Read new_tumbuka_bible Milimo ya Ŵakutumika 1 Bible Online

Milimo ya Ŵakutumika 1 - new_tumbuka_bible bible

Milimo ya Ŵakutumika 1

¹Imwe ŵaTiyofilo, Mu buku lane lakudanga nkhamulemberani vyose ivyo Yesu wakamba kuchita na kusambizga

²mpaka pa zuŵa ilo wakatorekera kuchanya, wakati wapereka dango mu nkhongono za Mzimu Mutuŵa ku ŵakutumika awo wakaŵasora.

³Wakati wasuzgika na kufwa, Yesu wakajirongora wamoyo ku ŵakutumika ŵakhe pa mazuŵa 40 mu nthowa zinandi, mwakuti ŵapanikizge kuti nadi ngwamoyo. Iwo ŵakamuwona ndipo wakaŵayowoyeranga vya Ufumu wa Chiuta

⁴Apo wakaŵa nawo pamoza, wakaŵalangula wakati, “Mureke kufumamo mu Yerusalemu, kweni mulindilire phangano la Ŵadada nga ndi umo nkhamuphalirani.

⁵Pakuti Yohane wakabapatizanga ŵanthu na maji, kweni ghandajumphepo mazuŵa ghanandi, imwe mwizamkubapatizika na Mzimu Mutuŵa.”

⁶Para ŵakutumika ŵakawunganaso pamoza na Yesu, ŵakamufumba ŵakati, “Fumu, kasi yeneiyi ndiyo nyengo yakuti muwezgere ufumu ku ŵaIsraele?”

⁷Yesu wakati kwa iwo, “Kuti nkhwa imwe chara kumanya mazuŵa na zinyengo izo Ŵadada ŵali kwimika mu mazaza ghawo.

⁸Kweni para Mzimu Mutuŵa wiza pa imwe, mwizamkupokera nkhongono, ndipo mwizamkuŵa ŵakaboni ŵane mu Yerusalemu, mu Yudeya yose na Samariya, na kuya kafika ku mphererekezgo za charu.”

⁹Wakati wayowoya vyeneivi, wakatorekera kuchanya uku ŵakumuwona, ndipo bingu likamupokerera na kumubisa ku maso ghawo.

¹⁰Ŵachali kudodoliska kuchanya apo iyo wakakweranga, kwa mabuchibuchi ŵanthu ŵaŵiri awo ŵakavwara vituŵa ŵakimilira pafupi nawo.

¹¹Ndipo ŵakati, “Mwa madoda gha ku Galileya, kasi mukwimilirachi na kulaŵiska kuchanya? Uyu Yesu, mweneuyo mwamuwona wakutorekera kuchanya, wamkwizaso nga ndi umo mwamuwonera wakurutira kuchanya.”

¹²Ntheura ŵakutumika ŵakawerera ku Yerusalemu kufuma ku Phiri la maOlive, lweneulo mtunda wakhe ukuyana na kilomita yimoza.

¹³Ŵakati ŵafika mu Yerusalemu, ŵakakwerera mu chipinda cha pachanya mwenemumo ŵakakharanga. Mazina ghawo ndi agha: Petrosi Yohane, Yakhobe, Andreya, Filipu, Tomasi, Baratolomeyu, Mateyu, na Yakhobe mwana wa Alifeyu, Simoni wa chipani cha Zeloti ndiposo na Yudasi mwana wa Yakhobe.

¹⁴Wose aŵa na mtima umoza ŵakawungananga mukuromba pamoza, na ŵanakazi ndiposo na Mariya nyina wa Yesu na ŵanung'una ŵakhe.

¹⁵Mu mazuŵa ghara Petrosi wakimilira mukati mu ŵakupulikana awo ŵakaŵa pakunji 120 ndipo wakayowoya kuti,

¹⁶“Mwa ŵanyane, chikaŵa chakwenerera kuti malembo ghafiskike gheneagho Mzimu Mutuŵa wakayowoyerathu mwa Davide, pakuchima vya Yudasi, uyo wakaŵa murongozgi wa awo ŵakamukora Yesu.

¹⁷Yudasi wakaŵa yumoza wa ise, ndiposo wakaŵa na chigaŵa mu uteŵeti uwu.”

¹⁸Sono munthu uyu wakagula munda na ndarama izo wakapokera pakuchita uheni. Wakawa kapingizgori na kuphumuka nthumbo ndipo matumbo ghakhe ghakafulumuka.

¹⁹Ŵanthu wose ŵa mu Yerusalemu ŵakachipulika ichi. Ntheura mu chiyowoyero chawo munda ura ukachemeka Akelidama, kung'anamula kuti, “Munda wa ndopa.”

²⁰Petrosi wakati, “Pakuti chili kulembeka mu Buku la MaSalimo kuti, ‘Rekani nyumba yakhe yizgoke mahami, ndipo paŵavye munthu kuti wakharemo.’ Ndiposo, ‘Rekani yunji ndiyo watore nchito yakhe.’

²¹“Ntheura mwa ŵanthu awo ŵakarongozgana nase nyengo yose iyo Fumu Yesu wakaŵa nase,

²²kufuma apo Yohane wakamubapatizira kufikira pa zuŵa ilo iyo wakatorekako kwa ise, kukwenerera kuti wasankhike munyakhe uyo waŵe kaboni pamoza na ise wa kuwuka kwakhe.”

²³Ntheura ŵakasachizga mazina gha ŵanthu ŵaŵiri: Yosefe uyo wakuchemeka Barasaba, uyo wakachemekangaso Yusto, na Matiya.

²⁴Ntheura ŵakaromba ŵakati, “Fumu, imwe mukumanya mitima ya ŵanthu wose, mutirongore pa ŵaŵiri aŵa mweneuyo mwamusora,

²⁵kuti ndiyo watore uteŵeti uwu nga njumoza wa ŵakutumika, mu malo mwa Yudasi uyo wakawureka na kuruta ku malo ghakhe.”

²⁶Ndipo ŵakachita mphenduzgo ndipo yikawira Matiya, mweneuyo wakapendekera lumoza na ŵakutumika 11.