Read new_tumbuka_bible Yohane 4 Bible Online

Yohane 4 - new_tumbuka_bible bible

Yohane 4

¹Para Fumu yikamanya kuti ŵaFarisi ŵapulika kuti Yesu wakung'anamula na kubapatiza ŵasambiri ŵanandi kuruska Yohane,

²(nangauli, Yesu iyomwene kuti wakabapatizanga chara, kweni ŵasambiri ŵakhe,)

³yikawukako ku Yudeya ndipo yikarutaso ku Galileya.

⁴Ndipo nthowa yakhe yikaŵa yakusorota mu Samariya ndipera.

⁵Ntheura wakiza ku msumba wa Samariya zina lakhe Sukare pafupi waka na charu icho Yakhobe wakapa mwana wakhe Yosefe.

⁶Chisimi cha Yakhobe chikaŵa kwenekura. Ndipo ntheura Yesu pakuti wakavuka na ulendo, wakakhara pasi murwande mwa chisimi, apo nyengo yikaŵa pafupi 12 koloko na muhanya.

⁷Mwanakazi wa ku Samariya wakiza kuti waneghe maji. Yesu wakati kwa iyo, “Undipeko maji ndimwe.”

⁸Pakuti ŵasambiri ŵakhe ŵakaruta mu msumba kuya kagula vyakurya.

⁹Mwanakazi muSamariya yura wakati kwa iyo, “Chifukwa uli imwe, muYuda, mukuromba maji kwa ine nda mwanakazi muSamariya?” Pakuti ŵaYuda na ŵaSamariya[3] ŵakwenderana chara.

¹⁰Yesu wakamuzgora kuti, “Nga umanyenge chawanangwa cha Chiuta, na mweneuyo wakuti kwa iwe, ‘Undipeko maji ndimwe,’ iwe ndiwe mphanyi wangumuromba, ndipo iyo mphanyi wangukupa maji gha umoyo.”

¹¹Mwanakazi wakati kwa Yesu, “Fumu, chakuneghera mulije, ndipo chisimi nchakuzongoka. Kasi mutorenge nkhu maji agho gha umoyo?

¹²Kasi muli ŵakuru kuruska sekuru withu Yakhobe mweneuyo wakatipa chisimi ichi icho wakamwangapo iyomwene na ŵana ŵakhe na viŵeto vyakhe?”

¹³Yesu wakamuzgora wakati, “Yose uyo wakumwapo maji agha, wati womirwengeso.

¹⁴Kweni yose uyo wakumwapo maji agho nditi ndimupenge ine, kuti wati womirwengeso chara. Maji agho nditi ndimupenge iyo ghati ghaŵenge mwa iyo chisimi chakubwibwitukira ku umoyo wa muyirayira.”

¹⁵Mwanakazi wakati kwa iyo, “Fumu, ndipaniko maji gheneagha kuti ndireke komirwaso nanga nkhwizako kwiza kanegha maji.”

¹⁶Yesu wakati kwa iyo, “Ruta ukacheme mufumu wako ndipo wize kuno.”

¹⁷Mwanakazi wakamuzgora kuti, “Ndilije mufumu.” Yesu wakati kwa iyo, “Ukuneneska pakuyowoya kuti ‘Ndilije mufumu,’

¹⁸chifukwa ukaŵa na ŵafumu ŵankhonde ndipo uyo uli nayo sono kuti ndi mufumu wako chara, waneneska nadi.”

¹⁹Mwanakazi wakati kwa iyo, “Fumu, nkhuwona kuti ndimwe nchimi.”

²⁰“Ŵasekuru ŵa ise ŵaSamariya ŵakasopanga Chiuta pa phiri ili,[4] kweni imwe ŵaYuda mukuti mu Yerusalemu ndimo muli malo umo ŵanthu ŵakwenera kusopa Chiuta.”

²¹Yesu wakati kwa iyo, “Wa mwanakazi, upulikane nane, nyengo yizenge apo murekerenge kusopa Ŵadada pa phiri ili, nanga ndi mu Yerusalemu.

²²Imwe kuti mukumanya chara icho mukusopa. Kweni ise tikumanya icho tikusopa, chifukwa chiponosko chikufuma ku ŵaYuda.

²³Kweni nyengo yiti yizenge ndipo na sono yafika kale apo awo ŵakusopa nadi ŵamkusopa Ŵadada mu Mzimu na mu unenesko. Ŵakusopa ŵa ntheura ndiwo Ŵadada ŵakukhumba.

²⁴Chiuta ndi Mzimu ndipo awo ŵakumusopa ŵakwenera kumusopa mu Mzimu na mu unenesko.”

²⁵Mwanakazi wakati kwa iyo, “Nkhumanya nadi kuti Mesiya wakwiza mweneuyo wakuchemeka Khristu, ndipo para wafika ndiyo wizamkutimanyiska vinthu vyose.”

²⁶Penepapo Yesu wakati kwa iyo, “Ine nkhuyowoya na iwe ndine mweneuyo.”

²⁷Mbwenu penepapo ŵasambiri ŵakhe ŵakafika, ndipo ŵakazizwa para ŵakawona kuti Yesu wakuyowoya na mwanakazi. Kweni pakaŵavye na yumoza wakufumba kuti, “Ukupenjachi pano?” Nanga ndikumufumba Yesu kuti, “Chifukwa uli ukuyowoya na mwanakazi?”

