Read new_tumbuka_bible Yohane 19 Bible Online

Yohane 19 - new_tumbuka_bible bible

Yohane 19

¹Penepapo Pilato wakamutora Yesu ndipo wakalangula kuti wathyapulike.

²Ŵasilikari ŵakaruka mphumphu ya minga ndipo ŵakamuvwarika ku mutu. Ŵakamuvwarikaso munjilira uchesamu.

³Ŵakiza kwa iyo ndipo ŵakati, “Muwonire Karonga wa ŵaYuda!” Ndipo ŵakamupamantha na malupi.

⁴Pilato wakafumiraso kuwaro, wakati ku mzinda, “Wonani nkhumufumyira kwa imwe, kumurongorani kuti ndilije kusangamo mrandu uliwose mwa iyo.”

⁵Ntheura Yesu wakafumira kuwaro uku wavwara mphumphu ya minga na munjilira uchesamu. Pilato wakati kwa iwo, “Wonani uyu munthu!”

⁶Ŵasofi ŵarara na ŵalinda ŵa ku Nyumba ya Chiuta ŵakati ŵawona Yesu, ŵakachemerezga ŵakati, “Mupayika! Mupayika!” Pilato wakati kwa iwo, “Mutorani mwekha mukamupayike, chifukwa ine ndilije kumusanga na mrandu uliwose.”

⁷ŴaYuda ŵakazgora ŵakati, “Ise tili na dango, ndipo kwakuyana na dango ili, wakwenera kukomeka. Chifukwa wakujichema kuti, ‘Ndi Mwana wa Chiuta.’ ”

⁸Para Pilato wakati wapulika mazgu agha, wakopa chomene.

⁹Wakanjiraso mu nyumba ya weruzgi ndipo kwa Yesu wakati, “Kasi ndiwe wa nkhu?” Kweni Yesu wakazgorapo kanthu chara.

¹⁰Pilato wakati, “Ukukana kundiyowoyeska ine? Kasi ukumanya chara kuti ndili nagho mazaza gha kukusutulira na mazaza gha kukupayikira pa mphinjika?”

¹¹Yesu wakazgora wakati, “Kuti mungaŵa na mazaza pa ine chara kwambula kuti ghapike kwa imwe kufuma kuchanya. Ntheura uyo wandipereka kwa imwe, ndiyo kwananga kwakhe nkhukuru.”

¹²Para Pilato wakati wapulika mazgu agha, wakapenja kumusutula Yesu. Kweni ŵaYuda ŵakachemerezga ŵakati, “Usange mukumusutula munthu uyu, ipo kuti ndimwe mubwezi wa karonga wa ku Romu chara. Yose uyo wakujizgora yekha kuŵa karonga, wakuwukira karonga wa ku Romu.”

¹³Para Pilato wakapulika mazgu agha, wakatorera Yesu kuwaro, ndipo wakaya kakhara pa chitengo cha kweruzgirapo pa “Malo ghakwalikika na mawe” ghakuchemeka “Gabata” mu chiHebere.

¹⁴Likaŵa zuŵa la kunozgekera Paska. Ndipo pakaŵa pa 12 koloko muhanya. Pilato wakaŵaphalira ŵaYuda wakati, “Wonani karonga winu!”

¹⁵ŴaYuda ŵakachemerezga ŵakati, “Tiye nayo uko! Tiye nayo uko! Kamupayike pa mphinjika!” Pilato wakaŵaphalira ŵaYuda wakati, “Kasi ndipayike pa mphinjika karonga winu?” Ŵasofi ŵarara ŵakazgora ŵakati, “Tilije karonga, kweni karonga wa ku Romu pera.”

¹⁶Ntheura Pilato wakamupereka Yesu kwa iwo kuti wapayikike pa mphinjika. Ntheura ŵakamutora Yesu.

¹⁷Iyo wakafuma uku wakuyegha mphinjika yakhe kuya ku malo agho ghakuchemeka “Bwaza” gheneagho mu chiHebere ghakuchemeka “Gologota.”

¹⁸Ŵakamupayika Yesu pa mphinjika pa malo gheneghara. Ŵakapayikaposo ŵanthu ŵaŵiri pamoza na Yesu, yumoza ku woko la maryero, munyakhe ku woko la mazere ndipo Yesu pakati pawo.

¹⁹Pilato wakalemba malembo na kughaŵika pachanya pa mphinjika, wakalemba wakati, “Yesu wa ku Nazarete, Karonga wa ŵaYuda.”

²⁰ŴaYuda ŵanandi ŵakaŵazga chimanyisko ichi, chifukwa malo agho ŵakamupayikirapo Yesu ghakaŵa pafupi na msumba, ndipo chimanyisko ichi chikalembeka mu chiHebere, mu chiGriki na mu chiLatini.

²¹Ŵasofi ŵarara ŵakamuphalira Pilato ŵakati, “Mungalembanga kuti, ‘Karonga wa ŵaYuda’ chara, kweni mulembe kuti, ‘Iyo wakatenge, ndine Karonga wa ŵaYuda.’ ”

²²Pilato wakazgora wakati, “Icho ndalemba, nda ndalemba.”

