Read new_tumbuka_bible Milimo ya Ŵakutumika 17 Bible Online

Milimo ya Ŵakutumika 17 - new_tumbuka_bible bible

Milimo ya Ŵakutumika 17

¹Paulosi na ŵanyakhe ŵara ŵakasorota mu Amfipoli na Apoloniya ndipo ŵakafika mu Tesalonika umo mukaŵa nyumba ya kusoperamo ya ŵaYuda.

²Ntheura Paulosi wakanjiramo nga ndi umo wakazgoŵerera, ndipo kwa maSabata ghatatu ŵakadumbirananga nawo vya mu Malembo.

³Wakaŵarongosorera na kuŵapanikizgira kuti chikaŵa chakwenerera kuti Mesiya wakomwe na kuwuka ku ŵakufwa. Ndipo wakati, “Mweneyuyu Yesu nkhumupharazgirani, ndiyo Mesiya.”

⁴Ntheura ŵanji ŵa iwo ŵakakhorwa ndipo ŵakarondezga Paulosi na Sila. Ntheura pera mzinda ukuru wa ŵaGriki awo ŵakusopa Chiuta ukakhorwa pamoza na ŵanakazi ŵakumanyikwa ŵanandi.

⁵Kweni ŵaYuda ŵakaŵa na sanje, ntheura ŵakajitorera ŵanthu ŵanji ŵaheni na ŵabwekabweka ndipo, ŵakati ŵawunganya mzinda, ŵakawuska chivulupi mu msumba. Ŵakachimbilira ku nyumba ya Yasoni kupenja Paulosi na Sila kuti ŵaŵafumiskire kuwaro, ku mzinda wa ŵanthu.

⁶Para ŵakawura kuŵasanga, ŵakamuguza Yasoni na ŵakhristu ŵanyakhe na kuya nawo panthazi pa ŵeruzgi mu msumba, uku ŵakuchemerezga kuti, “Ŵanthu aŵa awo ŵakutimbanizga charu, ŵizaso na kuno wuwo,

⁷ndipo Yasoni waŵapokerera. Ndipo wose ŵakuchita icho chikupambana na malangulo gha karonga wa ku Romu. Ŵakuti waliko karonga munyakhe uyo ndi Yesu.”

⁸Na mazgu agha ŵakakhuŵirizga ŵanthu pamoza na ŵeruzgi ŵa mu msumba.

⁹Ndipo wakati wapoka chikhole kwa Yasoni na ŵakhristu ŵanyakhe, ŵakaŵasutula.

¹⁰Kukati kwafipa, ŵakhristu ŵanyawo ŵakatuma Paulosi na Sila kuya ku Bereya. Ŵakati ŵafika, ŵakaya kanjira mu nyumba ya kusoperamo ya ŵaYuda.

¹¹Kweni ŵaYuda aŵa, ŵakaŵa ŵa nkharo yiweme kuruska ŵara ŵa mu Tesalonika, pakuti ŵakaghapokerera mazgu na phamphu lose. Ndipo zuŵa na zuŵa ŵakasandanga Malembo kuti wawone usange vinthu ivi vikaŵa nadi ntheura.

¹²Ŵanandi mwa iwo ŵakapulikana, pamoza na ŵanakazi ŵakumanyikwa ŵaGriki ŵanandi na ŵanarume wuwo.

¹³Para ŵaYuda ŵa mu Tesalonika ŵakati ŵakapulika kuti Paulosi wakapharazga mazgu gha Chiuta ku Bereya, ŵakiza na ku msumba wenewura wuwo, ndipo ŵakatimbanizga na kukhuŵirizga mzinda.

¹⁴Ndipo penepapo ŵakhristu ŵakatuma Paulosi kuruta ku nyanja, kweni Sila na Timote ŵakakhalira mwenemura.

¹⁵Ŵanthu awo ŵakaperekezganga Paulosi ŵakaruta nayo mpaka ku Ateni ndipo ŵakawerera ku Bereya, ŵati ŵalangurika kuti Sila na Timote ŵamurondezge mwa luŵiro.

¹⁶Apo Paulosi wakaŵalindiriranga mu Ateni, wakatopoka umoyo chomene pakuwona kuti mu msumba ura mukazura na vikozgo.

¹⁷Ntheura wakasuskana na ŵaYuda na ŵanthu ŵanji ŵakusopa Chiuta mu nyumba ya kusoperamo. Wakasuskanaso na ŵanthu awo ŵakakumananga nawo pa misika zuŵa na zuŵa.

