Read new_tumbuka_bible Yohane 15 Bible Online

Yohane 15 - new_tumbuka_bible bible

Yohane 15

¹“Ine ndine mpheska yenecho, ndipo Ŵadada mbalimi ŵa mpheska.

²Munthavi wose wa mwa ine, uwo ukuwura kupambika vipambi ŵakuwuskako. Ndipo munthavi wose uwo ukupambika vipambi ŵakuwuphatilira mwakuti upambike vinandiko.

³Imwe muli ŵakutowa kale chifukwa cha mazgu agho ndayowoya kwa imwe.

⁴Kharani mwa ine, ndipo ine mwa imwe. Nga ndi umo munthavi ungatondekera kupambika vipambi pa iwo wekha kwambula kuti ukhare mwa mpheska, ntheura namweso mungapambika vipambi chara, kwambula kuti mwakhara mwa ine.

⁵“Ine ndine mpheska, imwe ndimwe minthavi. Munthu yose uyo wakukhara mwa ine ndipo ine mwa iyo, ndiyo wapambikenge vipambi vinandi. Pakuti kwambula ine, kuti mungamanya kuchita kanthu chara.

⁶Yose uyo wakuwura kukhara mwa ine wakuponyeka kuwaro nga ndi munthavi na komira. Minthavi yikuwunjikika na kuponyeka mu moto na kuphya.

⁷Usange mukukhara mwa ine, ndipo mazgu ghane nagho ghakukhara mwa imwe, rombani chilichose icho mukukhumba ndipo chiti chichitikirenge imwe.

⁸Mu ichi ndimo Ŵadada ŵakuchindikikiramo chakuti mupambike vipambi vinandi, ntheura muti muŵenge ŵasambiri ŵane.

⁹Nga ndi umo Ŵadada ŵanditemwera ine ndimo nane ndamutemwerani imwe. Kharani mu kutemwa kwane.

¹⁰Usange mukusungilira marango ghane, mukharenge mu kutemwa kwane nga ndi umo ine nkhasungilira marango gha Ŵadada ndipo nkhukhara mu kutemwa kwawo.

¹¹“Ndayowoya vinthu ivi kwa imwe mwakuti chimwemwe chane chiŵenge mwa imwe, na kuti chimwemwe chinu chiŵe chakufikapo.

¹²Dango lane kwa imwe ndakuti, mutemwanenge nga ndi umo ine nkhumutemwerani.

¹³Palije munthu uyo wali na kutemwa kukuru kwakuruska uku, kwakuti waŵikire pasi umoyo wakhe chifukwa cha ŵabwezi ŵakhe.

¹⁴Ndimwe ŵabwezi ŵane usange mukuchita ivyo nkhumulangulani.

¹⁵Kuti nkhumuchemaniso ŵateŵeti chara, chifukwa muteŵeti kuti wakumanya chara icho sekuru wakhe wakuchita. Kweni ndamuchemani ŵabwezi, chifukwa vyose ivyo nkhapulika ku Ŵadada ndamumanyiskani.

¹⁶Kuti ndimwe mukandisora ine chara, kweni ndine nkhamusorani, ndipo nkhamwimikani kuti murute na kupambika vipambi, ndipo kuti vipambi vyinu vikhalirire. Mwakuti chose icho mukuromba Ŵadada mu zina lane ŵamupani imwe.

¹⁷Ichi ndicho nkhumulangulani kuti, ‘Mutemwanenge.’

¹⁸“Usange charu chikutinkha imwe, manyani kuti chadanga kutinkha ine pambere chindatinkhe imwe.

¹⁹Nga muŵenge ŵa mu charu, mphanyi charu chamutemwani nga mbanthu ŵakhe. Kweni pakuti ndimwe ŵa mu charu chara, pakuti nkhamusankhani kufuma mu charu, rekani charu ichi chikumutinkhani.

²⁰Kumbukani mazgu agho nkhamuphalirani, ghakuti, ‘Muteŵeti kuti ndi mukuru kuruska sekuru chara.’ Usange ŵakandizikizga ine, imwe namwe ŵamkumuzikizgani. Usange ŵakasunga mazgu ghane, ŵamkusunga na mazgu ghinu wuwo.

²¹Kweni vyose ivi, ŵamkumuchitirani chifukwa cha ine, pakuti ŵakumanya chara uyo wakandituma ine.

²²Ndirekenge kwiza na kuyowoya nawo, mphanyi ŵalije zakwananga. Kweni sono ŵalije na chifukwa cha kudapilira zakwananga zawo.

²³Yose uyo wakunditinkha ine, wakutinkha na Ŵadada wuwo.

²⁴Ndiwurenge kuchita milimo mukati mwawo yeneiyo palije na munthu yunji uyo wakayichitapo, mphanyi ŵalije zakwananga. Kweni sono ŵayiwona milimo, ndipouli, ŵakurutilira kunditinkha ine na Ŵadada wuwo.

²⁵Kweni ichi chikufiska icho chili kulembeka mu marango ghawo kuti, ‘Ŵakanditinkha kwambula chifukwa.’

²⁶“Para Msanguruski wiza, uyo ndamkumutumirani kufuma kwa Ŵadada, uyo ndiyo Mzimu wa unenesko, mweneuyo wakufumira mu Ŵadada, ndiyo wizamkundipanikizgira ukaboni ine.

²⁷Imwe ndimwe ŵakaboni ŵane, pakuti mwaŵa nane kufuma pakwamba.