Read new_tumbuka_bible Yohane 6 Bible Online

Yohane 6 - new_tumbuka_bible bible

Yohane 6

¹Pamanyuma pa ichi, Yesu wakambukira ku sirya linyakhe la Nyanja ya Galileya iyo ndi nyanja ya Tiberiya.

²Mzinda wa ŵanthu ukamurondezga chifukwa ŵakawona vimanyikwiro ivyo wakachita pa ŵarwari.

³Yesu wakakwerera ku phiri ndipo kwenekura wakaya kakhara pasi na ŵasambiri ŵakhe.

⁴Ndipo Paska, chiphikiro cha ŵaYuda, likaŵa pafupi.

⁵Sono Yesu pakwinuska maso ghakhe na kuwona kuti mzinda wa ŵanthu ukwiza kwa iyo, wakamufumba Filipu wakati, “Kasi tingaya kagula nkhu vingwa kuti ŵanthu aŵa ŵarye?”

⁶Wakayowoya ichi kuti wamuyezge Filipu, chifukwa iyo mwenecho wakamanya kale icho wachitenge.

⁷Filipu wakamuzgora wakati, “Nanga ndarama 200 kuti zingagula chara vingwa vyakukwana kuti waliyose wa iwo wapokeko wuwo nanga kangaŵa kachoko.”

⁸Musambiri wakhe yunji, zina lakhe Andreya, munung'una wa Simoni Petrosi, wakati,

⁹“Walipo pano musepuka yumoza mweneuyo wali na vingwa vya nyauti vinkhonde na somba ziŵiri. Kweni ndivyo vingachitachi ku ŵanthu wose aŵa?”

¹⁰Yesu wakati, “Ŵakharikani pasi ŵanthu.” Sono pakaŵa utheka unandi pa malo gheneghara. Ntheura ŵanthu ŵakakhara pasi ndipo unandi wawo ŵakaŵa ŵanarume pera pafupi vikwi vinkhonde.

¹¹Ntheura Yesu wakatora vingwa, ndipo ŵakati wawonga kwa Chiuta, wakaŵagaŵira ŵanthu awo ŵakakhara pasi. Wakachita ntheura pera na somba na kuŵagaŵira kwakuyana na umo ŵakakhumbira.

¹²Para ŵanthu ŵakati ŵakhuta, Yesu wakaŵaphalira ŵasambiri ŵakhe kuti, “Sorani vimenyu ivyo vyakharapo, kuti pareke kutayikapo kalikose.”

¹³Ntheura ŵakasora vimenyu vya vingwa vinkhonde vya nyauti vyeneivyo ŵakavireka awo ŵakaryanga. Ndipo ŵakazuzga vidunga 12.

¹⁴Para ŵanthu ŵakawona chimanyikwiro icho Yesu wakachita ŵakati, “Iyi ndiyo nadi nchimi yeneiyo ŵakatenge yikwiza mu charu!”

¹⁵Para Yesu wakamanya kuti ŵanthu ŵakakhumbanga kwiza kamukora na nkhongono na kumwimika kuti waŵe karonga wawo, wakawukapo na kuwereraso ku phiri kuti wakaŵe pa yekha.

¹⁶Kukati kwaŵa mise, ŵasambiri ŵakhe ŵakakhilira ku nyanja,

¹⁷na kunjira mu ngaraŵa na kwamba kwambuka nyanja kuruta ku Kaperenaumu. Pa nyengo iyi ndipo kwafipa kale, kweni Yesu wakaŵa wandafike kwa iwo.

¹⁸Nyanja yikawuka chifukwa mphepo yikuru yikaputanga.

¹⁹Para ŵakati ŵavuŵa ngaraŵa kuyana na mtunda wa makilomita ghankhonde panji ghankhonde na limoza, ŵakawona Yesu wakwenda pa nyanja, ndipo ŵakazura na wofi.

²⁰Yesu wakaŵaphalira wakati, “Ndine, mungopanga.”

²¹Penepapo ŵakaŵa ŵakukondwa kumutorera mu ngaraŵa ndipo maluŵiro ngaraŵa yikafika pa mlima uko ŵakayanga.

²²Na machero ghakhe ŵanthu awo ŵakakhalira sirya linyakhe la nyanja, ŵakawona kuti pakaŵa ngaraŵa yimoza pera, na kuti Yesu wakanjiramo chara pamoza na ŵasambiri ŵakhe, kweni kuti ŵasambiri ŵakhe ŵakaruta ŵekha.

²³Ndipouli ngaraŵa izo zikafuma ku nyanja ya Tiberiya zikafika pafupi na apo iwo ŵakaryeranga vingwa Fumu yikati yawonga Chiuta.

