Read new_tumbuka_bible Milimo ya Ŵakutumika 11 Bible Online

Milimo ya Ŵakutumika 11 - new_tumbuka_bible bible

Milimo ya Ŵakutumika 11

¹Ŵakutumika na ŵakupulikana awo ŵakaŵa mu Yudeya, ŵakapulika kuti ŵamitundu nawo ŵapokera mazgu gha Chiuta.

²Para Petrosi wakiza ku Yerusalemu, wose awo ŵakaŵa ŵakukotoreka ŵakamususka ŵakati,

³“Iwe ukaruta ku nyumba za ŵanthu ŵambula kukotoreka na kurya nawo pamoza!”

⁴Kweni Petrosi wakamba kuŵakonkhoskera vyose mu ndondomeko yakhe umo vikachitikira wakati,

⁵“Apo nkharombanga mu msumba wa Yopa, ndipo nga nkhu tulo nkhawona mboniwoni. Nkhawona chinthu chikwikha kufuma kuchanya, chili nga ndi chisalu chikuru chomene icho chakolereka pa mawondo ghanayi, ndipo chikiza kafika apo nkhaŵa ine.

⁶Nkhati ndachilaŵisiska, nkhawona nyama za malundi ghanayi, vikoko, vyakukhwaŵa pasi ndiposo na viyuni vya mudera.

⁷Ntheura nkhapulika mazgu ghakuti, ‘Petrosi, wuka, koma urye.’

⁸Kweni nkhati, ‘Yayi Fumu! Pakuti na kale ndilije kuryapo chinthu cha ukazuzi panji chambula kuphotoka.’

⁹Kweni lizgu likayowoya kachiŵiri kufuma kuchanya kuti, ‘Icho Chiuta waphotora, ureke kuyowoya kuti ncha ukazuzi.’

¹⁰Ichi chikachitika katatu, ndipo chinthu chira chikawezgekera kuchanya.

¹¹Pa nyengo yeneyirayira ŵanthu ŵatatu awo ŵakatumika kwa ine kufuma ku Kesareya, ŵakafika pa nyumba iyo tikaŵamo.

¹²Mzimu wakandiphalira kuti ndirute nawo kwambula kukayikira. Ŵakupulikana ŵankhonde na yumoza ŵara ŵakaruta nane ku Kesareya, ndipo tikanjira mu nyumba ya Koroneliyo.

¹³Iyo wakatiphalira na umo wakawonera mungelo uyo wakimilira mu nyumba yakhe, na kumuphalira kuti, ‘Tuma ŵanthu ku Yopa kuti ŵakatore Simoni uyo wakuchemeka Petrosi.

¹⁴Ndipo wizamkukuphalira mazgu gheneagho mwamuponoskeka nagho mose, iwe na ŵa nyumba yako wose.’

¹⁵Apo nkhati ndamba kuyowoya, Mzimu Mutuŵa wakakhira pa iwo nga ndi umo wakakhilira pa ise pakudanga para.

¹⁶Ntheura nkhakumbuka mazgu gha Fumu, agho yikayowoya ghakuti, ‘Yohane wakabapatizanga na maji, kweni imwe mwizamkubapatizika na Mzimu Mutuŵa.’

¹⁷Ntheura usange Chiuta wakapereka kwa iwo chawanangwa cha kulingana waka na icho tikapokera ise para tikapulikana na Fumu Yesu Khristu, kasi nkhaŵa njani ine kuti ndimikane na Chiuta?”

¹⁸Ŵakati ŵapulika ichi, kuti ŵakayowoyako chara. Ndipo ŵakachindika Chiuta ŵakati, “Ipo Chiuta wapereka na ku ŵamitundu wuwo mwaŵi wa kung'anamuka mu mtima na kuŵa na umoyo.”

¹⁹Sono ŵakupulikana ŵanji awo ŵakaparanyikira kosekose chifukwa cha kuzikizgika uko kukawuka para Stefano wakakomekanga, ŵakaruta mpaka ku Fonike na ku Kipuro ndiposo na ku Antiyoke. Ŵakapharazga mazgu ku ŵanyakhe chara kweni ku ŵaYuda pera.

²⁰Kweni ŵakaŵapo ŵanji ŵa iwo, ŵanthu ŵa ku Kipuro na Kurene, awo pakwiza ku Antiyoke, ŵakamba kuyowoyaso na ku ŵaGriki, kuŵapharazgira Fumu Yesu.

²¹Woko la Fumu likaŵa nawo ndipo ŵanthu ŵanandi chomene ŵakapulikana na kuzgokera kwa Fumu.

²²Lumbiri ulu lukati lwafika ku mpingo wa Chiuta uwo ukaŵa mu Yerusalemu, ŵakatuma Baranaba ku Antiyoke.

²³Para wakati wafika na kuwona uchizi wa Chiuta wakasekerera. Wakaŵachenjezga wose kuti ŵarutilire kuŵa ŵakugomezgeka na ŵa unenesko kwa Fumu na mtima wawo wose.

²⁴Pakuti Baranaba wakaŵa munthu muweme, na wakuzura na Mzimu Mutuŵa, na wa chipulikano. Ŵanthu ŵanandi ŵakasazgikirako kwa Fumu.

²⁵Ntheura Baranaba wakaruta ku Taraso kuya kamupenja Sauli

²⁶Wakati wamusanga wakiza nayo ku Antiyoke. Chirimika chose chira, wose ŵaŵiri ŵakakhara mwenemura mu mpingo wa Chiuta, ŵakasambizganga mizinda ya ŵanthu. Kukaŵa ku Antiyoke uko ŵasambiri ŵakamba kuchemeka kuti ŵakhristu.

²⁷Mu mazuŵa gheneghara, nchimi zikikhira ku Antiyoke kufuma ku Yerusalemu.

²⁸Yumoza wa iwo zina lakhe Agabu wakimilira, ndipo na nkhongono za Mzimu wakaphara vya kunthazi kuti njara yikuru yiti yiŵengeko mu charu chose cha pasi. (Ndipo ichi chikachitika mu mazuŵa gha Kilaudiyo.)

²⁹Ŵasambiri ŵakadumula kuti munthu yose kwakuyana na nkhongono zakhe watume wovwiri ku ŵakhristu ŵanyawo awo ŵakakharanga mu Yudeya.

³⁰Ŵakachita ichi, ndipo ŵakatumizga wovwiri ku ŵarara ŵa mpingo mu mawoko gha Baranaba na Sauli.