²⁸Sono mwanakazi yura wakasida chiŵiya chakhe cha maji ndipo wakaruta mu msumba ndipo wakati ku ŵanthu,

²⁹“Zaninge mwiza kawona munthu mweneuyo wandiphalira vyose ivyo nkhachitanga. Kasi mweneuyo wangaŵa Mesiya?”

³⁰Ŵanthu ŵakafuma mu msumba na kuruta kwa Yesu.

³¹Pa nyengo yira ŵasambiri ŵakhe ŵakamuŵeya Yesu ŵakati, “Musambizgi, ryaninge.”

³²Kweni Yesu wakaŵazgora wakati, “Ine ndili nacho chakurya cheneicho imwe mulije kuchimanya.”

³³Ntheura ŵasambiri ŵakamba kufumbana ŵakati, “Kasi panguŵa munthu yunji uyo wangumuyeghera chakurya?”

³⁴Yesu wakati kwa iwo, “Chakurya chane nkhuchita khumbo la Ŵadada awo ŵakandituma na kufiska mlimo wawo.

³⁵Asi imwe mukuyowoya kuti ‘Kwakhara myezi yinayi ndipo kuti kuŵenge vuna.’ Nkhumuphalirani kuti, inuskani maso ghinu ndipo laŵiskani ku minda kosekose, uko minda yati waka tuu kunozgekera vuna.

³⁶Uyo wakuvuna wakupoka njombe yakhe na kuwunjika vipambi vya umoyo wa muyirayira, mwakuti uyo wakumija na uyo wakuvuna ŵasekerere pamoza.

³⁷Ndicho chifukwa mazgu gha kayowoyero aka ghakuneneska agho ghakuti, ‘Yumoza wakumija ndipo munyakhe wakuvuna.’

³⁸Nkhamutumani kuya kavuna icho mukaŵavye kulima. Ŵanthu ŵanji ŵali kuteŵeta mlimo ndipo imwe mwanjiramo waka mu mlimo wawo.”

³⁹ŴaSamariya ŵanandi mu msumba ura, ŵakapulikana mwa iyo chifukwa cha mazgu gha mwanakazi agho wakati, “Wangundiphalira vyose ivyo nkhachitanga.”

⁴⁰Ntheura para ŵaSamariya ŵakiza kwa Yesu, ŵakamuromba kuti wakakharepo nawo, ndipo wakakhara nawo mazuŵa ghaŵiri.

⁴¹Ndipo ŵanandiso ŵakapulikana chifukwa cha mazgu ghakhe.

⁴²Ntheura ŵaSamariya ŵakamuphalira mwanakazi ŵakati, “Sono tapulikana, kuti nchifukwa cha mazgu ghako chara, kweni tajipulikira tekha, ndipo tamanya kuti, nadi uyu ndi Muponoski wa charu chose cha pasi.”

⁴³Ghakati ghajumpha mazuŵa ghaŵiri Yesu wakaruta ku Galileya.

⁴⁴Pakuti Yesu mwenecho wakayowoya kuti, “Nchimi kuti njakuchindikika mu charu cha kwawo chara.”

⁴⁵Para Yesu wakafika ku Galileya, ŵanthu ŵa ku Galileya ŵakamupokerera pakuti iwo nawo ŵakaruta ku chiphikiro cha Paska ku Yerusalemu ndipo ŵakaviwona vyose ivyo Yesu wakachita kwenekura.

⁴⁶Ntheura Yesu wakizaso ku Kana mu Galileya uko wakazgora maji kuŵa vinyo. Ndipo kukaŵa munthu yunji wa nchito ya boma uyo mwana wakhe mwanarume wakarwara ku Kaperenaumu.

⁴⁷Para munthu yura wakapulika kuti Yesu wiza kufuma ku Yudeya, kwiza ku Galileya wakaruta kwa iyo na kumuromba kuti warute nayo Kaperenaumu kuti wakachizge mwana wakhe, uyo wakaŵa pafupi na kufwa.

⁴⁸Ntheura Yesu wakamuphalira wakati, “Kwambula kuti muwone vimanyikwiro na vyakuzizwiska, kuti mungapulikana chara.”

⁴⁹Wa nchito ya boma wakati kwa iyo, “Fumu, tiyeni tirutenge pambere mwana wane wandafwe.”

⁵⁰Yesu wakati kwa iyo, “Rutanga, mwana wako waŵenge wamoyo.” Munthu yura wakapulikana na mazgu agho Yesu wakamuphalira ndipo wakaruta.

⁵¹Apo wakaŵa mu nthowa ŵateŵeti ŵakhe ŵakakumana nayo, ŵakamuphalira ŵakati, “Mwana winu wachira.”

⁵²Ntheura wakaŵafumba na ora ilo mwana wakachilira ndipo ŵakamuphalira ŵakati, “Kuthukira kwa mu thupi kukamureka mayiro pa 1 koloko ku mise.”

⁵³Ntheura wiske wakamanya kuti yikaŵa ora leneilo Yesu wakamuyowoyera kuti, “Mwana wako waŵenge wamoyo.” Penepapo iyo na ŵa mu nyumba yakhe yose ŵakapulikana mwa Yesu.

⁵⁴Ichi chikaŵa chimanyikwiro cha chiŵiri icho Yesu wakachita wakati wafika mu Galileya kufuma ku Yudeya.