²⁴Ntheura ŵanthu ŵakati ŵawona kuti Yesu palije, nanga ndi ŵasambiri ŵakhe, iwoŵene ŵakanjira mu ngaraŵa na kuruta ku Kaperenaumu, kuya kapenja Yesu.

²⁵Para ŵakati ŵamusanga Yesu ku sirya linyakhe la nyanja, ŵakamufumba ŵakati, “Musambizgi, mukiza pauli kuno?”

²⁶Yesu wakaŵazgora wakati, “Inya, inya nadi, nkhumunenerani kuti mukundipenja chifukwa chakuti mukawona vimanyikwiro chara, kweni chifukwa chakuti mukarya vingwa vira na kukhuta.

²⁷Mureke kuteŵetera chakurya icho chikumara, kweni teŵeterani chakurya icho chikukhalirira mpaka ku umoyo wa muyirayira, cheneicho Mwana wa Munthu wati wamupaninge. Chifukwa Chiuta Wiske wali kuŵika chimanyikwiro cha mazaza ghakhe pa iyo.”

²⁸Ntheura ŵakamufumba ŵakati, “Kasi tikwenera kuchita vichi kuti tichite mlimo wa Chiuta?”

²⁹Yesu wakaŵazgora wakati, “Mlimo wa Chiuta ndi uwu: kuti mupulikane na mweneuyo wakamutuma.”

³⁰Ŵakamufumbaso ŵakati, “Nchimanyikwiro uli icho mungachita kuti ise tichiwone ndipo tipulikanenge namwe? Muchitenge vichi?

³¹Ŵasekuru ŵithu ŵakarya mana mu mapopa. Nga ndi umo kuli kulembekera kuti, ‘Wakaŵapa chingwa chakufuma kuchanya kuti ŵarye.’ ”

³²Ntheura Yesu wakati kwa iwo, “Inya, inya nadi, nkhumunenerani kuti ndi Mozesi chara uyo wakamupani chingwa chakufuma kuchanya. Ŵadada ndiwo ŵakumupani imwe chingwa chenecho chakufumira kuchanya.

³³Pakuti chingwa icho Chiuta wakupereka ndi mweneuyo wakwikha kufuma kuchanya na kupereka umoyo ku charu.”

³⁴Iwo ŵakati kwa iyo, “Fumu, mutipenge chingwa ichi nyengo zose.”

³⁵Yesu wakati kwa iwo, “Ine ndine chingwa cha umoyo. Uyo wakwiza kwa ine, kuti waŵenge na njara chara. Uyo wakupulikana mwa ine kuti wati womirwenge chara.

³⁶Kweni ine nkhamuphalirani kuti mwandiwona, ndipouli kuti mukupulikana chara.

³⁷Wose awo Ŵadada ŵakundipa, ŵati ŵizenge kwa ine. Ndipo yose uyo wakwiza kwa ine, kuti nditi ndimutaye kuwaro chara.

³⁸Pakuti ine ndili kwikha kufuma kuchanya kwiza kachita khumbo lane na lane chara, kweni kwiza kachita khumbo la uyo wakandituma.

³⁹Ndipo ili ndi khumbo la Ŵadada awo ŵakandituma, kuti ndireke kutayapo nanga njumoza wa awo ŵali kundipa. Kweni kuti ndiŵawuske wose pa zuŵa la umaliro.

⁴⁰Pakuti ili ndilo khumbo la Ŵadada, kuti yose uyo wakuwona Mwana na kupulikana mwa iyo, waŵenge na umoyo wa muyirayira ndipo ndamkumuwuska pa zuŵa la umaliro.”

⁴¹ŴaYuda ŵakamba kumudinginyikira Yesu chifukwa wakati, “Ine ndine chingwa icho chikikha kufuma kuchanya.”

⁴²Ntheura ŵakati, “Asi uyu ndi Yesu mwana wa Yosefe, uyo ŵawiske na ŵanyina tikuŵamanya? Kasi sono wakuyowoya uli kuti, ndili kwikha kufuma kuchanya?”

⁴³Yesu wakaŵazgora wakati, “Rekani kudinginyika mukati mwinu.

⁴⁴Palije munthu wakwiza kwa ine kwambula kuti Ŵadada awo ŵakandituma ŵamuguzira kwa ine, ndipo ine ndamkumuwuska ku ŵakufwa pa zuŵa la umaliro.

⁴⁵Nchimi zikalemba kuti ‘Ŵanthu wose ŵamkusambizgika na Chiuta.’ Yose uyo wakuŵapulika Ŵadada na kusambira kwa iwo ndiyo wakwiza kwa ine.

⁴⁶Palije na yumoza uyo wali kuwona Ŵadada, kweni uyo wali kufuma kwa Chiuta pera, ndiyo wali kuŵawona Ŵadada.

⁴⁷Inya, inya nadi, nkhumunenerani kuti yose uyo wakupulikana wali na umoyo wa muyirayira.

