Read new_tumbuka_bible Milimo ya Ŵakutumika 16 Bible Online

Milimo ya Ŵakutumika 16 - new_tumbuka_bible bible

Milimo ya Ŵakutumika 16

¹Ndipo Paulosi wakiza ku Derebe na ku Lisitira, uko kukaŵa musambiri zina lakhe Timote. Iyo wakaŵa mwana wa mwanakazi muYuda uyo wakaŵa mukhristu, kweni wiske wakaŵa muGriki.

²Ŵakhristu ŵa mu Lisitira na Ikoniya ŵakarumba chomene nkharo ya Timote.

³Paulosi wakakhumba kuti mweneuyo ndiyo wendenge nayo pamoza. Ntheura wakamutora na kumukotora chifukwa cha ŵaYuda awo ŵakaŵa mu malo ghara pakuti wose ŵakamanyanga kuti wiske wakaŵa muGriki.

⁴Apo ŵakasorotanga mu misumba, ŵakaperekanga marango agho ghakanozgeka na ŵakutumika na ŵarara ŵa mpingo pa ungano ukuru wa mu Yerusalemu, kuti ŵanthu ŵaghasungilirenge.

⁵Ntheura mipingo yikakhomeskeka mu chipulikano ndipo unandi wa ŵanthu ukasazgikirangako zuŵa na zuŵa.

⁶Paulosi na ŵanyakhe ŵakenda mu chigaŵa cha Firigiya na cha Galatiya, chifukwa Mzimu Mutuŵa wakaŵakanizga kupharazga mazgu gha Chiuta ku Asiya.

⁷Para ŵakafika mu mphaka za Misiya, ŵakayezga kunjira mu chigaŵa cha Bitiniya, kweni Mzimu wa Yesu kuti ukaŵazomerezga chara.

⁸Ntheura apo ŵakajumpha mu chigaŵa cha Misiya, ŵakakhilira ku dowoko la Turowa.

⁹Ndipo na usiku mboniwoni yikamuwonekera umo munthu wa ku Makedoniya wakwimilira na kumuŵeyerera kuti, “Ambukirani kuno ku Makedoniya mwiza katovwira!”

¹⁰Iyo wakati wawona mboniwoni yira, ise tikaghanaghana kuruta ku Makedoniya nyengo yeneiyo, chifukwa tikamanya kuti Chiuta wakatichema kuti tikapharazge Uthenga Uweme ku ŵanthu ŵa kwenekura.

¹¹Tikati tafuma pa dowoko la Turowa tikambuka mu ngaraŵa, tikakhilira ku chirwa cha Samotirake, ndipo na machero ghakhe tikiza ku Neyapoli.

¹²Kufuma para tikiza ku Filipi, weneuwo ndi msumba ukuru mu Makedoniya ndiposo ndi chigaŵa cha mu muwuso wa ŵaRoma. Tikakharamo mu msumba ura mazuŵa ghanji.

¹³Ndipo pa zuŵa la Sabata tikafumira kuwaro kwa chipata na kuya mu mphepete mwa mronga, uko tikaghanaghananga kuti kuli malo ghakusoperako. Ndipo tikati takhara pasi tikayowoya na ŵanakazi awo ŵakawungana penepara.

¹⁴Yumoza wa ŵanakazi awo ŵakatipulika wakaŵa Lidiya uyo wakafuma mu msumba wa Tiyatira. Iyo wakaŵa muguliski wa salu zichesamu ndipo wakaŵaso mwanakazi wakusopa Chiuta. Ndipo Fumu yikajula mtima wakhe kuti wapulikiske ivyo vikayowoyekanga na Paulosi.

¹⁵Iyo wakati wabapatizika pamoza na ŵa mu nyumba yakhe wose, wakatiŵeya wakati, “Usange mwandipima kuti ndili wakugomezgeka kwa Fumu, zaninge mwiza kakhara mu nyumba yane.” Ndipo wakatikoserezga chomene.

¹⁶Zuŵa limoza para tikarutanga ku malo ghakusoperako tikakumana na msungwana muzga uyo wakaŵa na mzimu wakuwukwira. Chifukwa cha kuwukwa kwakhe, wakaŵatoreranga ŵasekuru ŵakhe usambazi ukuru.

¹⁷Wakarondezganga Paulosi na ise, ndipo wakachemerezganga kuti, “Ŵanthu aŵa mbateŵeti ŵa Chiuta Chikurukuru awo ŵakumumanyiskani nthowa ya chiponosko!”

¹⁸Wakachita ichi mazuŵa ghanandi mpaka Paulosi wakakwenyerezgeka nayo mwakuti wakazgoka na kuwuphalira mzimu “Nkhukulangula mu zina la Yesu Khristu kuti, fumamo mwa iyo.” Penepapo mzimu uheni ukafumamo mwa iyo.

