Read new_tumbuka_bible Yohane 17 Bible Online

Yohane 17 - new_tumbuka_bible bible

Yohane 17

¹Yesu wakati wayowoya mazgu agha, wakalaŵiska kuchanya na kuti, “Ŵadada, nyengo yafika. Chindikani Mwana winu mwakuti Mwana wamuchindikani Imwe,

²pakuti muli kumupa mazaza pa ŵanthu wose, mwakuti wapereke umoyo wa muyirayira ku wose awo muli kumupa.

³Ndipo uwu ndi umoyo wa muyirayira kuti ŵamumanyani imwe, mwaŵeneimwe ndimwe Chiuta mwekha pera wa unenesko na Yesu Khristu uyo muli kumutuma.

⁴Ine ndamuchindikani pano pasi pakufiska mlimo uwo mukandipa kuti ndichite.

⁵Ndipo sono Ŵadada, mundichindike panthazi pinu na uchindami weneuwo nkhaŵa nawo pamoza na imwe pambere charu chindalengeke.

⁶“Ine ndili kuvumbula zina linu ku ŵanthu awo mukandipa kufuma ku charu. Ŵakaŵa ŵinu, ndipo mukandipa ine ŵanthu aŵa. Iwo ŵali kusungilira mazgu ghinu.

⁷Sono ŵakumanya kuti vyose ivyo mukandipa vikafuma kwa imwe.

⁸Pakuti ndaŵapa mazgu ghinu agho mukandipa, ndipo ŵali kughapokerera. Ŵakumanya nadi kuti nchakuneneska kuti ine ndili kufuma kwa imwe, ndiposo ŵakupulikana kuti ndimwe muli kundituma.

⁹“Ine nkhuŵarombera. Kuti nkhurombera charu chara, kweni nkhurombera ŵanthu awo mukandipa chifukwa mbinu.

¹⁰Vyose ivyo ndili navyo nvyinu, ndipo vyose ivyo muli navyo nvyane, ndipo nkhuchindikikira mwa ivyo.

¹¹Ndipo sono kuti ndiliso mu charu chara ndipouli aŵa ŵali mu charu ndipo nkhwiza kwa imwe Ŵadada Ŵatuŵa, ŵasungilirani mu zina linu wose awo mukandipa, mwakuti ŵaŵenge yumoza nga ndi umo imwe na ine tiliri yumoza.

¹²Apo nkhaŵa nawo mu charu, nkhaŵasungilira mu zina linu, nkhavikirira awo mukandipa ndipo na yumoza wa iwo ŵakatayikapo, kupatulako yumoza uyo ngwa Gehena kuti Malembo ghafiskike.

¹³Kweni sono nkhwiza kwa imwe, ndipo nkhuyowoya vyeneivi apo ndili mu charu, mwakuti chimwemwe chane chifiskike mwa iwo.

¹⁴Ndili kuŵapa Mazgu ghinu, ndipo charu chikaŵatinkha chifukwa kuti mba charu chara, nga ndi umo ine ndiliri wa mu charu chara.

¹⁵Nkhuromba kuti muŵafumyemo mu charu ichi chara, kweni kuti muŵasungilire ku Muheni Yura.

¹⁶Kuti mba charu ichi chara, nga ndi umo ine nane kuti ndili wa mu charu ichi chara.

¹⁷Muŵatuŵiske mu unenesko, pakuti mazgu ghinu mbunenesko.

¹⁸Nga ndi umo imwe mukanditumira ine mu charu, ndimo nane ndaŵatumira mu charu.

¹⁹Chifukwa cha iwo, nkhujipatulira ku mlimo utuŵa mu unenesko, mwakuti iwo nawo ŵapatulikire ku mlimo utuŵa.

²⁰“Kuti nkhurombera aŵa pera chara, kweniso na awo ŵamkupulikana mwa ine chifukwa cha mazgu ghawo,

²¹mwakuti wose ŵaŵe yumoza. Nga ndi umo imwe Ŵadada muliri mwa ine, ndipo ine mwa imwe, nawoso ŵaŵe mwa ise, mwakuti charu chipulikane kuti ndimwe mukandituma.

²²Uchindami uwo mukandipa ndiwo ndaŵapa, mwakuti ŵaŵenge yumoza, nga ndi umo ise nase tiliri yumoza,

²³ine mwa iwo, ndipo imwe mwa ine, mwakuti ŵaŵe yumoza nkhanirankhanira, mwakutiso charu chimanyenge kuti ndimwe mukandituma, ndipo mukuŵatemwa nga ndi umo mukunditemwera ine.

²⁴“Ŵadada, nkhukhumba kuti awo muli kundipa ine, ŵakaŵenge uko ndili ine, kuti ŵawone uchindami wane, uwo muli kundipa ine, mu kutemwa kwinu pa ine pambere charu chindalengeke.

²⁵Mwa Ŵadada ŵarunji, charu chilije kumumanyani, kweni ine nkhumumanyani ndipo aŵa ŵakumanya kuti ndimwe muli kundituma.

²⁶Ndaŵamanyiska zina linu, ndipo ndiŵamanyiskenge ndipera mwakuti kutemwa uko mukanditemwa nako, kuŵeso mwa iwo, ndipo ine nane ndiŵe mwa iwo.”