Read new_tumbuka_bible Yohane 5 Bible Online

Yohane 5 - new_tumbuka_bible bible

Yohane 5

¹Pamanyuma pa vyeneivi, kukaŵa chiphikiro cha ŵaYuda ndipo Yesu nayo wakaruta ku Yerusalemu.

²Kwenekuko ku Yerusalemu kuli chiziŵa pafupi na Chipata cha Mberere[5] icho mu chiHebere chikuchemeka Betesaida, icho chikaŵa na makhonde ghankhonde.

³Umu mukagonanga ŵarwari ŵanandi: ŵachiburumutira, ŵakupendera na ŵakuphapa. [Wose aŵa ŵakalindizganga kuvunduka kwa maji.

⁴Chifukwa mungelo wa Chiuta wakizanga kaŵirikaŵiri na kuvundura maji. Munthu uyo wakadanga kunjira mu chiziŵa para ghakavundukanga, wakachiranga ku nthenda yakhe yose iyo yikamusuzganga.]

⁵Mukati mu ŵanthu ŵara ŵakurwara, wakaŵamo munthu yumoza uyo wakaŵa murwari pa virimika 38.

⁶Apo Yesu wakamuwona na kumanya kuti wakaŵa penepara nyengo yitali, wakati kwa iyo, “Kasi ukukhumba kuchizgika?”

⁷Murwari yura wakazgora wakati, “Fumu, ndilije munthu wakundiŵika mu chiziŵa para maji ghakuvunduka. Ndipo para nkhuti ndinjiremo, nkhusanga kuti munyakhe wanjira kale.”

⁸Ntheura Yesu wakati kwa iyo, “Wuka, nyamura mphasa yako wendenge.”

⁹Penepapo munthu yura wakachira, wakatora mphasa yakhe, na kwamba kwenda. Sono zuŵa lira likaŵa la Sabata

¹⁰ŴaYuda ŵakati ku munthu uyo wakachizgika, “Muhanya uno ndi zuŵa la Sabata, kuti kukulangurika chara kuti uyeghe mphasa yako.”

¹¹Iyo wakaŵazgora kuti, “Uyo wangundichizga ndiyo wangundiphalira kuti nyamura mphasa yako wendenge.”

¹²Ntheura ŵakamufumba ŵakati, “Kasi ndi njani munthu uyo wangukuphalira kuti nyamura mphasa yako wendenge?”

¹³Kweni munthu uyo wakachizgika kuti wakamumanya chara uyo wakamuchizga, pakuti Yesu wakawukapo pakuti pakaŵa ŵanthu ŵanandi.

¹⁴Pamanyuma pa vyeneivi Yesu wakamusanga munthu yura mu Nyumba ya Chiuta, ndipo wakati kwa iyo, “Wona, wachira. Ureke kwanangaso, chinthu chiheni chomene chikuwire.”

¹⁵Munthu yura wakaruta ndipo wakaya kaŵaphalira ŵaYuda kuti uyo wamuchizga ndi Yesu.

¹⁶Ndipo pa chifukwa ichi ŵaYuda ŵakamuzikizga Yesu pakuti wakamuchizga pa zuŵa la Sabata.

¹⁷Kweni Yesu wakati kwa iwo, “Ŵadada ŵachali kuteŵeta mlimo mpaka sono ndipo ine nane nkhuteŵeta.”

¹⁸Chifukwa cha ichi, ŵaYuda ŵakakhumbirakhumbira kuti ŵamukome Yesu, kuti ndi chifukwa chakuti Yesu wakaswanga Sabata pera chara, kweni nchifukwa chakuti iyo wakatenge ndi Mwana wa Chiuta. Kuyowoya kwa ntheura kukamuzgora kuti wakuyana na Chiuta.

¹⁹Ntheura Yesu wakaŵazgora wakati, “Inya, inya nadi, nkhumunenerani kuti, Mwana, kuti wangachita kanthu pa yekha chara, kweni icho wakuwona Ŵawiske ŵakuchita pera. Ivyo Ŵawiske ŵakuchita ndivyo Mwana nayo wakuchita.

²⁰Pakuti Ŵawiske ŵakumutemwa Mwana ndipo ŵakumurongora vyose ivyo iwo ŵakuchita. Ŵamurongorenge milimo yikuru yakuruska iyi, ndipo muti muzizwenge.

²¹Chifukwa nga ndi umo Ŵawiske ŵakuwuskira ŵakufwa na kuŵapa umoyo, ntheuraso ndimo Mwana nayo wakuŵapira umoyo awo wakukhumba kuŵapa.

²²Pachanya pa ichi, Ŵawiske kuti ŵakweruzga munthu chara, kweni weruzgi wose ŵali kumupa Mwana.

