Read new_tumbuka_bible Yohane 18 Bible Online

Yohane 18 - new_tumbuka_bible bible

Yohane 18

¹Yesu wakati wamara kuromba, wakaruta pamoza na ŵasambiri ŵakhe wakaya kambuka ku chinkhwawu cha Kidironi. Kwenekura kukaŵa munda, ndipo Yesu pamoza na ŵasambiri ŵakhe ŵakaya kanjira mu munda ura.

²Sono Yudasi uyo wakamwendera mphiska nayo wakaghamanya malo ghara, pakuti nyengo zinandi Yesu na ŵasambiri ŵakhe ŵakawungananga kwenekuko.

³Ntheura Yudasi wakatora mpingo wa ŵasilikari ŵa Boma la Romu na ŵalinda ŵa Nyumba ya Chiuta awo ŵakatumika na ŵasofi ŵarara na ŵaFarisi, ŵakiza ku munda ura uku ŵayegha zinyali, vyenje na mahomwa.

⁴Yesu wakamanya vyose ivyo viti vimuwirenge. Ntheura wakiza panthazi ndipo wakaŵafumba wakati, “Kasi mukupenja njani?”

⁵Ŵakamuzgora ŵakati, “Tikupenja Yesu wa ku Nazarete.” Yesu wakati, “Ndine pano.” (Yudasi uyo wakamwendera mphiska Yesu wakimilira penepara pamoza na mpingo ura.)

⁶Para Yesu wakazgora kuti, “Ndine pano,” ŵakawerera chitunutunu na kuwa pasi.

⁷Yesu wakaŵafumbaso wakati, “Kasi mukupenja njani?” Ŵakazgora ŵakati, “Tikupenja Yesu wa ku Nazarete.”

⁸Yesu wakaŵazgora wakati, “Ndamuphalirani kuti ndine pano. Ntheura usange mukupenja ine, ŵarekani aŵa ŵarutenge.”

⁹Wakayowoya ntheura mwakuti ghafiskike mazgu agho iyo wakayowoya ghakuti, “Mu wose awo mukandipa, ndilije kutayapo nanga njumoza.”

¹⁰Ntheura Simoni Petrosi pakuŵa na lupanga, wakalukhwetula, na kuheta muzga wa Musofi Mukuru na kuwunguzura khutu lakhe la ku maryero. Zina la muteŵeti yura wakaŵa Maliko.

¹¹Yesu wakati kwa Petrosi, “Wezgera lupanga lwako mu chibazi chakhe. Kasi ndireke kumwa nkhombo ya visuzgo iyo Ŵadada ŵandipa?”

¹²Ntheura mpingo wa ŵasilikari ŵa Boma la Romu pamoza na murongozgi wawo na ŵalinda ŵa ŵaYuda ŵa Nyumba ya Chiuta, ŵakamukora Yesu na kumukaka.

¹³Ŵakadanga ŵaruta nayo kwa Anasi, mweneuyo wakaŵa wiskevyara wa Kayafa uyo wakaŵa Musofi Mukuru chirimika chenechira.

¹⁴Kayafa ndiyo wakaŵaphalira ŵaYuda kuti, nchakwenerera kuti munthu yumoza wafwe mu malo mwa ŵanthu wose.

¹⁵Simoni Petrosi na musambiri munyakhe ŵakamurondezga Yesu. Musambiri munyakhe wakaŵa wakumanyikwa makora na Musofi Mukuru. Ndipo wakanjira pamoza na Yesu mu baraza la nyumba ya Musofi Mukuru,

¹⁶apo Petrosi wakimilira kuwaro pa muryango. Ntheura musambiri munyakhe uyo wakamanyikwa kwa Musofi Mukuru, wakafumira kuwaro ndipo wakayowoya na msungwana wanchito, mulinda wa pa muryango, na kumunjizga Petrosi.

¹⁷Msungwana wanchito yura wakati kwa Petrosi, “Asi ndiwe yumoza wa ŵasambiri ŵa munthu uyu?” Petrosi wakazgora wakati, “Ndine chara.”

¹⁸Sono ŵateŵeti na ŵalinda ŵa Nyumba ya Chiuta ŵakapemba moto wa makara, pakuti yikaŵa nyengo ya kuzizima chomene. Ndipo ŵakimiliranga uku ŵakotha moto, Petrosi nayo wakaruta penepapo na kotha nawo moto.

¹⁹Ntheura Musofi Mukuru wakamufumba Yesu na za ŵasambiri ŵakhe na kusambizga kwakhe.