¹⁸Ŵanthu ŵanjiso ŵakutemwa vinjeru ŵa wupu wa Epikuro[5] na wa Stoyiki, ŵakakumana nayo Paulosi. Ŵanji ŵakati, “Kasi chibwetuzi ichi chikukhumba kuyowoyachi?” Ŵanyakheso ŵakati, “Wakuŵa nga ndi mupharazgi wa ŵachiuta ŵachilendo.” Ŵakayowoya ntheura chifukwa wakapharazganga Yesu ndiposo kuwuka ku ŵakufwa.

¹⁹Ntheura ŵakamukora na kuruta nayo ku mphara ya mu msumba yakuchemeka Areyopaga,[6] ŵakati, “Tikukhumba kumanya, kasi nchisambizgo uli chiphya icho ukuyowoya?

²⁰Pakuti vinthu vinyakhe ivyo tikupulika nvyachilendo kwa ise. Sono tikukhumba kumanya ivyo vikung'anamula.”

²¹Sono ŵaAteni wose na ŵalendo awo ŵakakharanga mwenemura, ŵakaŵavyanga nyengo ya kanthu kanyakheso kweni kuphara na kupulika kanthu kaphya.

²²Ntheura Paulosi wakimilira mukati mu mphara ya Areyopaga, wakati, “Madoda gha mu Ateni, nkhuwona kuti mu vyose muli ŵanthu ŵakusopa chomene.

²³Pakuti para nkhendanga na kuwoneseska ivyo mukusopa, nkhasangaso jochero la sembe penepapo pali kulembeka kuti, ‘KWA CHIUTA WAMBURA KUMANYIKWA.’ Ntheura icho mukusopa nga nchambula kumanyikwa, ndicho ine nkhumupharazgirani.

²⁴Chiuta uyo wakalenga charu na vyose ivyo vilimo, pakuŵa iyo Fumu ya kuchanya na pasi, kuti wakukhara mu nyumba ya kusoperamo yakuzengeka na ŵanthu chara.

²⁵Ndiposo wakuteŵetereka na mawoko gha ŵanthu chara nga ndi para ngwa kukavuka kanthu. Pakuti iyo ndiyo wakuŵapa ŵanthu wose umoyo, muvuchi na vyose.

²⁶Ndiyo wakalenga mafuko ghose kufuma mu munthu yumoza kuti ghakharenge pa charu chose cha pasi. Wakimika nyengo za kutemeka kale na mphaka za vyaru vyakukharamo,

²⁷mwakuti ŵamupenje Chiuta, mu chigomezgo chakuti ŵamukhwaske na kumusanga. Ndipouli kuti wali kutali na waliyose wa ise chara.

²⁸Pakuti, ‘Mwa iyo ise tili na umoyo, tikwenda, ndiposo tiliko.’ Nga ndi umo ŵimbi ŵinu ŵanji ŵa imwe, ŵakayowoyera kuti, ‘Pakuti tili nadi mphapu yakhe.’

²⁹Sono pakuti ise tili mphapu ya Chiuta, kuti tikwenera chara kughanaghana kuti Uchiuta wakhe ukukozgana na chiuta ngoza wa golide, panji wa siliva panji wa libwe, ivyo nvyakuŵajika na luso na vinjeru vya munthu.

³⁰Chiuta wakazerezga nyengo za ujira, kweni sono wakulangula ŵanthu wose kosekose kuti ŵang'anamuke mu mtima.

³¹Pakuti wali kutema zuŵa ilo wizamkweruzgira charu mu urunji na munthu uyo wali kumwimika. Ndipo na cheneichi wakaŵapanikizgira ŵanthu wose pakumuwuska iyo ku ŵakufwa.”

³²Para ŵakati ŵamupulika na vya kuwuka kwa ŵakufwa, ŵanji wakamuhoya, kweni ŵanyakhe ŵakati, “Tikukhumba kwiza kakupulikaso pa ichi.”

³³Ntheura Paulosi wakafumamo mukati mwawo.

³⁴Kweni ŵanthu ŵanji ŵakamurondezga, ndipo ŵakapulikana. Mukati mwa iwo mukaŵa Diyonisiyo wa mphara ya Areyopaga na mwanakazi yunji zina lakhe Damarisi ndiposo na ŵanyakheso.