²³Mwakuti wose ŵamuchindikenge Mwana nga ndi umo ŵakuŵachindikira Ŵawiske. Uyo wakureka kuchindika Mwana, kuti wakuchindika Ŵawiske chara awo ŵakamutuma.”

²⁴“Inya, inya nadi, nkhumunenerani kuti yose uyo wakupulika mazgu ghane na kupulikana na uyo wakandituma, wali na umoyo wa muyirayira. Kuti wamkweruzgika chara, kweni wajumpha nyifwa, wanjira mu umoyo.

²⁵Inya, inya nadi, nkhumunenerani kuti nyengo yikwiza, ndipo ndi sono, apo ŵakufwa ŵamkupulika mazgu gha Mwana wa Chiuta. Ndipo awo ŵamkupulika ŵati ŵaŵe na umoyo.

²⁶Nga ndi umo Ŵawiske ŵaliri na umoyo mwa iwo ŵekha, ntheura pera ndimo ŵakamupira Mwana kuŵa na umoyo mwa iyo yekha.

²⁷Ndipo ŵali kumupa Mwana mazaza ghakweruzga chifukwa ndi Mwana wa Munthu.

²⁸Mureke kuzizwa na ichi, pakuti nyengo yikwiza apo wose ŵakufwa awo ŵali mu mararo ŵamkupulika mazgu ghakhe.

²⁹Ŵanthu awo ŵali kuchita uweme ŵamkuwukira ku umoyo, kweni awo ŵali kuchita uheni ŵamkuwukira ku ŵeruzgi.

³⁰“Ndingachita kanthu chara mu mazaza gha ine ndekha. Nkhweruzga nga ndi umo nkhupulikira. Ndipo weruzgi wane ngwa urunji chifukwa kuti nkhweruzga kwakuyana na khumbo lane chara, kweni kwakuyana na khumbo la Ŵadada awo ŵakandituma.

³¹“Usange nkhujikhalira ukaboni ndekha, ipo ukaboni wane kuti ngwa unenesko chara.

³²Kweni walipo munyakhe uyo wakundikhalira ine ukaboni, ndipo nkhumanya kuti ukaboni wakhe pa ine ngwa unenesko.

³³Imwe mukatuma mathenga ghinu kwa Yohane Mubapatizi ndipo iyo wali kupanikizgira ukaboni ku unenesko.

³⁴Kuti nkhwakuti ukaboni uwo nkhupokera ngwa kufumira ku munthu chara, kweni nkhuyowoya ichi kuti imwe muponoskeke.

³⁵Yohane wakaŵa nyali yakugolera na kuŵala, ndipo pa nyengo yichoko waka imwe mukanwekera kukondwera mu ungweru wakhe.

³⁶Kweni ine ndili nawo ukaboni ukuru kuruska wa Yohane. Chifukwa milimo iyo Ŵadada ŵali kundipa kumarizga, ndiyo nkhuchita, ndipo yikurongora ukaboni kuti Ŵadada ŵali kundituma.

³⁷Ndipo Ŵadada awo ŵakandituma ndiwo ŵene ŵakundipanikizgira ukaboni. Imwe mundapulikepo lizgu lawo na kale, ndiposo mundaŵawone umo ŵaliri.

³⁸Mazgu ghawo kuti ghalimo mwa imwe chara, chifukwa kuti mukupulikana na uyo ŵakamutuma chara.

³⁹Mukusanda malembo chifukwa mukupima kuti mu gheneagha musangenge umoyo wa muyirayira. Ndipo malembo gheneagha ndigho ghakundipanikizgira ine ukaboni.

⁴⁰Ndipouli, mukukhumba kwiza kwa ine chara kuti muŵe na umoyo.

⁴¹“Kuti nkhukhumba kupokera uchindami kufuma ku ŵanthu chara,

⁴²kweni nkhumumanyani kuti mulije kutemwa kwa Chiuta mu mitima yinu.

⁴³Ine ndili kwiza mu zina la Ŵadada, ndipo imwe kuti mukundipokerera chara. Kweni usange munyakhe wangiza mu zina lakhe, iyo muti mumupokererenge.

⁴⁴Kasi imwe mungapulikana uli apo mukupokerera marumbo kufuma ku yumoza na munyakhe ndipo mukupenja chara uchindami uwo ukufumira kwa Chiuta yekha na yekha?

⁴⁵Kweni mureke kughanaghana kuti ine ndine ndamkumupachani na mrandu panthazi pa Ŵadada. Uyo wamkumupachani ndi Mozesi, mweneuyo mukumugomezga.

⁴⁶Usange mukapulikana na Mozesi, mphanyi mwangupulikana na ine, chifukwa iyo wakalemba vya ine.

⁴⁷Kweni usange mukuwura kupulikana na ivyo wakalemba, kasi mupulikanenge uli mazgu ghane?”