²³Para ŵasilikari ŵakati ŵamupayika Yesu pa mphinjika, ŵakatora vyakuvwara vyakhe, ŵakavigaŵa panayi. Musilikari yose wakatora chigaŵa chakhe na chakhe. Ŵakatoraso munjilira wakhe. Kweni munjilira ukaŵa wambula musono, wakurukika kufuma kuchanya mpaka pasi.

²⁴Ntheura ŵasilikari ŵara ŵakayowoyeskana ŵakati, “Tireke kuwuparura, kweni tichite nawo mphenduzgo mwakuti tisange uyo wangawutora.” Ichi chikachitika mwakuti ghafiskike Malembo agho ghakuti, “Ŵakagaŵana vyakuvwara vyane, ndipo ŵakachita mphenduzgo pa munjilira wane.” Ivi ndivyo ŵakachita ŵasilikari ŵara.

²⁵Pafupi na mphinjika ya Yesu, pakimilira ŵanyina na munung'una wa ŵanyina, Mariya muwoli wa Kleopa, na Mariya wa ku Magadala.

²⁶Para Yesu wakawona anyina na musambiri uyo wakamutemwa, ŵakwimilira pafupi, wakati kwa anyina, “Amama, uyu mwana winu.”

²⁷Ndipo wakati ku musambiri, “Ŵanyoko ŵako aŵa.” Kufuma nyengo yeneyira musambiri wakaŵatora na kuruta nawo ku kwakhe.

²⁸Pamanyuma pa ichi, Yesu wakamanya kuti vyose vyamara ndipo pakufiska ivyo vikalembeka mu Malembo wakati, “Ndomirwa.”

²⁹Pakaŵa chiŵiya penepara umo mukaŵa vinyo lakusasa. Ntheura ŵakabizgamo sipanje mu vinyo lira na kuyiweska ku kakhuni ka hisopo[7] ndipo ŵakakwezgera ku mlomo wakhe.

³⁰Yesu wakati wamwa vinyo lakusasa wakati, “Kwamara.” Penepapo wakakoŵama mutu wakhe ndipo wakapereka mzimu wakhe.

³¹Pakuti likaŵa zuŵa la kunozgekera chiphikiro cha Paska, ŵarara ŵa ŵaYuda kuti ŵakakhumba chara kuti mathupi ghakhalirire pa mphinjika mpaka zuŵa la Sabata Chifukwa zuŵa la Sabata ili likaŵa likuru. Ntheura ŵakamuromba Pilato kuti ŵaŵaphyore malundi, mwakuti mathupi ghawuskikepo pa mphinjika.

³²Ntheura ŵasilikari ŵakiza na kuphyora malundi gha munthu wakudanga na gha munyakhe, awo ŵakapayikika nayo pamoza.

³³Kweni para ŵakati ŵafika pa Yesu, ŵakasanga wafwa kale. Ntheura kuti ŵakamuphyora malundi chara.

³⁴Kweni yumoza wa ŵasilikari ŵara ŵakamuvotora Yesu ku lwegha na mukondo, penepapo ndopa na maji vikafuma.

³⁵(Munthu uyo wakachiwona ichi chikuchitika, ndiyo wakapereka ukaboni. Ndipo tikumanya kuti ukaboni wakhe ngwa unenesko, mwakuti imwe namwe mupulikane.)

³⁶Pakuti vinthu ivi vikachitika kuti Malembo ghafiskike agho ghakuti, “Chamkuphyokapo nanga nchiwangwa chakhe chimoza chara.”

³⁷Ndiposo Malembo ghanyakhe ghakuti, “Ŵamkumulaŵiska mweneuyo ŵamuvotora.”

³⁸Pamanyuma pa ichi, Yosefe wa ku Arimatiya (uyo wakaŵa musambiri wa Yesu kweni mu udesi, chifukwa wakopanga ŵaYuda,) wakaromba Pilato usange wangawuskapo thupi la Yesu. Pilato wakamuzomerezga. Ntheura wakiza na kuwuskapo thupi la Yesu.

³⁹Nikodemo, mweneuyo pakudanga wakiza kwa Yesu na usiku, nayoso wakiza uku wayegha mure na chinthembwe, vyakukwana makilogiramu pafupi 30.

⁴⁰Sono ŵakatora thupi la Yesu, na kulivungirizga na salu za bafuta pamoza na vyakununkhiskira, nga ndi kaluso ka ŵaYuda kakusungira ŵakufwa.

⁴¹Malo agho ŵakamupayikapo Yesu ghakaŵa pafupi na munda, ndipo mu munda ura mukaŵa dindi liphya leneilo kuti ŵakasungamo munthu na kale chara.

⁴²Ntheura pakuti likaŵa zuŵa la kunozgekera chiphikiro cha Paska, ndipo pakuti dindi likaŵa pafupi, ŵakamuŵika Yesu mwenemumo.