Read new_tumbuka_bible Yohane 20 Bible Online

Yohane 20 - new_tumbuka_bible bible

Yohane 20

¹Pa zuŵa lakudanga mu sabata, nyengo ya mulenje ku matandakucha, Mariya wa ku Magadala, wakaruta ku dindi. Wakaya kasanga kuti libwe lawuskikapo pa muryango wa dindi.

²Ntheura wakachimbira ndipo wakiza kwa Simoni Petrosi na ku musambiri munyakhe mweneuyo Yesu wakamutemwa, wakati kwa iwo, “Ŵawuskamo Fumu mu dindi, ndipo tikumanya chara uko ŵayiŵika.”

³Penepapo Petrosi na musambiri munyakhe ŵakafuma na kuchimbilira ku dindi.

⁴Wose ŵaŵiri ŵakachimbiranga pamoza, kweni musambiri munyakhe wakachimbira kuruska Petrosi ndipo ndiyo wakadanga kufika ku dindi.

⁵Wakakotama na kulingizga mu dindi, ndipo wakawona salu za bafuta zaŵikika mwenemumo. Kweni kuti wakanjiramo chara.

⁶Ntheura Simoni Petrosi, uyo wakamurondezganga nayo wakiza na kunjira mu dindi. Wakawona salu za bafuta zagonekeka mwenemura,

⁷na salu iyo yikaŵa ku mutu wakhe, yeneiyo kuti yikaŵa pamoza na za bafuta chara, kweni yikazingika pa dera pa yekha.

⁸Pa umaliro musambiri munyakhe, mweneuyo wakadanga kufika pa dindi, nayoso wakanjira ku dindi, ŵakawona, na kupulikana.

⁹Chifukwa ŵakaŵa ŵandaghamanyiske malembo agho ghakuti, Yesu wakwenera kuwuka ku wakufwa.

¹⁰Ntheura ŵasambiri ŵara ŵakawerera ku kaya.

¹¹Kweni Mariya wakimilira kuwaro kwa dindi uku wakulira. Apo wakaŵa wachali kulira, wakasindama na kulingizga mu dindi.

¹²Ntheura wakawona ŵangelo ŵaŵiri, ŵavwara vyakuvwara vituŵa. Ŵakakhara apo pakaŵa chitanda cha Yesu, yumoza ku mutu ndiposo munyakhe ku malundi.

¹³Ŵakati kwa iyo, “Wa mwanakazi, kasi ukulirachi?” Mariya wakati kwa iwo, “Chifukwa ŵawuskamo Fumu yane, ndipo nkhumanya chara uko ŵayiŵika.”

¹⁴Mariya wakati wayowoya ntheura wakang'anamuka, ndipo wakawona Yesu wakimilira penepara. Kweni kuti wakamumanya chara kuti ndi Yesu.

¹⁵Ndipo Yesu wakati kwa iyo, “Wa mwanakazi, kasi ukulirachi? Kasi ukupenja njani?” Mariya wakaghanaghananga kuti ndi mwenecho wa munda. Ntheura wakamuŵeya wakati, “Ŵadada, usange ndimwe mwangumutora mundiphalire uko mwamuŵika kuti ndirute nkhamutore.”

¹⁶Yesu wakati kwa iyo, “Mariya!” Penepapo Mariya wakang'anamukira kwa Yesu wakati mu chiHebere, “Rabboni!” (Ndiko kuti “Musambizgi.”)

¹⁷Yesu wakati kwa iyo, “Ungandikhwaskanga chara, pakuti ndichali ndindakwere ku Ŵadada. Kweni rutanga ku ŵanyane ukaŵaphalire kuti, ‘Nkhuwerera kuchanya ku Ŵadada ŵane ndiposo ŵawiskemwe, kwa Chiuta wane ndiposo kwa Chiuta winu.’ ”

¹⁸Ntheura Mariya wa ku Magadala wakaruta ku ŵasambiri, ndipo wakati, “Ndayiwona Fumu.” Ndipo wakaŵaphalira vyose ivyo Fumu yikamuyowoyera.

¹⁹Nyengo ya mise pa zuŵa leneilo lakudanga mu sabata, ŵasambiri ŵakawungana pamoza mu nyumba. Iwo ŵakajarako ku miryango chifukwa chakopa ŵaYuda. Ntheura Yesu wakiza, wakimilira mukati mwawo, ndipo wakati kwa iwo, “Mutende uŵenge namwe.”

²⁰Wakati wayowoya ntheura, wakaŵarongora mawoko ghakhe na mu mbambo. Ŵasambiri ŵakakondwa pakuwona Fumu.

²¹Yesu wakatiso kwa iwo, “Mutende uŵenge namwe! Nga ndi umo Ŵadada ŵakanditumira ine, ndimo nane nkhumutumirani.”

²²Wakati waŵayowoyera ivi, wakaphutira muvuchi pa iwo wakati, “Pokererani Mzimu Mutuŵa.

²³Wose awo mukuŵagowokera zakwananga zawo, zikugowokereka, ndipo awo mwareka kuŵagowokera, kuti zikugowokereka chara.”

²⁴Tomasi, yumoza wa ŵasambiri ŵakhe 12, mweneuyo wakachemekanga kuti Didimo, kuti wakaŵa pamoza na ŵanyakhe chara para Yesu wakiza.

²⁵Ntheura ŵasambiri ŵanyakhe ŵakamuphalira ŵakati, “Tayiwona Fumu.” Kweni Tomasi wakati kwa iwo, “Kwambula kuti ndiwone mabamba gha mizumali mu mawoko ghakhe, na kukhwaskamo mu mabamba ghara na munwe wane, ndiposo kwambula kuti ndiŵike munwe wane mu lwegha lwakhe, kuti nditi ndipulikanenge chara.”

²⁶Ghakati gharutapo mazuŵa ghankhonde na ghatatu, ŵasambiri ŵa Yesu ŵakawunganaso mu nyumba. Tomasi nayo wakaŵa pamoza nawo. Miryango yikaŵa yakujarika, ndipo Yesu wakiza, wakimilira mukati mwawo ndipo wakati, “Mutende uŵenge namwe.”

²⁷Ntheura Yesu wakati kwa Tomasi, “Zanga nawo kuno munwe wako, wona mawoko ghane. Nyoroska woko lako ukhwaske mu lwegha lwane kuti ureke kukayika, kweni ugomezge.”

²⁸Tomasi wakamuzgora wakati, “Fumu yane, na Chiuta wane!”

²⁹Yesu wakati kwa iyo, “Kasi wapulikana chifukwa wandiwona? Mbakutumbikika awo ŵandawone kweni ŵakupulikana.”

³⁰Sono Yesu wakachita vimanyikwiro vinyakhe vinandi panthazi pa ŵasambiri, vyeneivyo vindalembeke mu buku ili.

³¹Kweni ivi vyalembeka kuti mupulikane kuti Yesu ndi Mesiya, Mwana wa Chiuta, na kutiso para mwapulikana, muŵenge na umoyo mu zina lakhe.