Read new_tumbuka_bible Yohane 16 Bible Online

Yohane 16 - new_tumbuka_bible bible

Yohane 16

¹“Ndamuyowoyerani vyose ivi, kuti mureke kukhuŵaliskika.

²Ŵanthu ŵamkumusezgani mu nyumba zakusoperamo. Inya nadi, ora likwiza apo yose uyo wati wamukomaninge wamkughanaghana kuti wakuteŵetera Chiuta.

³Ŵamkumuchitirani vyeneivi chifukwa ŵalije kuŵamanya Ŵadada panji ine.

⁴Kweni ndamuphalirani vyeneivi mwakuti para ora likwiza, mwiza kakumbuke kuti ine nkhamuphalirani za ivi. “Pakudanga kuti nkhamuphalirani vyeneivi chara, chifukwa nkhaŵa namwe pamoza.

⁵Kweni sono nkhuruta kwa uyo wakandituma. Palije na yumoza wa imwe uyo wakundifumba kuti, ‘Kasi mukuyankhu?’

⁶Sono pakuti ndamuphalirani vyeneivi, mitima yinu yazura na chitima.

⁷Kweni nkhumuphalirani unenesko kuti chikumwandulirani imwe kuti ine ndirute. Usange ndareka kuruta, Msanguruski wati wizenge kwa imwe chara. Kweni para ndaruta ndamkumutuma kwa imwe.

⁸Para iyo wiza wati wapanikizgire ŵanthu ŵa mu charu kuti mbakupuvya pa za kwananga, pa za urunji, ndiposo na pa za weruzgi.

⁹Mbakupuvya pa za kwananga chifukwa chakuwura kupulikana mwa ine.

¹⁰Mbakupuvya pa za urunji, chifukwa nkhuruta ku Ŵadada ndipo kuti mwamkundiwonaso chara.

¹¹Mbakupuvya pa za weruzgi, chifukwa uyo wakuwusa charu ichi weruzgika kale.

¹²“Ndipouli ndili na vinthu vinandi vyakumuphalirani, kweni sono kuti mungavipulikiska chara.

¹³Kweni para wiza iyo Mzimu wa unenesko, ndiyo wizamkumurongozgani mu unenesko wose. Chifukwa kuti wati wayowoye pa iyo yekha chara, kweni wati wayowoye vyose ivyo wakupulika. Ndipo wizamkumuphalirani vinthu ivyo vikwenera kwiza.

¹⁴Iyo wizamkundichindika pakuti wizamkutora ivyo nvyane na kumuphalirani imwe.

¹⁵Vyose ivyo Ŵadada ŵali navyo nvyane. Ndicho chifukwa ndanguyowoya kuti Mzimu wamkutora ivyo nvyane na kumuphalirani imwe.

¹⁶“Pa kanyengo kachoko waka kuti mwamkundiwonaso chara. Ndiposo pa kanyengo kachoko waka, mwamkundiwona chifukwa nkhuruta ku Ŵadada.”

¹⁷Ŵanji mukati mwa ŵasambiri ŵakhe ŵakafumbana ŵakati, “Kasi nchivichi icho wakutiyowoyera kuti, ‘Pa kanyengo kachoko waka, kuti mwamkundiwonaso chara, ndiposo pa kanyengo kachoko waka, mwamkundiwona?’ Ndipo wakayowoya kuti, ‘Chifukwa nkhuruta ku Ŵadada.’ ”

¹⁸Ŵakafumbana ŵakati, “Pakuyowoya kuti, ‘Pa kanyengo kachoko waka’ kasi wakung'anamulachi? Tikuchimanya chara icho wakuyowoya.”

¹⁹Yesu wakamanya kuti ŵakukhumba kumufumba, sono wakati kwa iwo, “Kasi ichi ndicho mukufumbana pa icho nang'anamulanga pakuyowoya kuti, ‘Pa kanyengo kachoko waka, kuti mwamkundiwonaso chara, ndipo para kajumphapo kanyengo kachokoso waka mwamkundiwonaso?’

²⁰Inya, inya nadi nkhumunenerani kuti, imwe mwamkulira na kutengera, kweni ŵanthu ŵa mu charu ŵamkusekerera. Imwe mwamkuŵa na chitima, kweni chitima chinu chamkuzgoka chimwemwe.

²¹Para mwanakazi wali mu vyakuŵaŵa pakubaba mwana, wakuŵa na chitima chifukwa ora lakhe lafika. Kweni para mwana wababika, kuti wakukumbukaso urwirwi ura chara, chifukwa wali na chimwemwe pakuwona kuti munthu wababika mu charu.

²²Ndimo kuliri na imwe wuwo. Sono muli na chitima, kweni ndamkumuwonaniso. Ndipo mitima yinu yamkuŵa na chimwemwe icho na yumoza wamkumupokani chara.

²³“Pa zuŵa lira, kuti mwamkundifumbaso kanthu chara. Inya, inya nadi nkhumunenerani kuti, chose icho mukuromba Ŵadada mu zina lane ŵamkumupani.

²⁴Mpaka sono mundarombepo kanthu mu zina lane. Rombani ndipo muti mupokerenge mwakuti chimwemwe chinu chiŵe chakufikapo.

²⁵“Ndamuyowoyerani vinthu ivi mu zintharika. Nyengo yikwiza apo kuti ndamkuyowoyeraso mu zintharika chara. Kweni ndamkumuvumbulirani pakweru nkhanira vya Ŵadada.

²⁶Pa zuŵa lira, mwamkuromba mu zina lane. Ndipo nkhuyowoya kuti ndamkumuromberani ku Ŵadada chara.

²⁷Pakuti Ŵadada iwoŵene ŵakumutemwani, chifukwa imwe mukunditemwa ine ndipo mwapulikana kuti ndili kufuma ku Ŵadada.

²⁸Ine nkhafuma ku Ŵadada, ndipo ndiza mu charu. Sono nkhufumamo mu charu ndipo nkhuruta ku Ŵadada.”

²⁹Ŵasambiri ŵakhe ŵakati kwa iyo, “Sono ndipo mukuyowoya pakweru nkhanira, kuti mukuyowoyeraso mu ntharika chara.

³⁰Sono ndipo tikumanya kuti mukumanya vyose kuti kukukhumbikwa chara kuti munthu wamufumbani kanthu. Pa chifukwa ichi tikupulikana kuti muli kufuma kwa Chiuta.”

³¹Yesu wakaŵazgora wakati, “Kasi mukupulikana sono?

³²Nyengo yikwiza ndipo nadi yafika kale, apo imwe mose mwamkuparanyikana waliyose wa imwe wati wawerere ku ivyo wakachitanga na kundireka ine ndekha. Ndipouli kuti ndili ndekha chara, chifukwa Ŵadada ŵali nane.

³³Ndamuphalirani vyeneivi, kuti muŵenge na mutende chifukwa cha ine. Mu charu muli suzgo, kweni khwimani mtima, chifukwa ine ndavivya charu.”