Read new_tumbuka_bible Milimo ya Ŵakutumika 14 Bible Online

Milimo ya Ŵakutumika 14 - new_tumbuka_bible bible

Milimo ya Ŵakutumika 14

¹Ŵakati ŵafika ku Ikoniya, Paulosi na Baranaba ŵakaya kanjira mu nyumba ya kusoperamo ya ŵaYuda. Ŵakapharazga na nkhongono chomene mwakuti ŵanthu ŵanandi ŵaYuda na ŵamitundu ŵakapulikana.

²Kweni ŵaYuda awo ŵakareka kugomezga ŵakakhuŵirizga ŵamitundu kuti waŵawukire ŵakupulikana.

³Ntheura Paulosi na Baranaba ŵakakharamo nyengo yitali, ŵakapharazganga na chikanga pakweru pakugomezga mwa Fumu, iyo yikakhozga mazgu gha uchizi agho ŵakayowoyanga pakuŵapa nkhongono ya kuchitira vimanyikwiro vya minthondwe na vya kuzizwiska.

⁴Ŵanthu ŵa mu msumba ŵakagaŵikana. Ŵanji ŵakarondezga ŵaYuda, ŵanyakhe ŵakarondezga ŵakutumika.

⁵Penepapo ŵamitundu na ŵaYuda, pamoza na ŵarara ŵawo ŵakadumula kuti ŵaŵasuzge ŵakutumika na kuŵadina na mawe.

⁶Para ŵakutumika ŵakamanya ichi, ŵakachimbilira ku Lisitira na Derebe misumba ya charu cha Likawoniya, na ku charu cha kuzingirizga misumba yira.

⁷Kwenekura ndiko ŵakapharazganga Uthenga Uweme.

⁸Mu Lisitira mukakharanga munthu wakupendera malundi, mweneuyo wakaŵa chiti kufuma kukubabika kwakhe, ndipo wakaŵa kuti wandendepo na kale.

⁹Iyo wakategherezganga apo Paulosi wakayowoyanga. Sono Paulosi wakamudodoliska ndipo wakati wawona kuti wali nacho chipulikano kuti wangachira,

¹⁰wakachemerezga na mazgu ghakuru wakati, “Imilira!” Penepapo munthu yura wakadukira muchanya na kwamba kwenda.

¹¹Para mzinda wa ŵanthu ukawona icho Paulosi wakachita, ukachemerezga mu chiLikawoniya ukati, “Ŵachiuta ŵakhilira kwa ise mu mawonekero gha ŵanthu!”

¹²Ntheura Baranaba ŵakamuthya Zeusi, ndipo Paulosi ŵakamuthya Heremesi, chifukwa ndiyo wakaŵa murongozgi mu kuyowoya.

¹³Musofi wa Zeusi, uyo nyumba ya chiuta wakhe yikaŵa kunthazi kwa msumba, wakiza na nkhambako na maluŵa pa vipata vya msumba, ndipo wakakhumba kupereka sembe pamoza na ŵanthu.

¹⁴Kweni para ŵakutumika ŵara, Baranaba na Paulosi ŵakapulika ichi, ŵakaparura vyakuvwara vyawo ndipo ŵakaya kanjira mukati mu mzinda wa ŵanthu na kuchemerezga kuti.

¹⁵“Mwa ŵanthu, kasi mukuchitirachi chinthu ichi? Ise nase tili ŵanthu ŵa makhaliro ghamoza nga ndimwe. Tamwizirani na Uthenga Uweme, mwakuti muwereko ku vinthu ivi vya waka, muzgokere kwa Chiuta wamoyo, uyo wakalenga kuchanya na pasi, na nyanja ndiposo na vyose ivyo vilimo.

¹⁶Mu miwiro iyo yajumpha, iyo wakazomerezga mafuko ghose kwenda mu nthowa zawo.

¹⁷Kweni nyengo zose wakapereka ukaboni kuti iyo waliko pakuchita vinthu viweme. Iyo wakumupani vura kufuma kuchanya na vuna pa nyengo ya kwenerera. Wakukhorweska mitima yinu na chakurya na chimwemwe.”

¹⁸Nanga ŵakayowoya mazgu agha, ndipouli kuti chikaŵa chipusu chara kukanizga ŵanthu ŵara kupereka sembe kwa iwo.

¹⁹ŴaYuda ŵanji ŵakiza kufuma ku Antiyoke wa ku Pisidiya na ku Ikoniya. Ŵakati ŵakhuŵirizga ŵanthu, ŵakamudina Paulosi na mawe na kumuguzira kuwaro kwa msumba, chifukwa ŵakaghanaghananga kuti wafwa.

²⁰Kweni para ŵasambiri ŵakati ŵamuzingirizga, wakawuka ndipo wakawereraso mu msumba. Na machero ghakhe Paulosi wakaruta ku msumba wa Derebe pamoza na Baranaba.

²¹Ŵakati ŵapharazga Uthenga Uweme mu msumba ura, na kuzgora ŵanandi kuŵa ŵasambiri, ŵakawerera ku Lisitira, na Ikoniya, na Antiyoke.

²²Ŵakakhomeska mitima ya ŵasambiri ŵara na kuŵachiska kuti ŵakhalirire mu chipulikano, pakuyowoya kuti, “Tikwenera kwenda mu visuzgo vinandi kuti tikanjire mu Ufumu wa Chiuta.”

²³Ŵakati ŵimika ŵarara apo pose pakaŵa mpingo, ndipo ŵakati ŵakuromba na kuziŵizga kurya, ŵakaŵapereka kwa Fumu iyo ŵakapulikana nayo.

²⁴Ŵakati ŵasorota mu Pisidiya, ŵakiza ku Pamfiliya.

²⁵Ndipo ŵakati ŵapharazga mazgu gha Chiuta mu msumba wa Perega, ŵakakhilira ku dowoko la Ataliya.

²⁶Kufuma uko ŵakanjira mu ngaraŵa na kuwereraso ku Antiyoke, kwenekura wakaŵapereka mu uchizi wa Chiuta pa mlimo uwo ŵakawufiska.

²⁷Para ŵakafika, ŵakawunganya ŵa mu mpingo pamoza ndipo wakaŵakonkhoskera vyose ivyo Chiuta wakachita na iwo, na umo wakajulira chijaro cha chipulikano ku ŵamitundu.

²⁸Ntheura ŵakakhara kwenekura nyengo yitali na ŵasambiri.