Read new_tumbuka_bible Yohane 7 Bible Online

Yohane 7 - new_tumbuka_bible bible

Yohane 7

¹Pamanyuma pa ichi, Yesu wakenderanga chigaŵa cha Galileya. Iyo kuti wakakhumba kwendera chigaŵa cha Yudeya chara chifukwa ŵaYuda ŵakakhumbanga kumukoma.

²Pa nyengo yeneiyo, chiphikiro cha ŵaYuda cha misasa chikaneng'enera.

³Ntheura ŵabali ŵakhe ŵakati, “Fumapo pano urute ku Yudeya, mwakuti ŵasambiri ŵako nawo ŵakawone milimo ya minthondwe iyo ukuchita.

⁴Pakuti palije munthu uyo wakuyibisa milimo yakhe usange wakukhumba kumanyikwa. Usange ukuchita vinthu ivi, ipo ujivumbule wamwenecho ku charu.”

⁵Pakuti nanga mbabali ŵakhe kuti ŵakapulikana mwa iyo chara.

⁶Ntheura Yesu wakati, “Nyengo yane yindafike, kweni nyengo yinu yilipo nyengo yose.

⁷Charu kuti chingamutinkhani imwe chara, kweni ine chikunditinkha, chifukwa nkhuchipanikizgira kuti milimo yakhe njiheni.

⁸Imwe rutani ku chiphikiro icho. Ine kuti nkhuyako chara chifukwa nyengo yane yichali yindafike.”

⁹Wakati wayowoya ntheura iyo wakakhalira mu Galileya.

¹⁰Kweni ŵakati ŵaruta ŵabali ŵakhe ku chiphikiro cha misasa, Yesu nayo wakaruta, pakweru chara kweni mu udesi.

¹¹Ndipo ku chiphikiro kura, ŵaYuda ŵakamupenjanga na kuti, “Munthu yura walinkhu?”

¹²Ŵanthu ŵanandi ŵakaphwepwerezgananga mukati mu mzinda chifukwa cha iyo. Ŵanji ŵakati, “Ndi munthu muweme.” Kweni ŵanji ŵakati, “Chara, wakupuruska ŵanthu.”

¹³Ndipouli chifukwa chakopa ŵaYuda na yumoza wakayowoya pakweru za iyo.

¹⁴Apo chiphikiro chikaŵa mukati, Yesu wakaruta ku Nyumba ya Chiuta na kwamba kusambizga.

¹⁵ŴaYuda ŵakazizwa chomene ŵakati, “Kasi munthu wakumanya uli malemba, apo wandasambire?”

¹⁶Yesu wakazgora wakati, “Ivyo nkhusambizga kuti nvyane chara, kweni nvya uyo wakandituma.

¹⁷Yose uyo wakukhumba kuchita khumbo la Chiuta, wati wamanyenge usange icho nkhusambizga chikufuma kwa Chiuta panji nkhuyowoyera mu mazaza ghane.

¹⁸Munthu uyo wakuyowoya vya iyo yekha, wakupenja uchindami wa iyo yekha, kweni uyo wakupenja uchindami wa uyo wakamutuma, ngwa kuneneska, ndipo mwa iyo mulije upusikizgi.

¹⁹Kasi Mozesi wakamupani chara Dango? Kweni kulije na yumoza wa imwe uyo wakupulikira Dango. Chifukwa uli mukukhumba kundikoma?”

²⁰Mzinda wa ŵanthu ukamuzgora ukati, “Uli na chiŵanda! Ndi njani uyo wakukhumba kukukoma?”

²¹Yesu wakati kwa iwo, “Nkhachita mlimo umoza, ndipo imwe mose mukazukuma.

²²Mozesi wakamupani ukotori nangauli kuti uli kufuma kwa Mozesi chara, kweni ku ŵasekuru, ndipo imwe mukukotora mwana mwanarume pa zuŵa la Sabata

²³Sono usange mukukotora mwana mwanarume pa zuŵa la Sabata, kuti mureke kuswa Dango la Mozesi, chifukwa uli mukundikaripira ine chifukwa cha kuchizga munthu pa zuŵa la Sabata?

²⁴Rekani kweruzga kwa kuyana na kawonekero, kweni keruzgiro kinu kaŵenge kakunyoroka.”

²⁵Ntheura ŵanthu ŵanji ŵa mu Yerusalemu ŵakati, “Kasi ndi munthu uyu chara uyo ŵakukhumba kumukoma?

²⁶Wonani sono wakuyowoya pakweru kweni ŵakuzgorako na kanthu chara. Kasi kungaŵa kuti ŵamazaza ŵamanya nadi kuti uyu ndiyo Mesiya?

²⁷Kweni Mesiya para wakwiza, na yumoza wakumanya uko wafumirenge, ndipo ise tikumanya uko munthu uyu wakufuma.”

