Read new_tumbuka_bible Yohane 3 Bible Online

Yohane 3 - new_tumbuka_bible bible

Yohane 3

¹Sono kukaŵa munthu zina lakhe Nikodemo, murongozgi wa mu mphara ya ŵaYuda uyo wakaŵa yumoza wa ŵaFarisi.

²Usiku umoza wakiza kwa Yesu ndipo wakamuphalira wakati, “Musambizgi, tikumanya kuti ndimwe musambizgi wakufuma kwa Chiuta. Chifukwa kulije munthu uyo wangamanya kuchita vimanyikwiro ivi mukuchita imwe, kwambula kuti Chiuta waŵe nayo.”

³Yesu wakamuzgora wakati, “Inya, inya nadi, nkhukunenera kuti kwambula kuti munthu wababika muphya[2] wangamanya kuwona Ufumu wa Chiuta chara.”

⁴Nikodemo wakafumba wakati, “Kasi kungaŵa uli kuti munthu wababikeso uku ndi murara kale? Kasi wanganjiraso mu nthumbo ya ŵanyina na kubabikaso?”

⁵Yesu wakazgora wakati, “Inya, inya nadi, nkhukunenera kuti kwambula kuti munthu wababika na maji na Mzimu wangamanya kunjira mu Ufumu wa Chiuta chara.

⁶Icho nchakubabika na thupi ncha thupi, ndipo icho nchakubabika na Mzimu ncha Mzimu.

⁷Ungazizwanga chara apo ndakuphalira kuti ukwenera kubabika muphya.

⁸Mphepo yikuputira kose uko yikukhumba, ndipo iwe ukupulika kamphomezi kakhe, kweni kuti ukumanya chara uko yikufuma na uko yikuya. Ntheura ndimo waliri yose uyo ngwa kubabika na Mzimu.”

⁹Nikodemo wakafumba wakati, “Kasi ichi chingaŵa uli?”

¹⁰Yesu wakazgora wakati, “Ndiwe musambizgi mu Israele, mbwenu ukupulikiska ichi chara?

¹¹Inya, inya nadi nkhukunenera kuti, tikuyowoya icho tikuchimanya, ndipo tikuphara icho tachiwona, kweni kulije na yumoza uyo wakupokerera chipanikizgo chithu.

¹²Usange nkhukuphalira vinthu vya mu charu, ndipo ukupulikana chara, kasi ungapulikana uli usange nkhukuyowoyera vinthu vya kuchanya?

¹³Kulije munthu na yumoza uyo wali kuruta kuchanya, kweni Mwana wa Munthu uyo wakafuma kuchanya.”

¹⁴Nga ndi umo Mozesi wakatumphuskira njoka ya mkuŵa mu mapopa, ntheura kukwenera kuti Mwana wa Munthu nayo watumphuskike,

¹⁵mwakuti yose uyo wakupulikana mwa iyo waŵe na umoyo wa muyirayira.

¹⁶Pakuti Chiuta wakatemweska charu, rekani wakapereka Mwana wakhe yekha na yekha, mwakuti yose uyo wakupulikana mwa iyo wareke kutayika, kweni waŵe na umoyo wa muyirayira.

¹⁷Chiuta wakatuma Mwana wakhe mu charu kwiza keruzga charu chara, kweni kuti charu chiponoskekere mwa iyo.

¹⁸Yose uyo wakupulikana mwa iyo kuti wakweruzgika chara, kweni yose uyo wakuwura kupulikana, weruzgika kale, chifukwa walije kupulikana mu zina la Mwana wa Chiuta yekha na yekha.

¹⁹Pakuti uwu ndiwo weruzgi, kuti ungweru uli kwiza mu charu, kweni ŵanthu ŵakutemwa mdima kuruska ungweru, chifukwa milimo yawo njiheni.

²⁰Pakuti yose uyo wakuchita uheni wakutinkha ungweru ndipo kuti wakwiza ku ungweru chara, mzire milimo yakhe yiwonekere pakweru.

²¹Kweni yose uyo wakuchita icho ncha unenesko, ndiyo wakwiza ku ungweru, mwakuti milimo yakhe yiwonekere pakweru kuti yachitikira mwa Chiuta.

²²Pamanyuma pa vyeneivi Yesu na ŵasambiri ŵakhe ŵakaruta ku charu Yudeya ndipo wakakhara nawo kwenekura na kubapatiza.

²³Yohane nayoso wakabapatizanga ku Ayenoni pafupi na Salimu, chifukwa kwenekura ndiko kukaŵa maji ghanandi. Ŵanthu ŵakizanga ndipo iyo wakaŵabapatizanga.

²⁴Apa ndipo Yohane wakaŵa wachali wandaŵikike mu gadi.

²⁵Mphindano yikawuka pakati pa ŵasambiri ŵa Yohane na mu Yuda yunji pa maluso ghakujiphotora.

²⁶Ntheura ŵakiza kwa Yohane ŵakati, “Musambizgi, munthu yura mukaŵa nayo ku sirya linyakhe la mronga wa Yorodani, mweneuyo mukamuchitira ukaboni, sono nayo wakubapatiza ndipo ŵanthu wose ŵakuruta kwa iyo.”

²⁷Yohane wakaŵazgora wakati, “Kulije munthu uyo wangapokera kanthu kalikose kwambula kuti kaperekeke kwa iyo kufuma kuchanya.

²⁸Imwe mwekha ndimwe ŵakaboni ŵane apo nkhayowoya kuti, ‘Ine ndine Mesiya chara, kweni ndatumika panthazi pakhe.’

²⁹Uyo wali na mlowokazi ndiyo mwene-nthengwa. Kweni mubwezi wa mwene-nthengwa uyo wakwimilira na kumupulika wakusekerera chomene pakupulika mazgu gha mwene-nthengwa. Pa ichi sono chimwemwe chane chafiskika.

³⁰Iyo wakwenera kuti wakulenge kweni ine nkhwenera kuti ndichepenge.”

³¹“Uyo wakufuma kuchanya ngwa pachanya pa wose. Uyo ngwa mu charu, ngwa mu charu mbwenu. Vya mu charu ndivyo wakuyowoya. Uyo wakufuma kuchanya, ngwa pachanya pa wose.

³²Ndiyo wali na ukaboni wa icho wachiwona na kuchipulika, ndipouli palije na yumoza uyo wakupokerera ukaboni wakhe.

³³Uyo wakupokera ukaboni wakhe, wakakhozgera ichi kuti Chiuta ngwa kuneneska.

³⁴Pakuti uyo Chiuta wali kumutuma, wakuyowoya mazgu gha Chiuta, chifukwa Chiuta wakupereka Mzimu kwambula mweso.

³⁵Dada wakutemwa Mwana, ndipo wali kupereka vinthu vyose mu woko lakhe.

³⁶Uyo wakupulikana mu Mwana wali na umoyo wa muyirayira. Kweni uyo wakureka kupulikira Mwana kuti wamkuwona umoyo chara, kweni ukari wa Chiuta uli pa iyo.”