Read new_tumbuka_bible Yohane 14 Bible Online

Yohane 14 - new_tumbuka_bible bible

Yohane 14

¹“Mitima yinu yingasuzgikanga chara. Kweni pulikanani na Chiuta, ndipo pulikanani mwa ine.

²Mu nyumba ya Ŵadada muli malo ghanandi ghakukharamo. Nga kuwurenge kuŵa ntheura, mphanyi nkhamuphalirani. Nkhuruta kuya kamunozgerani malo.

³Ndipo para ndaruta ndamkumunozgerani malo ndipo ndamkwizaso kwiza kamutorerani kwa ndamwene, mwakuti uko ndili ine ndiko namweso mukaŵenge.

⁴Ndipo mukuyimanya nthowa ya uko ine nkhuruta.”

⁵Tomasi wakati kwa iyo, “Fumu, tikumanya chara uko mukuruta. Kasi nthowa tingayimanya uli?”

⁶Yesu wakati kwa iyo, “Ine ndine nthowa, unenesko na umoyo. Palije munthu uyo wakwiza ku Ŵadada, kweni mwa ine pera.

⁷Nga mundimanyenge ine, mphanyi mwaŵamanya na Ŵadada wuwo. Ndipo kuyambira sono mukuŵamanya Ŵadada ndipo mwaŵawona.”

⁸Filipu wakati kwa iyo, “Fumu, mutirongore Ŵawiskemwe kuti tikhorwe.”

⁹Yesu wakati kwa iyo, “Filipu, ndakhara namwe nyengo yitali, kasi ulije kundimanya na sono? Yose uyo wawona ine wawona na Ŵadada. Kasi ungayowoya uli kuti ‘Mutirongore Ŵawiskemwe?’

¹⁰Kasi ulije kupulikana kuti ine ndili mu Ŵadada ndipo Ŵadada ŵali mwa ine? Mazgu agho nkhuyowoya kwa imwe, nkhuyowoya mu mazaza gha ine ndekha chara, kweni Ŵadada awo ŵakukhara mwa ine ŵakuchita milimo yawo.

¹¹Pulikanani nane kuti ine ndili mu Ŵadada ndipo Ŵadada ŵali mwa ine. Para apo yayi, pulikanani nane chifukwa cha milimo yekha.

¹²Inya, inya nadi nkhumunenerani kuti, yose uyo wakupulikana mwa ine, nayo wati wachitenge milimo iyo nkhuchita ine. Ndipo wati wachitenge milimo yikuru yakuruska iyi, chifukwa ine nkhuruta ku Ŵadada.

¹³Chose icho mungaromba mu zina lane, ndichitenge, mwakuti Ŵadada ŵachindikike mu Mwana.

¹⁴Usange mukuromba kalikose mu zina lane, ndichitenge.

¹⁵“Usange mukunditemwa, musungilirenge marango ghane.

¹⁶Ine ndirombenge Ŵadada ndipo iwo ŵamupaninge Msanguruski munyakhe kuti wakharenge na imwe kwa muyirayira.

¹⁷Ndiyo Mzimu wa unenesko, mweneuyo charu chingamupokerera chara, chifukwa kuti chikumuwona chara nanga nkhumumanya. Kweni imwe mukumumanya, pakuti wakukhara namwe ndipo wati waŵenge mwa imwe.

¹⁸“Kuti nditi ndimusidaninge ŵalanda chara. Ndamkwizaso kwa imwe.

¹⁹Ndipouli mu kanyengo kachoko waka, charu chilekenge kundiwonaso, kweni imwe mundiwonenge. Pakuti ine ndili wamoyo, namweso muŵenge ŵamoyo.

²⁰Mu zuŵa leneilo muti mumanyenge kuti ine ndili mu Ŵadada, ndipo imwe mwa ine, ndipo ine mwa imwe.

²¹“Yose uyo wali na marango ghane ndipo wakughasungilira ndiyo wakunditemwa ine. Ndipo uyo wakunditemwa ine, watemwekenge na Ŵadada. Ine nane ndimutemwenge na kujivumbula kwa iyo.”

²²Yudasi (Isikariyoti chara) wakati kwa iyo, “Fumu, kasi kwaŵirachi ntheura kuti mujivumbule kwa ise pera, kweni ku charu chara?”

²³Yesu wakamuzgora wakati, Usange munthu wakunditemwa, wati wasungilirenge mazgu ghane, Ŵadada ŵati ŵamutemwenge, ndipo Ŵadada na ine tizenge kwa iyo na kukhara nayo.

²⁴Yose uyo wakuwura kunditemwa ine, kuti wakurondezga mazgu ghane chara. Mazgu agho mwapulika kuti ngane chara, kweni nga Ŵadada awo ŵakandituma.

²⁵“Ndamuyowoyerani vinthu ivi apo ndichali namwe.

²⁶Kweni Msanguruski, Mzimu Mutuŵa, mweneuyo Ŵadada ŵamkumutuma mu zina lane, ndiyo wizamkumusambizgani vinthu vyose, na kumukumbuskani vinthu vyose ivyo ndamuyowoyerani.

²⁷“Nkhumusidirani mutende. Mutende wane nkhumupani imwe. Kuti nkhumupani nga umo charu chikupira chara. Mungasuzgikanga mu mitima yinu, nanga nkhopa.

²⁸Mukandipulika apo nkhayowoyanga kwa imwe kuti, ‘Nkhuruta ndipo ndamkwizaso kwa imwe.’ Munditemwenge, mphanyi mwangusekerera pakuti ine nkhuruta kwa Ŵadada, chifukwa Ŵadada mbakuru kuruska ine.

²⁹Ndipo sono ndamuphalirani pambere chindachitike, mwakuti para chachitika mwiza kapulikane.

³⁰Kuti nditi ndiyowoyengeso namwe vinandi chara, chifukwa uyo wakuwusa charu ichi wakwiza. Iyo kuti wali na mazaza pa ine chara.

³¹Kweni nkhuchita umo Ŵadada ŵandilangulira, mwakuti charu chimanye kuti nkhutemwa Ŵadada. “Wukani, tifumepo pano.