⁴⁸Ine ndine chingwa cha umoyo.

⁴⁹Ŵawiskemwekuru ŵakaryanga mana mu mapopa ndipo ŵakafwa.

⁵⁰Ichi ndi chingwa icho chikwikha kufuma kuchanya icho munthu wakwenera kurya kuti wareke kufwa.

⁵¹Ine ndine chingwa chamoyo icho chikikha kufuma kuchanya. Usange munthu wakurya chingwa ichi wati waŵenge wamoyo kwa muyirayira. Ndipo chingwa icho nditi ndiperekenge ine, ndi thupi lane mwakuti charu chiŵe na umoyo.”

⁵²Ntheura ŵaYuda ŵakamba kupindana mukati mwawo. Ŵakayowoyeskana ŵakati, “Kasi munthu uyu wangatipa uli thupi lakhe kuti tirye?”

⁵³Yesu wakazgora wakati, “Inya, inya nadi, nkhumunenerani, kwambula kuti murye thupi la Mwana wa Munthu, na kumwa ndopa zakhe, kuti mungaŵa na umoyo pa mwekha chara.

⁵⁴Yose uyo wakurya thupi lane na kumwa ndopa zane wali na umoyo wa muyirayira. Ndipo ine ndizamkumuwuska ku ŵakufwa pa zuŵa la umaliro.

⁵⁵Pakuti thupi lane ndi chakurya chenecho ndipo ndopa zane ndi chakumwa chenecho.

⁵⁶Yose uyo wakurya thupi lane na kumwa ndopa zane, wakukhara mwa ine ndipo ine nane mwa iyo.

⁵⁷Nga ndi umo Ŵadada ŵamoyo ŵakanditumira ine, ndiposo ine nane ndili na umoyo mwa iwo, ntheuraso yose uyo wakurya ine, wati waŵenge na umoyo chifukwa cha ine.

⁵⁸Ichi ndi chingwa icho chikikha kufuma kuchanya icho kuti chikuyana na mana chara agho ŵasekuru ŵinu ŵakarya kweni ŵali kufwa. Uyo wakurya chingwa ichi wati waŵenge wamoyo kwa muyirayira.”

⁵⁹Yesu wakayowoya ichi mu nyumba ya kusoperamo apo wakasambizganga ku Kaperenaumu.

⁶⁰Ŵasambiri ŵa Yesu ŵanandi ŵakati ŵapulika vyeneivi ŵakati, “Kayowoyero aka nkhanonono, ndi njani wangapulikizga ku ichi.”

⁶¹Yesu wakamanya kuti ŵasambiri ŵakhe ŵakudinginyika pa ichi, ntheura wakati kwa iwo, “Kasi mukukhuŵara na kasambizgiro aka?

⁶²Ipo kungaŵa uli usange mungawona Mwana wa Munthu wakukwerera uko wakaŵa kale?

⁶³Mzimu wa Chiuta ndiwo ukupereka umoyo, thupi la munthu kuti likwandula kanthu chara. Mazgu agho ndamuyowoyerani ndigho Mzimu na umoyo.

⁶⁴Kweni pali ŵanji ŵa imwe awo kuti ŵakupulikana chara.” (Pakuti Yesu wakaŵamanya kufuma pakudanga awo ŵamkuwura kupulikana na uyo wizamkumwendera mphiska.)

⁶⁵Yesu wakarutilira wakati, “Ichi ndicho chifukwa ndangumuphalirani kuti, palije na yumoza wangiza kwa ine kwambula kuti Ŵadada ndiwo ŵamwenereske kwiza kwa ine.”

⁶⁶Kufuma nyengo iyo ŵanandi ŵa ŵasambiri ŵakhe ŵakamujowola na kuwerera ku vinthu vyawo vya kale, ndipo kuti ŵakamanya kwendaso nayo chara.

⁶⁷Yesu wakaŵafumba ŵasambiri 12 ŵara, wakati, “Kasi namweso mukukhumba kuruta?”

⁶⁸Simoni Petrosi wakamuzgora wakati, “Fumu, kasi tirutenge kwa njani? Imwe ndimwe muli nagho mazgu gha umoyo wa muyirayira.

⁶⁹Ntheura ise tapulikana, ndipo tapanikizga na kumanya kuti imwe ndimwe Mutuŵa Yura wa Chiuta.”

⁷⁰Yesu wakaŵazgora wakati, “Asi ine nkhamusorani imwe 12, kweni yumoza wa imwe ndi Satana?”

⁷¹Wakanenanga Yudasi mwana wa Simoni Isikariyoti, pakuti iyo, nanga wakaŵa yumoza wa ŵasambiri 12, ndiyo wakaŵa wakwiza kamwendera mphiska Yesu.