho nkhaŵaphalira ŵaYuda kuti, ‘Uko nkhuruta ine, imwe kuti mungizako chara.’

³⁴Nkhumupani dango liphya kuti mutemwanenge. Umo ine ndamutemwerani imwe, ndimo namwe mutemweranenge.

³⁵Na cheneichi ndicho ŵanthu wose ŵati ŵamanyirenge kuti ndimwe ŵasambiri ŵane, usange mukutemwana yumoza na munyakhe.”

³⁶Simoni Petrosi wakati kwa iyo, “Fumu, kasi mukuruta nkhu?” Yesu wakazgora wakati, “Uko nkhuruta ine, kuti ungandirondezga sono chara, kweni wizamkundirondezga pamanyuma.”

³⁷Petrosi wakati kwa iyo, “Fumu, chifukwa uli ndingareka kumurondezgani sono? Nditi ndiŵikire pasi umoyo wane chifukwa cha imwe.”

³⁸Yesu wakamuzgora kuti, Kasi uŵikirenge pasi umoyo wako chifukwa cha ine? Inya, inya nadi nkhukunenera kuti, tambala wati walire chara, mpaka ukandikane katatu.