Read new_tumbuka_bible Yohane 9 Bible Online

Yohane 9 - new_tumbuka_bible bible

Yohane 9

¹Apo Yesu wakadumulanga, wakawona munthu uyo wakababika wachiburumutira.

²Ŵasambiri ŵakhe ŵakamufumba ŵakati, “Musambizgi, kasi wakananga ndi njani, munthu uyu, panji ŵapapi ŵakhe kuti wababike wachiburumutira?”

³Yesu wakaŵazgora wakati, “Kuti wakananga ndi munthu uyu chara, panji ŵapapi ŵakhe, kweni kuti Chiuta warongore milimo yakhe mwa iyo.

⁴Nkhwenera kuchita milimo ya uyo wakandituma apo kuchali muhanya. Usiku ukwiza apo munthu kuti wakumanya kuteŵeta mlimo chara.

⁵Apo ndichali mu charu, ndine ungweru wa charu.”

⁶Wakati wayowoya ichi, Yesu wakafunyira mata pasi pa dongo na kukonkha thope na mata. Wakaphaka thope mu maso gha munthu yura.

⁷Wakamuphalira kuti, “Ruta ukageze mu chiziŵa cha Silowamu.” Zina ili likung'anamula kuti kutumika. Ntheura munthu yura wakaruta wakaya kageza ndipo wakawerako wakuwona.

⁸Sono ŵazengezgani ŵakhe na ŵanthu awo ŵakamuwonanga kale kuti ngwa kupemphapempha, ŵakati, “Asi uyu ndi munthu yura wakakharanga pasi na kupemphapempha?”

⁹Ŵanji ŵakati, “Ndi mweneyuyu.” Ŵanji ŵakati, “Chara, kweni wakukozgana waka nayo.” Kweni mwenecho wakati, “Ndine nadi.”

¹⁰Ŵakati kwa iyo, “Kasi maso ghako ghakajurika uli?”

¹¹Wakaŵazgora wakati, “Munthu uyo ŵakuti Yesu wangukonkha thope na kuphaka mu maso ghane ndipo wanguti kwa ine, ‘Ruta ku Silowamu ndipo ukageze,’ ndipo ndanguruta. Ndipo ndati ndageza, nkhasanga kuti ndawona.”

¹²Ŵakati kwa iyo, “Kasi wali nkhu?” Iyo wakati, “Nkhumanya chara.”

¹³Ŵakiza nayo ku ŵaFarisi munthu uyo wakaŵa wachiburumutira.

¹⁴Pakaŵa pa zuŵa la Sabata apo Yesu wakakonkhera thope pakumujula maso.

¹⁵Ntheura ŵaFarisi ŵakamufumbaso munthu yura na umo wakajurikira maso ghakhe. Iyo wakati kwa iwo, “Wanguphaka thope ku maso ghane, ndipo ndanguya kageza, ndipo nkhuwona.”

¹⁶ŴaFarisi ŵanji ŵakati, “Munthu uyu wakuchita ichi kuti ngwa kufumira kwa Chiuta chara. Pakuti wakusunga zuŵa la Sabata chara.” Kweni ŵanji ŵakati, “Kasi munthu wakwananga wangachita uli vimanyikwiro nga ndi ivi? Ntheura pakaŵa kugaŵikana mukati mwawo.”

¹⁷Ntheura ŵaFarisi ŵakamufumbaso wachiburumutira ŵakati, “Iwe ukuti uli na za iyo, pakuti wajula maso ghako?” Wakaŵazgora wakati, “Iyo ndi nchimi.”

¹⁸Kweni ŵaYuda ŵakapulikana chara kuti munthu yura wakaŵapo wachiburumutira ndipo sono wakuwona, mpaka ŵakachema ŵapapi ŵakhe.

¹⁹Ŵakaŵafumba ŵakati, “Kasi uyu ndi mwana winu? Kasi ndiyo mukuti wakababika wachiburumutira? Chifukwa uli sono wakulaŵiska?”

²⁰Ŵapapi ŵakhe ŵakaŵazgora ŵakati, “Tikumanya kuti uyu ndi mwana withu na kuti wakababika wachiburumutira.

