Read new_tumbuka_bible Yohane 2 Bible Online

Yohane 2 - new_tumbuka_bible bible

Yohane 2

¹Pa zuŵa la chitatu kukaŵa ukwati mu muzi wa ku Kana mu Galileya ndipo ŵanyina ŵa Yesu ŵakaŵapo.

²Yesu nayoso wakachemeka ku ukwati pamoza na ŵasambiri ŵakhe.

³Para vinyo likamara, ŵanyina ŵakamuphalira Yesu ŵakati, “Ŵalije vinyo.”

⁴Yesu wakati ku ŵanyina, “Mwe amama, nchivichiso ichi kwa ine na imwe? Nyengo yane yindakwane.”

⁵Ŵanyina ŵakhe ŵakati ku ŵateŵeti, “Chilichose icho wamuphaliraninge chitani.”

⁶Sono pakaŵa viŵiya vya mawe vinkhonde na chimoza ivyo ŵaYuda ŵakaŵika kwakuyana na maluso ghakujitozga. Chiŵiya chimoza chikazuranga na malita gha maji pafupi 100.

⁷Ntheura Yesu wakati ku ŵateŵeti, “Zuzgani maji mu viŵiya ivi.” Ŵakazuzga viŵiya vira mpaka pa kaŵende.

⁸Yesu wakati kwa iwo, “Sono neghanipo ndipo mukapereke ku murara wa chiphikiro.” Ntheura ŵakatora.

⁹Murara wa chiphikiro wakalaŵa maji agho ghakazgoka vinyo, kweni wakamanya chara uko likafuma. (Ŵateŵeti pera awo ŵakanegha maji ghara ndiwo ŵakamanya.) Ntheura murara wa chiphikiro wakachema mwene-nthengwa,

¹⁰na kumuphalira kuti, “Munthu yose pakudanga wakuŵapa ŵanthu vinyo liweme, ndipo para ŵakhuta, wakuŵapa vinyo ilo ndiheni. Kweni iwe wasunga vinyo liweme mpaka sono.”

¹¹Yesu wakachita chimanyikwiro chakudanga ichi ku Kana mu Galileya, na kurongora uchindami wakhe, ndipo ŵasambiri ŵakhe ŵakapulikana nayo.

¹²Pamanyuma pa ichi, Yesu wakaruta ku Kaperenaumu pamoza na ŵanyina na ŵanung'una ŵakhe, ndiposo na ŵasambiri ŵakhe, ndipo ŵakakhara kwenekura mazuŵa ghachoko waka.

¹³Yikati yaneng'enera nyengo ya chiphikiro cha Paska la ŵaYuda, Yesu wakaruta ku Yerusalemu.

¹⁴Mu Nyumba ya Chiuta, wakasangamo ŵanthu ŵakuguliska ng'ombe, mberere na nkhunda, ndiposo na awo ŵakasinthanga ndarama[1] mu matebulu ghawo.

¹⁵Yesu wakapanga chikoti cha vingwe, ndipo wakaŵachimbizga wose mu Nyumba ya Chiuta pamoza na mberere na ng'ombe. Wakagadabula matebulu gha awo ŵakasinthanga ndarama na kuthira ndarama zawo.

¹⁶Yesu wakaŵaphalira awo ŵakaguliskanga nkhunda wakati, “Fumyanimo vinthu ivi. Mureke kuyizgora nyumba ya Ŵadada kuŵa ya malonda.”

¹⁷Ŵasambiri ŵakhe ŵakakumbuka kuti kuli kulembeka kuti, “Phamphu ilo ndili nalo pa nyumba yinu, liti lindikome.”

¹⁸Ntheura ŵaYuda ŵakati kwa iyo, “Kasi ungatirongora chimanyikwiro uli chakuti uli na mazaza ghakuchitira vinthu ivi?”

¹⁹Yesu wakaŵazgora wakati, “Bwangandulani Nyumba ya Chiuta iyi, ndipo ine nditi ndiyizenge mu mazuŵa ghatatu.”

²⁰ŴaYuda ŵakati, “Nyumba iyi yikatora virimika 46, kuti ŵayizenge. Kasi uti uyizenge mu mazuŵa ghatatu?”

²¹Kweni para wakayowoyanga kuti Nyumba ya Chiuta, wakanenanga thupi lakhe.

²²Ntheura Yesu wakati wawuka ku ŵakufwa, ŵasambiri ŵakhe wakakumbuka kuti wakaŵayowoyera ichi. Ndipo ŵakapulikana na malembo ndiposo na mazgu agho Yesu wakayowoya.

²³Pa nyengo iyo Yesu wakaŵa mu Yerusalemu pa chiphikiro cha Paska, ŵanthu ŵanandi ŵakapulikana mu zina lakhe para ŵakawona vimanyikwiro ivyo wakachita.

²⁴Kweni Yesu wakaŵagomezga chara, chifukwa wakaŵamanya ŵanthu wose makora ghene.

²⁵Ndipo kuti kukakhumbikwa chara kuti munthu waliyose wamupanikizgire za munthu chifukwa iyomwene wakamanya ivyo vikaŵa mu munthu.