¹⁹Para ŵasekuru ŵa msungwana ŵakawona kuti chigomezgo chawo chakupokeramo usambazi chamara, wakakora Paulosi na Sila, na kuŵaguzira ku mphara ya pa msika panthazi pa ŵarara.

²⁰Ŵakati ŵiza nawo panthazi pa ŵeruzgi ŵakati, “Aŵa ŵanthu mbaYuda, ndipo ŵakutimbanizga msumba withu.

²¹Ŵakupharazga maluso gheneagho ise ta ŵaRoma kuti tingaghapokerera panji kughachita chara.”

²²Mzinda ukanjirirapo na kuŵawukira. Ŵeruzgi ŵakaŵakerulira na kutopora vyakuvwara vyawo mu thupi mwawo na kuŵatimba na michiza.

²³Ŵakati ŵaŵatimba chomene, ŵakaŵaŵika mu gadi, ndipo ŵakamulangula mulinda wa gadi kuti waŵasunge makora.

²⁴Iyo wakati wapulika kulangula uku, wakaŵajalira mu kachipinda ka mukati mu gadi na kuŵakakilira magwede ku malundi ghawo.

²⁵Kweni na usiku pakati, Paulosi, na Sila ŵakarombanga na kwimba sumu za kuchindika Chiuta, ndipo ŵakayidi ŵanyawo ŵakategherezganga.

²⁶Sono kwa mabuchibuchi kukaŵa chindindindi chikuru, mwakuti malufura gha gadi ghakasunkhunyika. Penepapo vijaro vikajurika ndipo maunyoro gha ŵakayidi wose ghakasutuka.

²⁷Apo mulinda wa gadi wakati wawuka, na kuwona kuti miryango yajurika, wakakhwetula lupanga lwakhe, na kukhumba kujikoma, pakuti wakaghanaghana kuti ŵakayidi ŵachimbira.

²⁸Kweni Paulosi wakachemerezga na mazgu ghakuru wakati, “Reka kujipweteka, chifukwa tose tili mwenemuno!”

²⁹Ntheura iyo wakachemeska nyali na kuchimbilira mukati ndipo uko wakumbwambwantha wakaya kawa pasi mu malundi gha Paulosi na Sila.

³⁰Wakaŵafumiskira kuwaro na kuŵafumba kuti, “Mwa madoda, kasi ndichitechi kuti ndiponoskeke?”

³¹Ŵakamuzgora ŵakati, “Pulikana na Fumu Yesu ndipo uti uponoskeke iwe na ŵa mu nyumba yako.”

³²Ntheura ŵakapharazga mazgu gha Fumu kwa iyo na wose ŵa mu nyumba yakhe.

³³Ndipo wakaŵatora pa ora lenelira la usiku, wakasuka vilonda vyawo, ndipo penepapo wakabapatizika pamoza na wose ŵa mu mbumba yakhe.

³⁴Ndipo wakaruta nawo ku nyumba yakhe, na kuŵapa chakurya. Iyo pamoza na wose ŵa mu nyumba yakhe, ŵakasekerera chifukwa ŵakapulikana mwa Chiuta.

³⁵Kukati kwacha, ŵeruzgi ŵakatumaso ŵarara ŵa ŵasilikari na mazgu ghakuti, “Muŵasutule ŵanthu awo.”

³⁶Ndipo mulinda wa gadi wakamuphalira Paulosi wakati, “Ŵeruzgi ŵanditumira mazgu kuti ndimusutulani kuti murutenge. Ntheura sono fumani, murute mu mutende.”

³⁷Kweni Paulosi wakaŵaphalira wakati, “Ŵakatitimbira panthazi pa ŵanthu, kwambula kutisuska, na kutiponya mu gadi, ise tili ŵenekaya ŵa chiRoma. Kasi sono ŵakukhumba kutifumiskira ku udesi? Chara nadi! Kweni iwo ŵekha ndiwo ŵize kwiza katifumya.”

³⁸Ŵasilikari ŵara ŵakaya kaphara mazgu agha ku ŵeruzgi, ndipo ŵeruzgi ŵakopa chomene para ŵakapulika kuti ŵanthu ŵara mbenekaya ŵa chiRoma.

³⁹Ntheura ŵakiza na kuŵaphepiska. Ndipo ŵakaŵafumiska na kuŵaromba kuti ŵawukemo mu msumba.

⁴⁰Ntheura ŵakati ŵafuma mu gadi, Paulosi na Sila ŵakaruta kwa Lidiya. Ŵakati ŵawonana na ŵakhristu ŵanyawo ŵakaŵachiska ndipo ŵakafumako.