Read new_tumbuka_bible Milimo ya Ŵakutumika 12 Bible Online

Milimo ya Ŵakutumika 12 - new_tumbuka_bible bible

Milimo ya Ŵakutumika 12

¹Pa nyengo iyi Karonga Herode wakamba kusuzga ŵakhristu ŵanji ŵa mu mpingo wa Chiuta.

²Wakakoma Yakhobe mukuru wa Yohane na lupanga.

³Para Herode wakawona kuti ichi chikaŵakondweska ŵaYuda, wakamukora na Petrosi wuwo. Ichi chikachitika mu mazuŵa gha chiphikiro cha Chingwa chambula chirungo.

⁴Wakati wamukora wakamuŵika mu gadi. Wakaŵika mipingo yinayi ya ŵasilikari kumusungilira, mpingo uliwose na ŵasilikari ŵanayi. Herode wakaghanaghana kumutorera panthazi pa ŵanthu para Paska chamara.

⁵Ntheura Petrosi wakajalirika mu gadi, kweni mpingo ukafwirirapo kumurombera kwa Chiuta.

⁶Usiku wenewura, pambere Herode wandamufumye kuya keruzgika, Petrosi wakagona tulo pakati pa ŵasilikari ŵaŵiri, uku wakakika na maunyoro ghaŵiri, ndipo pa muryango wa gadi napo pakaŵa ŵalinda ŵaŵiri.

⁷Penepapo mungelo wa Fumu wakawoneka ndipo ungweru ukaŵala mu kachipinda. Mungelo wakamusukunya na kumuwuska na kuti, “Wuka luŵiro!” Penepapo maunyoro ghakavurika mu mawoko ghakhe.

⁸Ndipo mungelo wakati kwa iyo, “Jiphinya lamba wako na kuvwara skapato zako.” Petrosi wakachita ntheura ndipo mungelo wakati kwa iyo, “Vwara munjilira wako, undirondezge.”

⁹Petrosi wakafumamo na kumurondezga, kweni wakamanyanga chara, kuti icho mungelo wakachitanga chikaŵa cha unenesko. Iyo wakaghanaghananga kuti wakuwona mboniwoni.

¹⁰Ŵakati ŵaŵajumpha ŵalinda ŵakudanga na ŵa chiŵiri, ŵakafika pa chijaro cha chisulo icho chikarazga ku msumba. Chijaro chikajurika chekha ndipo ŵakafumira kuwaro, na kwenda kukhilira mu msewu umoza wa mu msumba, penepapo mungelo wakamureka.

¹¹Ntheura Petrosi wakapanikizga icho chikachitika pa iyo, ndipo wakati, “Sono ndipo ndamanya nadi kuti Fumu yangunditumira mungelo wakhe kuti wandithaske ku nkhongono ya Herode, na ku vyose ivyo ŵaYuda ŵakaghanaghananga kuti vichitikenge.”

¹²Wakati wapanikizga ichi, wakaruta ku nyumba ya Mariya, nyina wa Yohane, uyo wakachemekanga Mariko, uko ŵanthu ŵanandi ŵakawungana ndipo ŵakarombanga.

¹³Petrosi wakakhung'uska pa chijaro cha pa chipata, ndipo msungwana zina lakhe Roda wakiza kategherezgako.

¹⁴Pakupanikizga kuti ndi mazgu gha Petrosi, na chimwemwe Roda wakajulako chara kweni wakawereraso ku ŵanyakhe mukati kukaŵaphalira kuti ndi Petrosi uyo wimilira pa chipata.

¹⁵Ŵanthu ŵara ŵakamuzgora ŵakati, “Wafuntha iwe!” Roda wakakhomekezgapo wakati, “Nadi nkhuneneska.” Ntheura ŵakazgora ŵakati, “Ipo ndi mungelo wakhe.”[4]

¹⁶Kweni Petrosi wakarutilira kukhung'uska ndipo ŵakati ŵajulako ŵakamuwona ndipo ŵakazizwa.

¹⁷Petrosi wakaŵasinizga na woko lakhe kuti ŵakhare chete, ndipo wakaŵakonkhoskera vyose na umo Fumu yikamufumyira mu gadi. Ndipo wakati, “Pharani ichi kwa Yakhobe na ŵanyithu wose.” Ntheura wakafumapo na kuruta ku malo ghanyakhe.

¹⁸Kukati kwacha, chiwawa chikuru chikawuka mukati mu ŵasilikari. Ŵakafumbana ŵakati, “Kasi nchichi icho chamuwira Petrosi?”

¹⁹Herode wakalangula kuti ŵamupenjerere kweni kuti ŵakamusanga chara. Wakaŵafumbiska ŵalinda ŵara, ndipo wakalangula kuti ŵakomeke. Herode wakafumako ku Yudeya, wakaruta ku Kesareya na kukhara kwenekuko.

²⁰Herode wakaŵakwiyira ŵanthu ŵa mu Ture na ŵa mu Sidoni. Ŵanthu aŵa, ŵakati ŵamukhorweska Bulasito, nduna ya karonga, ŵakaruta kwa Karonga Herode, kuya karomba mutende, chifukwa vyakurya vyawo vikafumanga mu charu cha karonga.

²¹Pa zuŵa ilo la kutemeka, Herode wakavwara munjilira wakhe wa ufumu, na kukhara pa chitengo cha ufumu ndipo wakayowoyanga nawo.

²²Ŵanthu ŵakachemerezga ŵakati, “Agha ndi mazgu gha chiuta, kuti nga munthu chara!”

²³Penepapo mungelo wa Fumu wakamutimba chifukwa wakareka kumuchindika Chiuta, ndipo wakaryeka na mphorozi na kufwa.

²⁴Kweni mazgu gha Chiuta ghakakula na kutandazgika.

²⁵Baranaba na Sauli ŵakawerako ku Yerusalemu apo ŵakati ŵamarizga mlimo wawo ndipo pakuwera wakatora Yohane uyo wakachemekanga Mariko.