²⁰Yesu wakamuzgora kuti, “Ine nkhayowoyanga pakweru ku charu. Mazuŵa ghose nkhasambizganga mu nyumba zawo zakusoperamo, ndipo na mu Nyumba ya Chiuta, umo ŵaYuda wose ŵakawungananga. Ndilije kuyowoya kanthu kanyakhe kose ku udesi.

²¹Kasi sono mukundifumbirachi? Fumbani awo ŵakapulika ivyo nkhasambizganga. Iwo ŵakumanya ivyo nkhayowoya.”

²²Yesu wakati wayowoya ntheura, yumoza wa ŵalinda ŵa Nyumba ya Chiuta awo ŵakaŵa penepara, wakamupamantha na lupi wakati, “Kasi ntheura ndimo ungamuzgolera Musofi Mukuru?”

²³Yesu wakamuzgora wakati, “Usange ndayowoya uheni yowoya icho ndananga. Kweni usange ndayowoya makora, kasi ukunditimbirachi?”

²⁴Ntheura Anasi wakamutuma wakukakika kwa Kayafa, Musofi Mukuru.

²⁵Simoni Petrosi wakimilira na kotha moto. Ŵanthu ŵakati kwa iyo, “Kasi iwe ndiwe yumoza wa ŵasambiri ŵakhe chara?” Petrosi wakakana wakati, “Ndine chara.”

²⁶Yumoza wa ŵateŵeti ŵa Musofi Mukuru, mweneuyo wakaŵa mubali wa munthu uyo Petrosi wakamuwunguzura khutu, wakamufumba wakati, “Kasi ndangukuwona iwe cha mu munda pamoza nayo?”

²⁷Petrosi wakakanaso ndipo penepapo tambala wakalira.

²⁸Ntheura ŵakamutora Yesu na macherochero, kufuma ku nyumba ya Kayafa na kuruta nayo ku nyumba ya weruzgi. Kweni iwoŵene ŵaYuda kuti ŵakanjiramo mu nyumba ya weruzgi chara, chifukwa ŵakopanga kuti ŵangakazuzgika, pakuti wakakhumbanga kuti ŵakarye chakurya cha Paska.

²⁹Ntheura Pilato wakafumira kuwaro kuya kakumana nawo ndipo wakaŵafumba wakati, “Kasi ndi mrandu uli uwu mukumupacha nawo munthu uyu?”

³⁰Ŵakamuzgora ŵakati, “Munthu uyu waŵenge kuti wakuchita uheni chara, mphanyi tilije kwiza nayo kwa imwe.”

³¹Pilato wakati kwa iwo, “Mutorani mwekha mumweruzge kwakuyana na marango ghinu.” ŴaYuda ŵakati kwa iyo, “Ise kuti tikuzomerezgeka kukoma munthu waliyose chara.”

³²Ichi chikachitika mwakuti mazgu gha Yesu ghafiskike agho wakayowoya na kurongora mtundu wa nyifwa yeneiyo wati wafwenge nayo.

³³Pilato wakanjiraso mu nyumba yakhe na kumuchema Yesu, wakamufumba wakati, “Kasi ndiwe Karonga wa ŵaYuda?”

³⁴Yesu wakamuzgora wakati, “Kasi mukuyowoya ichi pa imwe mwekha panji ŵanthu ŵanyakhe ŵamuphalirani za ine?”

³⁵Pilato wakazgora wakati, “Kasi ndine muYuda? Fuko lako na ŵasofi ŵarara ndiwo ŵakupereka kwa ine. Kasi wachitachi?”

³⁶Yesu wakazgora kuti, “Ufumu wane kuti ngwa charu ichi chara. Usange ufumu wane uŵenge wa charu ichi, mphanyi ŵanthu ŵane ŵarwa kuti ndireke kuperekeka ku ŵaYuda. Kweni Ufumu wane kuti ngwa kufuma mu charu chara.”

³⁷Pilato wakati, “Ipo sono ndiwe karonga?” Yesu wakazgora wakati, “Ndimwe mwayowoya kuti ndine karonga. Nkhababika chifukwa cha ichi ndipo chifukwa cha ichi nkhiza mu charu kuti ndipanikizgire unenesko. Yose uyo ngwa unenesko, wakupulika mazgu ghane.”

³⁸Pilato wakati kwa iyo, “Kasi unenesko nchichi?” Penepapo Pilato wakawereraso ku ŵaYuda wakati, “Ine kuti nkhusangamo kafukwa mwa iyo chara.

³⁹Kweni muli na kaluso kakuti ndimusutuliraninge munthu yumoza pa nyengo ya Paska, sono kasi mukukhumba kuti ndimusutulirani Karonga wa ŵaYuda?”

⁴⁰Iwo ŵakachemerezgaso ŵakati, “Yayi! Uyo yayi, kweni Baraba!” (Baraba uyu, wakaŵa munkhungu).