Read new_tumbuka_bible Milimo ya Ŵakutumika 15 Bible Online

Milimo ya Ŵakutumika 15 - new_tumbuka_bible bible

Milimo ya Ŵakutumika 15

¹Ŵanthu ŵanji ŵakafika kufuma ku Yudeya ndipo ŵakasambizganga ŵabali kuti, “Kwambula kuti mukotoreke kwakuyana na Dango la Mozesi, kuti mungaponoskeka chara.”

²Kweni Paulosi na Baranaba ŵakasuskana nawo chomene. Ntheura Paulosi na Baranaba ŵakasoreka pamoza na ŵabali ŵanji kuruta ku Yerusalemu kuti ŵakawonane na ŵakutumika na ŵarara ŵa mpingo pa makani agha.

³Mpingo ukati waŵaperekezga, ŵakasorota mu Fonike na mu Samariya. Ŵakaŵakonkhoskera ŵakhristu ŵa mwenemura na umo ŵamitundu ŵang'anamukira, ndipo makani agha ghakaŵakondweska ŵakhristu wose.

⁴Para ŵakafika ku Yerusalemu, ŵakapokerereka makora na mpingo wa Chiuta pamoza na ŵakutumika na ŵarara ŵa mpingo. Ntheura iwo ŵakaŵakonkhoskera vyose ivyo Chiuta wakaŵachitira.

⁵Kweni ŵakhristu ŵanji awo ŵakapulikana kufuma mu wupu wa ŵaFarisi ŵakakosera kuti, “Nchakwenerera kuti ŵamitundu ŵakotoreke ndipo ŵaphalirike kuti ŵarondezge Dango la Mozesi.”

⁶Ŵakutumika na ŵarara ŵakawungana pamoza kuti ŵadumbiskane pa makani agha.

⁷Pamanyuma pakudumbiskana nyengo yitali chomene, Petrosi wakawuka na kuŵaphalira kuti, “Mwa ŵabali, mukumanya waka kuti mu mazuŵa ghakwambilira Chiuta wakandisora mukati mwinu, kuti na mlomo wane ŵamitundu ŵapulike Uthenga Uweme na kupulikana.

⁸Ndipo Chiuta uyo wakumanya mitima ya ŵanthu wakaŵachitira ukaboni pakuŵapa Mzimu Mutuŵa nga ndi umo wakatipira ise.

⁹Ndipo kuti wakapambaniska pakati pa iwo na ise chara, kweni wakaphotora mitima yawo chifukwa cha chipulikano.

¹⁰Sono, kasi mukumuyezgerachi Chiuta pakuŵika goliwoli mu singo ya ŵasambiri, iyo nanga mbasekuru panji nesi ise tikamanya kuyegha chara?

¹¹Kweni tikupulikana kuti ise tamkuponoskeka na uchizi wa Fumu Yesu nga ndi umo nawo ŵamkuponoskekera.”

¹²Ungano wose ukakhara waka chete, ukategherezga kwa Baranaba na Paulosi apo ŵakaŵakonkhoskera vimanyikwiro na vyakuzizwiska ivyo Chiuta wakachita na iwo mukati mwa ŵamitundu.

¹³Para ŵakati ŵamara kuyowoya, Yakhobe wakati, “Mwa ŵanyane, tegherezgani kwa ine.

¹⁴Simoni wakonkhoska na umo Chiuta pakudanga wakaŵakumbukira ŵamitundu, kuti mwa iwo wajitoreremo ŵanthu kuti ŵaŵe ŵakhe na ŵakhe.

¹⁵Mazgu gha nchimi ghakuzomerezgana nkhanira na ichi, nga ndi umo kuli kulembekera kuti,

¹⁶‘Pamanyuma pa ichi, ndamkuwera, ndamkuzengaso ufumu wa Davide uwo uli kuwa. Ndamkuzengaso mahami ghakhe, ndipo ndamkuwukhozgaso.

¹⁷Mwakuti ŵanthu wose awo ŵakharapo ŵapenje Fumu, na ŵamitundu wose awo ŵakuchemeka na zina lane.

¹⁸Umu ndimo yikuyowoyera Fumu, iyo yikaghapharazga vyeneivi kufuma papo kale.’

¹⁹“Ntheura udumuliro wane ngwa kuti, tireke kusuzga ŵamitundu awo ŵakuzgokera kwa Chiuta.