²⁸Ntheura pakusambizga mu Nyumba ya Chiuta, Yesu wakachemerezga wakati, “Nadi mukundimanya ine na kumanyaso uko nkhufuma. Kweni kuti ndili kwiza pa ine ndekha chara. Uyo wali kundituma ine ngwa kuneneska ndipo iyo mukumumanya chara.

²⁹Kweni ine nkhumumanya, chifukwa ndiko ndili kufuma ndipo ndiyo wakandituma.”

³⁰Ntheura ŵakakhumba kumukora, kweni pakaŵavye munthu wakuŵika woko lakhe pa iyo, chifukwa nyengo yakhe yikaŵa yindafike.

³¹Nanga ndi ntheura, ŵanthu ŵanandi mu mzinda ŵakapulikana mwa iyo ndipo ŵakati, “Para Mesiya wakwiza, kasi wamkuchita vimanyikwiro vikuru kuruska ivyo wachita munthu uyu.”

³²ŴaFarisi ŵakapulika mzinda wa ŵanthu ukuphwepwerezga ntheura na za Yesu. Ntheura iwo pamoza na ŵasofi ŵarara ŵakatuma ŵalinda ŵa Nyumba ya Chiuta kuti ŵakamukore Yesu.

³³Ntheura Yesu wakati, “Ndipouli pa nyengo yichoko waka iyo ndichali namwe, ndipo nditi ndirutenge kwa uyo wakandituma.

³⁴Mwamkundipenja, ndipo kuti mwamkundisanga chara. Uko ndili ine kuti mungizako chara.”

³⁵ŴaYuda ŵakayowoyeskana ŵakati, “Kasi munthu uyu wakukhumba kuyankhu, kweneuko ise titondekenge kukamusanga? Panji wakukhumba kuruta ku ŵaYuda awo ŵali kuparanyikira ku misumba ya ŵaGriki kuti wakaŵasambizge.

³⁶Kasi wakung'anamulachi, apo wakuti, ‘Mwamkundipenja ndipo kuti mwamkundisanga chara, ndipo uko ine ndili mungizako chara?’ ”

³⁷Pa zuŵa la umaliro, zuŵa likuru la chiphikiro, Yesu wakimilira na kuchemerezga, wakati, “Usange yunji womirwa, rekani wize kwa ine ndipo wamwe.

³⁸Yose uyo wakupulikana mwa ine, nga ndi umo malembo ghanenera, ‘Mironga ya maji ghamoyo yamkufuma mu mtima wakhe.’ ”

³⁹Sono ichi Yesu wakayowoyanga za Mzimu uwo awo ŵakapulikana mwa iyo ŵakenera kupokera. Pakuti pa nyengo yira Mzimu wakaŵa wandaperekeke chifukwa Yesu wakaŵa wandachindikike.

⁴⁰Para ŵanthu ŵakapulika mazgu agha, ŵanji ŵakati, “Nadi, munthu uyu ndi nchimi!”

⁴¹Ŵanyakhe ŵakati, “Munthu uyu ndi Mesiya.” Kweni ŵanyakheso ŵakati, “Kasi Mesiya wafumenge ku Galileya?

⁴²Asi malembo ghakuti, ‘Mesiya ngwa mu mphapu ya Davide, ndiposo wakufuma mu chikaya cha Betelehemu umo Davide wakakharanga?’ ”

⁴³Ntheura mukaŵa kugaŵikana mukati mwawo chifukwa cha iyo.

⁴⁴Ŵanji ŵa iwo ŵakakhumba kumukora, kweni pakaŵavye munthu na yumoza uyo wakaŵika mawoko ghakhe pa iyo.

⁴⁵Ŵalinda ŵa Nyumba ya Chiuta ŵara ŵakawerera ku ŵasofi ŵarara na ku ŵaFarisi awo ŵakati kwa iwo, “Chifukwa uli mundize nayo?”

⁴⁶Ŵalinda ŵakaŵazgora ŵakati, “Nanga ndi kale, palije munthu uyo wali kuyowoyapo nga ndi munthu uyu.”

⁴⁷ŴaFarisi ŵakaŵazgora ŵakati, “Kasi namweso mwapuruskika?”

⁴⁸“Kasi walipo yumoza mukati mwa ŵarongozgi panji mu ŵaFarisi uyo ŵakupulikana mwa iyo?

⁴⁹Kweni mzinda wa ŵanthu uwu, uwo ngwambula kumanya Dango la Mozesi, ngwa kutembeka.”

⁵⁰Penepapo Nikodemo yumoza wa iwo, uyo wakarutapo kale kwa Yesu, uyoso wakaŵa yumoza wa iwo wakati,

⁵¹“Kasi marango ghithu ghakweruzga munthu kwambula kumupulika danga na kumanya icho wakuchita?”

⁵²Ŵakamuzgora ŵakati, “Kasi nawe ndiwe wa ku Galileya? Penjerezga mu malembo ndipo uwonenge kuti kulije nchimi iyo yiti yiwukenge kufuma ku Galileya.” [

⁵³Ndipo ŵakaruta waliyose ku nyumba yakhe,