²¹Kweni kuti tikumanya chara umo wakulaŵiskira sono, nanga nkhumanya munthu uyo wangumujula maso ghakhe. Mufumbani, ndi munthu murara, wati wajizgorere yekha.”

²²Ŵapapi ŵakhe ŵakayowoya ntheura, chifukwa ŵakopanga ŵaYuda pakuti ŵakapangana kale kuti, usange munthu wazomerezgenge kuti Yesu ndi Mesiya, ŵakenera kumusezga mu nyumba ya kusoperamo.

²³Ndicho chifukwa ŵapapi ŵakhe ŵakati “Ndi murara, mufumbani mwenecho.”

²⁴Ntheura ŵakamuchema kachiŵiri munthu uyo wakaŵapo wachiburumutira, ŵakati, “Urape panthazi pa Chiuta kuti uyowoyenge unenesko. Ise tikumanya kuti munthu uyu ngwakwananga.”

²⁵Iyo wakaŵazgora wakati, “Kwali ngwakwananga, nkhumanya chara. Kweni chinthu chimoza pera icho nkhumanya nchakuti, nangauli nkhaŵa wachiburumutira, sono nkhuwona.”

²⁶“Wanguchitachi kwa iwe? Wangukujula uli maso ghako?”

²⁷Iyo wakaŵazgora wakati, “Ndangumuphalirani kale ndipo kuti mwangupulika chara. Chifukwa uli mukukhumba kupulikaso? Kasi namwe mukukhumba kuŵa ŵasambiri ŵakhe?”

²⁸Penepapo ŵakamutuka ŵakati, “Iwe ndiwe musambiri wakhe, kweni ise tili ŵasambiri ŵa Mozesi.

²⁹Ise tikumanya kuti Chiuta wali kuyowoyera mwa Mozesi, kweni munthu uyu kuti tikumanya chara uko wakafuma.”

³⁰Munthu yura pakuŵazgora wakati kwa iwo, “Chifukwa, ichi nchakuzizwiska, kuti imwe mukumanya chara uko wali kufuma, kweni iyo wandijula maso!

³¹Tikumanya kuti Chiuta wakupulika ku ŵakwananga chara, kweni wakupulika kwa uyo wakusopa Chiuta na kuchita khumbo lakhe.

³²Umo charu chikayambira chindapulikwikepo chara kuti munthu yunji wajula maso gha uyo wakababika wachiburumutira.

³³Munthu uyu warekenge kufuma kwa Chiuta mphanyi wachitapo kanthu chara.”

³⁴Pakumuzgora ŵakati kwa iyo, “Iwe ukababika na kukulira mu zakwananga. Kasi ndiwe ungatisambizga ise!” Ndipo wakamuchimbizgira kuwaro.

³⁵Yesu wakapulika kuti ŵaYuda ŵamuchimbizgira kuwaro ndipo wakati wamusanga, wakati kwa iyo, “Kasi ukupulikana mwa Mwana wa Munthu?”

³⁶Iyo wakazgora wakati, “Fumu, kasi ndi njani, kuti ine ndipulikane mwa iyo?”

³⁷Yesu wakazgora wakati, “Wamuwona ndipo ndi mweneuyo wakuyowoya nawe.”

³⁸Iyo wakati, “Fumu, nkhupulikana,” ndipo wakamulambira Yesu.

³⁹Yesu wakati, “Nkhiza muno mu charu kwiza keruzga, mwakuti awo ŵakureka kulaŵiska ŵalaŵiske, ndipo awo ŵakulaŵiska ŵazgoke kuŵa ŵachiburumutira.”

⁴⁰ŴaFarisi ŵanji awo ŵakaŵa pafupi nayo ŵakapulika ichi ndipo ŵakati kwa iyo, “Kasi ise nase tili ŵachiburumutira?”

⁴¹Yesu wakati kwa iwo, “Muŵenge ŵachiburumutira mphanyi mulije njuŵi ya kwananga. Kweni sono chifukwa mukuyowoya kuti mukuwona, ipo njuŵi yinu ya kwananga yichali kumudemererani.”