²⁰Kweni tiŵalembere waka karata, kuŵaphalira kuti ŵareke kurya vyakukazuzgika vya vikozgo. Ŵareke uzaghali Ŵarekeso kurya nyama yose iyo yayesa kunyongeka, ndiposo na ndopa.

²¹Chifukwa kufuma ku miwiro ya mwaka mu msumba uliwose ŵalipo awo ŵakupharazga Dango la Mozesi, pakuti Sabata waliyose, mazgu ghakhe ghakuŵazgika mu nyumba zakusoperamo.”

²²Ntheura ŵakutumika na ŵarara, pamoza na mpingo wose, ŵakadumula kusora ŵanji ŵa iwo na kuŵatuma ku Antiyoke, pamoza na Paulosi na Baranaba. Ŵakasora Yudasi, uyo wakuthyika Barasaba, na Sila, ŵeneawo ŵakaŵa ŵarongozgi mu mpingo,

²³ndipo ŵakayegha karata uyo wakalembeka ntheura: “Ise ŵakutumika na ŵarara ŵa mpingo, ta ŵabali ŵinu mu chipulikano, tikumutauzgani imwe mwa ŵakupulikana ŵanyithu mwa ŵamitundu imwe muli ku Antiyoke, Siriya na Kilikiya.

²⁴Tapulika kuti ŵanthu ŵanji ŵakufuma mwa ise ŵakamusuzgani na mazgu, na kutimbanizga maghanoghano ghinu, nangauli kuti ndise tikaŵatuma chara.

²⁵Tose pamoza tazomerezgana kusankha mathenga na kuŵatuma kwa imwe, pamoza na ŵakutemweka ŵithu, Baranaba na Paulosi.

²⁶Ŵanthu aŵa ŵali kujipereka mu umoyo wawo kuti ŵateŵetere zina la Fumu yithu Yesu Khristu.

²⁷Ntheura tatumaso Yudasi na Sila awo ŵizamkumuphalirani vyeneivi pa mlomo.

²⁸Pakuti kukupimika kuweme kwa Mzimu Mutuŵa na kwa ise kuti tireke kuŵika katundu muzitu pa imwe pa dera pa ivyo nvyakwenerera.

²⁹Mureke kurya ivyo vyaperekeka ku vikozgo, nanga ndi kurya ndopa, panji nyama yose iyo yayesa kunyongeka, ndiposo mureke uzaghali. Usange mukujisungilira ku ivi, muchitenge makora. Kharani makora.”

³⁰Ntheura ŵakati ŵatumika, ŵakakhilira ku Antiyoke. Ndipo ŵakati ŵawunganya mpingo wose, ŵakapereka karata yira.

³¹Ŵakati ŵaŵazga karata yira, ŵakakondwa chomene chifukwa cha makani ghakuŵakhwimiska.

³²Yudasi na Sila iwo nawoso pakuŵa nchimi, ŵakaŵachiska chomene na kuŵakhwimiska ŵakhristu na mazgu ghanandi.

³³Ŵakati ŵakharapo nawo mazuŵa ghanji ŵakalayirana nawo na kuwerera ku ŵanyawo awo ŵakaŵatuma. [

³⁴Kweni Sila wakaghanaghana kuti wakhalire kwenekura.]

³⁵Kweni Paulosi na Baranaba ŵakakhara mwenemumo mu Antiyoke ŵakasambizganga na kupharazga mazgu gha Fumu, pamoza na ŵanyawo ŵanandi.

³⁶Pamanyuma pa mazuŵa ghanji, Paulosi wakati kwa Baranaba, “Tiyeni, tiwerereso tikaŵawone ŵanyithu mu misumba umo tikapharazgamo mazgu gha Fumu, na kuŵawona umo ŵaliri.”

³⁷Baranaba wakakhumba kutoraso Yohane Mariko kuti warute nayo.

³⁸Kweni Paulosi wakaghanaghana kuti nkhuweme chara kuruta nayo mweneuyo wakapatukana nawo mu Pamfiliya kwambula kuteŵeta nawo mlimo.

³⁹Pakawuka kususkana kukuru chomene, ntheura ŵakapatukana. Baranaba wakatora Mariko pamoza nayo, ndipo ŵakaworokera ku chirwa cha Kipuro.

⁴⁰Paulosi wakasankha Sila, na kuruta, ŵakhristu ŵanyawo ŵakati ŵaŵarombera uchizi wa Fumu.

⁴¹Ndipo ŵakasorota mu Siriya na Kilikiya, kukhwimiska mipingo ya Chiuta.